«نەمولچي.kz» قورىنىڭ جەتەكشىسى دينارا سمايىلوۆانىڭ (دينا ءتاڭسارى) چەرنوگوريادا ۇستالۋىنا بايلانىستى باس پروكۋراتۋرا مالىمدەمە جاسادى، دەپ حابارلايدى Dalanews.kz.

تەرگەۋ ورگاندارىنىڭ مالىمەتىنشە، دينارا سمايىلوۆاعا قارسى التى بىردەي قىلمىستىق ءىس قوزعالعان. ول الاياقتىق، جەكە ومىرگە قولسۇعۋشىلىق جانە جالعان اقپارات تاراتۋ باپتارى بويىنشا كۇدىككە ءىلىندى.

2023 جىلعى ساۋىردە ءتاڭسارى الەۋمەتتىك جەلىدە وسكەمەندە ءبىر قىزدىڭ وز-وزىنە قول سالعانى جونىندە جالعان اقپارات تاراتقان.

ارتىنشا ول قايعىرىپ كوڭىل ايتۋ جازبالارىن جاريالاپ، زارداپ شەككەن تاراپقا ادۆوكات جالداۋعا دەپ حالىقتان قاراجات جيناي باستاعان.

ناتيجەسىندە، سوت پروسەسى كەزىندە 20 ميلليون تەڭگەدەن استام قارجى جينالعان. الايدا سوتتا بەلگىلى بولعانداي، ادۆوكاتتى قىزدىڭ وتباسى ءوزى جالداعان، ال جينالعان قاراجاتتىڭ ءىستى قورعاۋعا جۇمسالماعانى انىقتالعان.

تاعى ءبىر جاعدايدا، ءتاڭسارى كامەلەتكە تولماعان زورلىق قۇربانىنا كومەك رەتىندە بىرنەشە ميلليون تەڭگە جيناعان. ءبىراق تەرگەۋ مالىمەتىنە سايكەس، بۇل وقيعا تولىعىمەن ويدان شىعارىلعان، ال قارجى قور شوتىنا ەمەس، ونىڭ كۇيەۋىنىڭ جەكە كارتاسىنا اۋدارىلعان.

سونىمەن قاتار، ءتاڭسارى شەتەلدە ءجۇرىپ، جەكە قاجەتتىلىكتەرى ءۇشىن قايىرىمدىلىق جيناۋدى جالعاستىرعانى بەلگىلى بولدى.

كەم دەگەندە جەتى ادام پوليسياعا شاعىم ءتۇسىرىپ، الاياقتىقتىڭ قۇربانى بولعاندارىن مالىمدەگەن.

سىرتتاي تاعايىندالعان جازا

سوت دينا ءتاڭسارىنى اسا ءىرى كولەمدە الاياقتىق جاسادى دەپ سىرتتاي كۇدىكتى دەپ تانىدى جانە قاماۋعا الۋ تۇرىندەگى بۇلتارتپاۋ شاراسىن بەكىتتى.

باس پروكۋراتۋرانىڭ رەسمي مالىمدەمەسى

قازاقستان ءىىم ينتەرپولى سمايىلوۆانىڭ چەرنوگوريادا جۇرگەنىن انىقتاعان، سول سەبەپتى باس پروكۋراتۋرا ونىڭ ەكستراديسياسى بويىنشا سۇراۋ جولداعان.

«بۇگىندە قازاقستان مەن چەرنوگوريا اراسىندا ەكستراديسيا تۋرالى حالىقارالىق كەلىسىم جوق. وسى سەبەپتى اتالعان شەتەلدىك مەملەكەت سمايىلوۆانى بەرۋدەن باس تارتتى.

قابىلدانعان سوت شەشىمىنە قاراماستان، قازاقستاننىڭ قۇقىق قورعاۋ ورگاندارى ونى قىلمىستىق جاۋاپكەرشىلىككە تارتۋ بويىنشا جۇمىستى جالعاستىرادى»، – دەلىنگەن باس پروكۋراتۋرا تاراتقان حابارلامادا.