قىلمىستىق اتقارۋ جۇيەسى كوميتەتى بيىلعى جىلدىڭ 1 قىركۇيەگىندە ءوز جازاسىن وتەپ بولۋىنا بايلانىستى سەرىك احمەتوۆتىڭ تىركەۋدەن الىنعانىن حابارلادى. ەندى ول بەلگىلى ءبىر لاۋازىمداردى اتقارۋعا تىيىم سالاتىن قوسىمشا جازا بويىنشا عانا پروباسيادا ەسەپتە تۇر.
2015 جىلدىڭ جەلتوقسانىندا سەرىك احمەتوۆ بيۋدجەت قاراجاتىن جىمقىردى، قىزمەت بابىن اسىرا پايدالاندى جانە كاسىپكەرلىك قىزمەتكە زاڭسىز ارالاسقانى ءۇشىن بەس جىل مەملەكەتتىك قىزمەت اتقارۋ قۇقىعىنان ايىرىلا وتىرىپ، مۇلكى تاركىلەنىپ، 10 جىلعا باس بوستاندىعىنان ايىرىلدى.
احمەتوۆ كىناسىن مويىندامادى، دەگەنمەن ول وزىنە ارتىلعان سەنىمدى اقتاماعانى ءارى "الاڭداتىپ قويعانى" ءۇشىن قازاقستاننىڭ تۇڭعىش پرەزيدەنتى نۇرسۇلتان نازاربايەۆتان كەشىرىم سۇرادى.
2016 جىلدىڭ ناۋرىزىندا ونىڭ مەرزىمى 8 جىلعا دەيىن قىسقارتىلدى. وعان احمەتوۆتىڭ شىن جۇرەكتەن وكىنىش ءبىلدىرىپ، 2،5 ميلليارد تەڭگە كولەمىندە زالالدى وتەۋى تۇرتكى بولدى.
2017 جىلدىڭ قىركۇيەگىندە بۇرىنعى پرەمەر-مينيستردىڭ باس بوستاندىعىنان ايىرۋ جازاسى تۇرعىلىقتى جەرىندە بوستاندىعىن شەكتەۋ جازاسىنا اۋىستىرىلدى.
نازار اۋدارعاندارىڭىز ءۇشىن بارشاڭىزعا راحمەت. مەن ۇيگە بارامىن، دەمالامىن، - دەدى احمەتوۆ كولونيادان شىعىپ بارا جاتىپ.
كەيىن سەرىك احمەتوۆ ءوزىن شارتتى تۇردە مەرزىمىنەن بۇرىن بوساتۋدى سۇراپ، سوتقا ءوتىنىش بەردى، ءبىراق ءوتىنىش قاناعاتتاندىرىلمادى. 2020 جىلدىڭ ماۋسىمىندا سوت ءوتىنىش بەرۋشىنىڭ ءوز ءوتىنىشىن كەرى قايتارىپ الۋىنا بايلانىستى شارتتى تۇردە مەرزىمىنەن بۇرىن بوساتۋ تۋرالى قايتا جولدانعان ءوتىنىشتى قاراۋسىز قايتاردى.
سەرىك احمەتوۆ ءار جىلدارى تەمىرتاۋ قالاسىنىڭ اكىمى، قاراعاندى وبلىسىنىڭ اكىمى، كولىك جانە كوممۋنيكاسيا ءمينيسترى، قورعانىس ءمينيسترى بولدى. سەرىك احمەتوۆ ءىسى - 2015 جىلعى ەڭ داۋلى ءىستىڭ ءبىرى بولدى.
