تۇركىستان وبلىسىندا ءتۇرلى باعىتتا جۇمىس جاسايتىن 738 ۇكىمەتتىك ەمەس ۇيىمدار تىركەلگەن. الايدا، ونىڭ بەلسەندى جۇمىس اتقارىپ وتىرعاندارى 200 — دەي عانا. قوعامدىق بىرلەستىكتەر جەرگىلىكتى بيلىك وكىلدەرىنىڭ جانە شەتەلدىك دامۋ اگەنتتىكتەرى ارقىلى قارجىلاندىرىلادى. ماسەلەن، بيىل وبلىستىق بيۋدجەتتەن 838 ملن. تەڭگە قارجى بولىنگەن.
تۇركىستان وبلىسىنىڭ اكىمى جانسەيىت تۇيمەبايەۆتىڭ ايتىپ وتكەنىندەي ۇەۇ-لارعا 2008 جىلى 6 — اق ملن. تەڭگە بولىنسە، بيىل ول قارجى 144 ەسە كوپ بەرىلىپ وتىر.
"وعان دا شۇكىر. ەندى بۇل جۇمىس ارى قاراي دا جىلجي بەرەدى. تەك، ۇكىمەتتىك ەمەس ۇيىمداردىڭ عانا ەمەس، مەسەناتتاردىڭ، ءتۇرلى باسقا دا كاسىپكەر ازاماتتاردىڭ بەرۋى ارقىلى دا بۇل جۇمىس جاندانىپ وتىر"، – دەدى بۇل ورايدا ءوڭىر باسشىسى.
سونداي — اق، جاقىندا ازاماتتىق قوعام قالىپتاستىرۋعا ارنالعان تۇجىرىمداما جۇزەگە اسۋى مۇمكىن. جيىنعا كەلگەن ساياساتتانۋشىلار جاڭا جوبانىڭ ۇتىمدى تۇستارىنا توقتالدى.
ءوز كەزەگىندە تانىمال ساياساتتانۋشى دوس كوشىم وسىناۋ ازاماتتىق فورۋمنىڭ باسقا يگى باستامالارعا جول اشارىنا سەنىم ءبىلدىردى.
«ازاماتتىق قوعامنىڭ جاڭا كونسەپسياسى جاسالىپ، ازاماتتىق قوعامدى العاشقى ورىنعا قويۋ باستالدى. دەموكراتيالى مەملەكەتتىڭ نەگىزى ازاماتتىق قوعامدا ونىڭ پرينسيپتەرىن ءبىز ءبىلۋىمىز كەرەك. ازاماتتىق قوعامىنىڭ نە ەكەنىن جاقسىلاپ ءتۇسىنۋىمىز كەرەك. سول ۋاقىتتا قوعام جاڭا ءبىر دەڭگەيگە كوتەرىلە مە دەپ ويلايمىن»، – دەدى ول.
ازاماتتىق فورۋمدا ءتۇرلى بىرلەستىكتەردىڭ الەۋمەتتىك يدەيالار مەن جوبالار جارمەڭكەسى دە ۇيىمداستىرىلدى. جيىن سوڭىندا ءتورت بىرلەستىكتىڭ جۇلدەگەرلەرى ماراپاتتالىپ، قوماقتى قارجى تابىس ەتىلدى.
