قوعام بەلسەندىسى، «نەمولچي» قورىنىڭ جەتەكشىسى دينارا سمايلوۆا ەكونوميست ولجاس قۇدايبەرگەنوۆتىڭ قايىن اتاسى 7 جىلعا سوتتالعان ءىس بويىنشا مالىمدەمە جاسادى. ونىڭ ايتۋىنشا، قارت ادام جەكە پايداسى ءۇشىن ەمەس، ءوز نەمەرەلەرىنىڭ جاعدايىن ويلاپ، كۇيەۋ بالاسىنان بالالاردى اسىراۋعا قارجى تالاپ ەتكەنى ءۇشىن قىلمىستىق جاۋاپكەرشىلىككە تارتىلعان، دەپ حابارلايدى Dalanews.kz.
دينارا سمايلوۆا بۇل ءىستى الەۋمەتتىك جەلىدەگى پاراقشاسىندا ەگجەي-تەگجەيلى بايانداپ، ءىستىڭ ادىلدىگىنە كۇمان كەلتىردى.
«قايىن اتا نەمەرەلەرى ءۇشىن اقشا سۇرادى»
قور جەتەكشىسىنىڭ جازۋىنشا، سوت قارت ەر ادامنىڭ ارەكەتىن «ءۇشىنشى تۇلعالار ءۇشىن اقشا بوپسالاۋ» دەپ باعالاعان. الايدا بۇل «ءۇشىنشى تۇلعالار» - زاڭدى نەكەدە دۇنيەگە كەلگەن بالالارى مەن ولاردىڭ اناسى بولعان.
«اقشا بايىپ قالۋ ءۇشىن ەمەس، تۋعان نەمەرەلەرىنىڭ كۇنكورىسى ءۇشىن تالاپ ەتىلدى. سوعان قاراماستان، قارت ادام 7 جىلعا باس بوستاندىعىنان ايىرىلدى»، - دەپ جازدى سمايلوۆا.
وقيعا قالاي باستالدى؟
بەلسەندىنىڭ ايتۋىنشا، وقيعا 2023 جىلدىڭ قاراشاسىندا قوعام نازارىنا قايتا شىققان. سول كەزەڭدە ەلدە سالتانات نۇكەنوۆانىڭ ولىمىنە قاتىستى ءىس قىزۋ تالقىلانىپ جاتقان تۇستا قازاقستان ازاماتى ءمولدىر قابىلوۆا ءوزىنىڭ تانىمال ەكونوميست ولجاس قۇدايبەرگەنوۆپەن نەكەسى جايلى اشىق مالىمدەگەن.
ب ا ق دەرەگىنشە، ولجاس قۇدايبەرگەنوۆ ءار جىلدارى ەكونوميست رەتىندە تانىلىپ، ەكى جىل بويى قازاقستان پرەزيدەنتىنىڭ كەڭەسشىسى بولعان. ونىڭ ەسىمى مەملەكەتتىك جانە ساراپتامالىق ورتادا ءجيى اتالعان.
دينارا سمايلوۆانىڭ جازۋىنشا، ءمولدىر قابىلوۆا وتباسىنداعى جاعدايدى كوپكە دەيىن جاريا ەتپەگەن. الايدا ءبىر كۇنى ونىڭ جاسى كەلگەن اكەسى تۇرمەگە قامالعان سوڭ، ءۇنسىز قالۋ مۇمكىن بولماي قالعان.
«اجىراسۋ وڭاي بولمايتىنىن ءبىلدىم، ءبىراق مۇنشالىقتى دەپ ويلامادىم»
2023 جىلى وتكەن باسپا ءسوز كونفەرەنسياسىندا ءمولدىر قابىلوۆا كۇيەۋىمەن اجىراسۋ پروسەسىنىڭ اۋىر وتكەنىن مالىمدەگەن.
ونىڭ سوزىنشە، 10 جىلدىق رەسمي نەكە مەن ءتورت بالانىڭ بولۋى ەر ادامدى قۋدالاۋدان توقتاتپاعان.
«مەن ۇزاق ۋاقىت اجىراسۋ تۋرالى ءتىس جارمادىم، سەبەبى ونىڭ رەاكسياسىنان قورىقتىم. تەك بولەك تۇرۋدى ۇسىندىم دا، بالالارىممەن بىرگە ۇلىبريتانياعا وقۋعا كەتتىم. ول اي سايىن كەلىپ ءجۇردى. ال اجىراسقىم كەلەتىنىن ايتقان سوڭ، پاتەرىمە جاسىرىن كامەرا ورناتىپ، تەحنيكالارىما قاشىقتان باسقارۋ باعدارلامالارىن ەنگىزگەنىن ءبىلدىم»، - دەيدى قابىلوۆا.
ول بۇل جاعدايدان كەيىن پوليسياعا ارىز جازىپ، كۇيەۋىنىڭ پاتەرگە كىرۋىنە تىيىم سالعانىن، الايدا بالالارمەن بايلانىسىنا شەكتەۋ قويماعانىن ايتتى.
ايتا كەتەيىك، ءمولدىر قابىلوۆا «بولاشاق» باعدارلاماسىمەن ۇلىبريتانيادا PhD دوكتورانتۋراسىندا وقىپ، ۇزدىك ستۋدەنت اتانعان. ءقازىر عىلىمي زەرتتەۋ جۇرگىزىپ ءجۇر.
اكەنى قورعاۋ - قاتەلىك بولدى
دينارا سمايلوۆانىڭ جازۋىنشا، ءمولدىر سول كەزدە بالالارىنىڭ اكەسىن اياپ، لوندوندا بولعان بالالاردى ۇرلاۋ ارەكەتىنە قاتىستى ءىستى ءارى قاراي ۋشىقتىرماعان. كەيىن بۇل شەشىم قاتە بولعانى بەلگىلى بولدى.
ارادا ۋاقىت وتە:
- ءمولدىردىڭ اكەسى «بوپسالاۋ» بويىنشا،
- اعاسى «الاياقتىق» بابى بويىنشا ايىپتالعان.
ناتيجەسىندە اعاسى سوتتالىپ، بوستاندىعى شەكتەلسە، اكەسى 7 جىلعا كولونياعا جىبەرىلگەن.
«ەركىندىگىم ءۇشىن كەلىسىمگە قول قويۋعا ءماجبۇر بولدىم»
قور جەتەكشىسىنىڭ ايتۋىنشا، 2022 جىلدىڭ تامىزىندا ءمولدىر قابىلوۆا اكەسىن تۇرمەدەن بوساتۋ ءۇشىن كۇيەۋىمەن ەكى كەلىسىمشارتقا قول قويعان.
وندا:
- كۇيەۋىنىڭ رۇقساتىنسىز ەلدەن شىعۋعا تىيىم سالىنعان؛
- تاۋلىك بويى باقىلاۋ جۇرگىزىلگەن؛
- بارلىق الەۋمەتتىك جەلى مەن گادجەت قۇپياسوزدەرى بەرىلگەن؛
- تەلەفونعا قاشىقتان باسقارۋ قوسىمشاسى ورناتىلعان؛
- بەلگىلى ادامدارمەن بايلانىسۋعا تىيىم سالىنعان؛
- «بولاشاق» ستيپەندياسىنىڭ قارجىسىن تەك قاجەتتىلىككە جۇمساۋ مىندەتتەلگەن؛
- پوليسياعا بەرىلگەن ارىزداردىڭ جالعان ەكەنى مويىندالۋى ءتيىس بولعان.
«مەندە باسقا تاڭداۋ بولعان جوق. اكەمدى بوساتۋ ءۇشىن قول قويۋعا ءماجبۇر بولدىم»، - دەيدى ءمولدىر.
كەيىن بۇل ءىس مەدياتيۆتىك كەلىسىم ارقىلى جابىلعانىمەن، ارادا ۋاقىت ءوتىپ، قارت ەر ادام قايتادان قاماۋعا الىنعان.
ءىس قايتا قوزعالىپ، 7 جىلعا سوتتالدى
2024 جىلدىڭ ساۋىرىندە، ءمولدىر قابىلوۆانىڭ جاريا مالىمدەمەسىنەن كەيىن التى اي وتكەن سوڭ، ءىس قايتا جاندانىپ، ونىڭ اكەسى «اسا ءىرى كولەمدە بوپسالاۋ» بابى بويىنشا 7 جىلعا سوتتالعان.
دينارا سمايلوۆا ىستەگى ءبىرقاتار زاڭبۇزۋشىلىقتارعا نازار اۋداردى. ونىڭ ايتۋىنشا:
- بۇرىن توقتاتىلعان ءىس زاڭدى نەگىزسىز قايتا قوزعالعان؛
- ءىستى جاپقان پروكۋرور كەيىن ءوزى سول شەشىمدى جويعان؛
- ءىس ماتەريالدارىندا «جابىرلەنۋشى تاراپتىڭ شاعىمى» جوق؛
- بوپسالاۋ سوماسى مەن ۆاليۋتاسى كۋالىكتەردە ءارتۇرلى كورسەتىلگەن؛
- ءتىنتۋ زاڭسىز دەپ تانىلسا دا، ونىڭ ناتيجەلەرى دالەل رەتىندە پايدالانىلعان.
«ءۇشىنشى تۇلعالار» - ءوز بالالارى
قور جەتەكشىسى ەرەكشە نازار اۋداراتىن جايت رەتىندە «ءۇشىنشى تۇلعالار» ۇعىمىن اتادى. ونىڭ سوزىنشە، تەرگەۋ مەن سوت قايىن اتانىڭ اقشانى ءۇشىنشى ادامدار ءۇشىن تالاپ ەتكەنىن كورسەتكەن. ال ءىس جۇزىندە بۇل - ايىپتاۋشى تاراپتىڭ ءوز كامەلەتكە تولماعان بالالارى بولعان.
«ول قىزىن جانە نەمەرەلەرىن قورعادى»
ءقازىر ءمولدىر قابىلوۆانىڭ اكەسى جازاسىن وتەپ جاتقانىنا ەكى جىل بولعان. دينارا سمايلوۆانىڭ ايتۋىنشا، ول ءوز ارەكەتىنە وكىنبەيدى.
«ول قىزىن جانە نەمەرەلەرىن قورعادى. مۇمكىن، اشۋعا بەرىلگەن شىعار. ءبىراق ءدال سول ادامنىڭ كەسىرىنەن بالالار داعدارىس ورتالىعىندا ءومىر ءسۇردى»، - دەيدى بەلسەندى.
ءىس ەندى جوعارعى سوتتا قارالماق. الايدا سمايلوۆا كۇشتەردىڭ تەڭ ەمەس ەكەنىن جاسىرمايدى. ونىڭ ايتۋىنشا، بۇل ىستەگى جابىرلەنۋشى تاراپ - ەل پرەمەر-مينيسترى ولجاس بەكتەنوۆتىڭ جاقىن تۋىسى.
سوعان قاراماستان، «نەمولچي» قورى ءادىل تەرگەۋ ءۇشىن كۇرەستى توقتاتپايتىنىن مالىمدەدى.
«جوعارعى سوت بۇل زاڭبۇزۋشىلىقتاردى كورە مە، الدە جوق پا - بەلگىسىز. ءبىراق ءبىز سوڭىنا دەيىن بارامىز»، - دەپ تۇيىندەدى دينارا سمايلوۆا.
