سوزىمىزگە دالەل، كۇنى كەشە پاۆلودار وڭىرىندە «رۋحاني جاڭعىرۋ» باعدارلاماسى اياسىندا ايگىلى «قورلان» ءانىنىڭ اۆتورى ەستاي بەركىمباي ۇلىنىڭ ەسكەرتكىشى تۇرعىزىلاتىنى بەلگىلى بولدى.
ەسكەرتكىش قالانىڭ قاق ورتاسىندا ەستايدىڭ اتىمەن اتالاتىن مادەنيەت سارايىنىڭ الدىندا بوي كوتەرمەك.
وسى ماسەلە وبلىس اكىمىنىڭ ورىنباسارى اسحات ورالوۆتىڭ قاتىسۋىمەن وتكەن «رۋحاني جاڭعىرۋ» باعدارلاماسى جونىندەگى ساراپتاۋ كەڭەسىنىڭ كەزەكتى وتىرىسىندا ءسوز بولدى.
جيىن بارىسىندا وبلىستاعى قالا مەن اۋدان وكىلدەرى ءوز جوبالارىمەن تانىستىردى. وبلىس اكىمىنىڭ ورىنباسارى بۇل ماسەلەدە ساننىڭ ەمەس، ساپانىڭ ماڭىزدى ەكەندىگىن ەسكەرتىپ ءوتتى.
- سوڭعى جىلدارى كوپتەگەن يگى جوبالار ىسكە اسىرىلدى، – دەدى اسحات ورالوۆ. – الايدا بىزدەرگە جوبالاردىڭ سانى ەمەس، ساپاسى قاجەت. وبلىس، رەسپۋبليكا حالقى ۇلگى ەتەتىن ەرەكشە جوبالار كۇتەمىز. پاۆلوداردىڭ وزگە وبلىستارعا ۇلگى بولارلىقتاي الەۋەتى بار.
ءوز كەزەگىندە پاۆلودار اكىمىنىڭ ورىنباسارى سايان مۇقانوۆ «رۋحاني جاڭعىرۋ» باعدارلاماسى شەڭبەرىندە بيىلعى جىلى پاۆلودار قالاسىندا جۇزەگە اسىرىلاتىن جوبالاردى تىزبەلەپ ءوتتى. ماسەلەن، بيىلعى جىلى ايگىلى ءانشى، سازگەر ەستاي بەركىمبايەۆ ەسكەرتكىشى مەن مۋزەيى اشىلماق. ىلگەرىدە ايتىپ كەتكەنىمىزدەي، ەڭسەلى ەسكەرتكىش ەستاي اتىنداعى مادەنيەت سارايىنىڭ ماڭىندا بوي كوتەرسە، مۋزەي بولسا، ساراي ىشىندە اشىلادى.
جوبا قۇنى 35 ميلليون تەڭگە. ونى جۇزەگە اسىرۋ دەمەۋشىلەر تاراپىنان قارجىلاندىرىلماق.
قازاق رۋحاني-مادەني ومىرىندە وشپەس ءىس قالدىرعان قايراتكەرلەردى ۇلىقتاۋ جۇمىستارى مۇنىمەن شەكتەلمەك ەمەس.
بيىلعى جىلى ەكىباستۇز قالاسىندا قازاقتىڭ تاعى ءبىر تارلانبوزى، اتى اڭىزعا اينالعان باۋىرجان مومىش ۇلىنىڭ مونۋمەنتى بوي كوتەرەدى. مونۋمەنت بيىلعى جىلدىڭ اياعىنا دەيىن قالاداعى ورتالىق كوشەلەردىڭ بىرىندە مەن مۇندالاپ تۇراتىن بولادى.
قالالىق ىشكى ساياسات ءبولىمىنىڭ باسشىسى زينايدا مۇحامەتجانوۆانىڭ ايتۋىنشا، بۇل ءۇشىن سترويتەلنايا كوشەسى اسكەرباسىنىڭ اتىنا اۋىستىرىلدى. كەنشىلەر قالاسىندا جۇزەگە اسىرىلاتىن تاعى ءبىر تىڭ جوبا – سابيلەر اللەياسى.
وعان سايكەس، ەكىباستۇزدا تۋعان ءاربىر نارەستەنىڭ قۇرمەتىنە اتا-اناسى بەلگىلەنگەن جەرگە ءبىر ءتۇپ اعاش وتىرعىزادى.
ماي اۋدانى بولسا، «رۋحاني جاڭعىرۋ» اياسىندا «الما باعى» جوباسىن ۇسىندى. ول بويىنشا اۋدان ورتالىعىندا تامشىلاپ سۋارۋ تاسىلىمەن الما اعاشىن ەگىپ، ءونىم الىپ، جاستاردى ەڭبەككە باۋلۋ كوزدەلىپ وتىر.
