استانادا قىزىلشاعا قاتىستى ەپيدەميولوگيالىق احۋال ۇكىمەت وتىرىسىندا قارالدى، دەپ حابارلايدى Dala News.
دەنساۋلىق ساقتاۋ مينيسترلىگىنىڭ مالىمەتىنشە، وتكەن جىلدىڭ قورىتىندىسى بويىنشا قىزىلشاعا شالدىعۋ كورسەتكىشى 2024 جىلمەن سالىستىرعاندا 85% تومەندەگەن. الايدا بيىلعى جىلدىڭ باسىنان بەرى 1951 جاعداي تىركەلگەن.
ەڭ جوعارى سىرقاتتانۋشىلىق استانا جانە الماتى قالالارىندا، سونداي-اق جامبىل جانە اتىراۋ وبلىستارىندا بايقالادى. اۋرۋدىڭ باسىم بولىگى 5 جاسقا دەيىنگى بالالار اراسىندا تىركەلگەن. مامانداردىڭ ايتۋىنشا، ناۋقاستاردىڭ كوپشىلىگى ەكپە الماعان، ونىڭ ىشىندە ۆاكسيناسيادان باس تارتۋ جاعدايلارى دا بار.
كەڭەس پرەمەر-مينيستردىڭ ورىنباسارى – مادەنيەت جانە اقپارات ءمينيسترى ايدا بالايەۆانىڭ توراعالىعىمەن ءوتتى. جوعارى كورسەتكىش تىركەلگەن وڭىرلەر اكىمدەرىنىڭ ورىنباسارلارى ەسەپ بەردى.
پروفيلاكتيكالىق ەكپەمەن قامتۋ ماسەلەسىنە ەرەكشە نازار اۋدارىلدى. ءبىرقاتار وڭىردە جوسپارلى كورسەتكىشتەر ورىندالماعان. اسىرەسە ماڭعىستاۋ وبلىسىندا نەگىزگى ۆاكسينالار بويىنشا قامتۋ دەڭگەيى تومەن كۇيىندە قالىپ وتىر.
كەڭەس قورىتىندىسى بويىنشا وڭىرلىك شتابتارعا قىزىلشا بويىنشا جاعدايدى كۇن سايىن تالداۋ، العاشقى مەديسينالىق-سانيتارلىق كومەك دەڭگەيىندە اتاۋلى جۇمىستى كۇشەيتۋ جانە يممۋنداۋدىڭ ماڭىزىن ءتۇسىندىرۋ باعىتىنداعى اقپاراتتىق جۇمىستى جانداندىرۋ تاپسىرىلدى.
