Shymkentte birneshe qoimada iri qara mal basynyń zańsyz satylyp jatqany týraly shaǵymnan keiin prokýratýra men veterinarlyq baqylaý qyzmetkerleri reidke shyqty, dep habarlaidy Dalanews.kz.
Otyrar telearnasy oblystyq veterinariialyq baqylaý inspektsiiasy komitetiniń qyzmetkerleri zańsyz et satatyn kásipkerlerge qarsy reid júrgizgenin málimdedi. Shymkent turǵyndary Aimaýytov kóshesindegi qoimalarǵa ólgen maldyń ólekseleri ákelinip jatqanyn aityp, mamandarǵa shaǵymdanǵan.
Atalmysh qoimaǵa kelgen veterinarlyq baqylaý qyzmetkerleri ishke ýchaskelik politsiia qyzmetkerlerimen ǵana kire alǵan. Sanitarlyq erejelerdiń saqtalmaýy faktisi anyqtaldy. Las ústelde antisanitariialyq jaǵdaida ettiń saqtalǵany belgili boldy. Oǵan qosa qoimada egeýquiryq qaptap ketken.
Kýágerlerdiń aitýynsha, et ónimderi qoǵamdyq tamaqtandyrý oryndaryna jiberiledi. Satýshylar et satatyn arnaiy qujat usyna almady. Mamandardyń aitýynsha, mal soiý pýnktteri zańdy qujattarmen jumys isteýge mindetti. Sonymen qatar, mundai oryndarda kún saiyn tazalyq jáne dezinfektsiia júrgizilip, tipti qabyrǵalar da arnaiy materialdan jasalýy kerek.
Reid prokýratýra jáne politsiia qyzmetkerlerimen birlesip uiymdastyryldy. Prokýratýranyń málimetinshe, bul et qoimasyn tórt túrli kásipker basqarǵan.
Árqaisysyna 20 AEK kóleminde aiyppul salyndy, bul shamamen 74 myń teńge. Tárkilengen et joiylyp, qoimalar jabylady.
