– حالىق نە دەسە، سول دەسىن: قازاق قوعامى قالاي، ايتىس تا سونداي. ءبىزدىڭ قوعامدا ءقازىر نەشە ءتۇرلى ءدىني سەكتالار جۇمىس ىستەپ جاتىر. ولار ماڭايىن ءۇيىرىپ اكەتەدى. اسىرەسە، ساناسى قاتايماعان جاستار سوڭىنا تەز ءتۇسىپ كەتىپ جاتادى. شولاق بالاق شالبار كيگەندەر، ساقال قويعاندار دەگەندەي.
الەمدە يسلام ءدىنىنىڭ 73 ءتۇرلى اعىمى بار ەكەن. قازاقستاندا دا ءبىراز اعىمى بار سونىڭ. سولار ايتىسقا قالاي اسەر ەتپەسىن؟
قازاقستاندا ايتىسىپ جۇرگەن 300-دەي اقىندى بىلەمىز. سونىڭ ىشىندە ءارتۇرلى اعىمداعىلارى بار.
ءتىپتى كورنەكتى اقىندارىمىزدىڭ سول جولعا ءتۇسىپ كەتۋىنە سەبەپكەر بولعان بەلدى-بەلدى، مۇمكىندىگى بار ازاماتتارىمىز دا بارشىلىق.
سولاردىڭ كەسىرىنەن، دومبىرا حارام دەيتىن اقىندارىمىز شىقتى. ايتىسقا سولاردىڭ كەسىرى ءتيدى. ولاردى ايتىستان شەتتەتتىك. ويتكەنى، ءبىز ايتىستى ءدىني ساياساتتىڭ قولجاۋلىعى ەتە المايمىز. ءسويتىپ، ءقازىر وزدەرىنىڭ دۇرىس جولعا تۇسپەگەندەرىن سەزگەندەر ولەڭگە قايتىپ كەلىپ جاتىر.
سوڭعى ءبىر ايدىڭ ىشىندە ايتىستان شەتتەپ جۇرگەن بالعىنبەك يماشيەۆ، جانداربەك بۇلعاقوۆ، سىرىم اۋەزحان سياقتى اقىندارىمىز ءوزىنىڭ وداعىنا قايتىپ كەلىپ، «ءبىز جازدىق، جاڭىلدىق. ءبىزدى ايتىسقا شىعار» دەپ وتىر. ءبىز ولاردى وداققا قوسىپ جاتىرمىز.
مىنە، وسىنداي ۋاقىتشا جىكتەلۋ بولدى. «ونداي بولعان جوق» دەپ جاۋىردى جابا توقي المايمىن. ءبىراق «اداسقاننىڭ ايىبى جوق، قايتىپ ءۇيىرىن تاپقان سوڭ» دەگەن عوي.
بيىل سول اقىندار ۇلكەن ايتىستارعا قاتىسادى. اقىننىڭ ءسوزى – قۇدايدىڭ سىيى، حالىقتىڭ قازىناسى. ونداي تالانتتى اعىم مەن يزىمدەردىڭ جەتەگىنە جىبەرۋگە بولمايدى. ءبىز سول ءۇشىن كۇرەستىك. وڭ ناتيجەسىن بەرىپ جاتىر.
ساۋالداسقان، جاراس كەمەلجان
