“ەگەۋقۇيرىق قاپتاپ كەتكەن”. شىمكەنتتە ەت قويماسى ادام شوشىرلىق جاعدايدا جۇمىس ىستەپ كەلگەن

قاراكوز امانتاي 23 اقپ. 2024 14:02 3256

شىمكەنتتە بىرنەشە قويمادا ءىرى قارا مال باسىنىڭ زاڭسىز ساتىلىپ جاتقانى تۋرالى شاعىمنان كەيىن پروكۋراتۋرا مەن ۆەتەرينارلىق باقىلاۋ قىزمەتكەرلەرى رەيدكە شىقتى، دەپ حابارلايدى Dalanews.kz.

وتىرار تەلەارناسى وبلىستىق ۆەتەريناريالىق باقىلاۋ ينسپەكسياسى كوميتەتىنىڭ قىزمەتكەرلەرى زاڭسىز ەت ساتاتىن كاسىپكەرلەرگە قارسى رەيد جۇرگىزگەنىن مالىمدەدى. شىمكەنت تۇرعىندارى ايماۋىتوۆ كوشەسىندەگى قويمالارعا ولگەن مالدىڭ ولەكسەلەرى اكەلىنىپ جاتقانىن ايتىپ، ماماندارعا شاعىمدانعان.

اتالمىش قويماعا كەلگەن ۆەتەرينارلىق باقىلاۋ قىزمەتكەرلەرى ىشكە ۋچاسكەلىك پوليسيا قىزمەتكەرلەرىمەن عانا كىرە العان. سانيتارلىق ەرەجەلەردىڭ ساقتالماۋى فاكتىسى انىقتالدى. لاس ۇستەلدە انتيسانيتاريالىق جاعدايدا ەتتىڭ ساقتالعانى بەلگىلى بولدى. وعان قوسا قويمادا ەگەۋقۇيرىق قاپتاپ كەتكەن.

كۋاگەرلەردىڭ ايتۋىنشا، ەت ونىمدەرى قوعامدىق تاماقتاندىرۋ ورىندارىنا جىبەرىلەدى. ساتۋشىلار ەت ساتاتىن ارنايى قۇجات ۇسىنا المادى. مامانداردىڭ ايتۋىنشا، مال سويۋ پۋنكتتەرى زاڭدى قۇجاتتارمەن جۇمىس ىستەۋگە مىندەتتى. سونىمەن قاتار، مۇنداي ورىنداردا كۇن سايىن تازالىق جانە دەزينفەكسيا جۇرگىزىلىپ، ءتىپتى قابىرعالار دا ارنايى ماتەريالدان جاسالۋى كەرەك.

رەيد پروكۋراتۋرا جانە پوليسيا قىزمەتكەرلەرىمەن بىرلەسىپ ۇيىمداستىرىلدى. پروكۋراتۋرانىڭ مالىمەتىنشە، بۇل ەت قويماسىن ءتورت ءتۇرلى كاسىپكەر باسقارعان.

ءارقايسىسىنا 20 اەك كولەمىندە ايىپپۇل سالىندى، بۇل شامامەن 74 مىڭ تەڭگە. تاركىلەنگەن ەت جويىلىپ، قويمالار جابىلادى.


ۇسىنىلعان
سوڭعى جاڭالىقتار
x