ۇلتتىق بانكتىڭ تاڭەرتەڭ عانا بەكىتكەن رەسمي باعامى 527،58 تەڭگە بولعان 1 اقش دوللارى بۇگىنگى KASE بيرجاسىندا ساۋدا-ساتتىقتا، ياعني ءدال ءقازىر 519 تەڭگەگە دەيىن السىرەدى ءارى بۇل تومەندەۋ ءالى دە جالعاسىن تاباتىن سەكىلدى، دەپ جازادى Dalanews.kz.
سوڭعى كەزدەرى السىرەۋمەن بولعان ۇلتتىق ۆاليۋتاعا كۇش بەرگەن نە نارسە؟ مۇنىڭ ءمانىسىن Tengenomika Telegram ارناسىنىڭ اۆتورى عالىمجان ايتقازين بىلاي تۇسىندىرەدى:
"اقش دوللارىنىڭ ايىرباس باعامىندا كەشە نىعايعان ءرۋبلدىڭ ءىزىن تەڭگە دە باسىپ، ۋاقىت ساناپ كۇش الا باستادى. رەسەي ءرۋبلىنىڭ كەشەگى نىعايۋى، ەڭ الدىمەن، مىنانداي فاكتورلارمەن بايلانىستى:
- ترامپتىڭ قىزمەتىنە كىرىسۋى (العاشقى جارلىقتاردا رەسەي فەدەراسياسى قامتىلمادى)؛
- ۋكراينا بويىنشا الداعى كەلىسسوزدەر اياسىندا گەوساياسي سىني قاۋىپ-قاتەرلەردىڭ تومەندەۋى؛
- رەسەي فەدەراسياسى ورتالىق بانكىنىڭ بيۋدجەتتىك ەرەجە بويىنشا 15 قاڭتاردان 6 اقپانعا دەيىن نارىقتاعى ۆاليۋتا ۇسىنىسىن ۇلعايتۋ تۋرالى شەشىمى؛
- سالىق كەزەڭى: ەكسپورتتاۋشىلار سالىقتى رۋبلمەن تولەۋ ءۇشىن ۆاليۋتالار ساتا باستايدى؛
- ماۋسىمدىق سيپات، ياعني جىل باسىندا يمپورتتاۋشىلار تاراپىنان شەتەل ۆاليۋتاسىنا دەگەن سۇرانىس ءداستۇرلى تۇردە تومەن بولادى؛
- سانكسيالارعا قاراماستان جەلتوقسانداعى رەسەي بيۋدجەتىنىڭ رەكوردتىق كىرىستەرى، اسىرەسە مۇناي-گاز سەكتورىنان بولەك كىرىستەر".
"وسىلايشا، تەڭگەنىڭ رۋبلمەن قاتار سينحروندى تۇردەگى قۇبىلىسى KASE بيرجاسىنداعى نارىق قاتىسۋشىلارىنىڭ باعدارىن كەزەكتى رەت راستايدى. بۇل اسەر، ءبىز بىرنەشە رەت بايقاعانىمىزداي، ءبىر ساۋدا كۇنىندە بولادى. ءبىر قىزىعى، سوڭعى كۇندەرى مۇناي باعامى ءبىرشاما تومەندەدى، ال ونىڭ تەڭگە باعامىنا اسەرىن بايقاپ وتىرعان جوقپىز. دەمەك، تەڭگەدەگى وزگەرىس رەسەيلىك رۋبلگە جالتاقتاعان كۇيدە بولىپ جاتقانى ايقىنى، ال بۇل جاقسى ما، جوق پا، ول جاعىن بىلمەدىك" دەپ جازادى ساراپشى.
ايتا كەتسەك، 2025 جىلى 6 قاڭتاردا ۇلتتىق بانك تەڭگەنىڭ السىرەۋىنە نە تۇرتكى ەكەنىن ايتقان بولاتىن. ءوز سوزىندە ق ر ۇلتتىق بانك ءتوراعاسىنىڭ ورىنباسارى ءاليا مولدابەكوۆا: "...قازىرگى جاعدايداعى رەسەي ءرۋبلىنىڭ ديناميكاسى باعدار بولماۋعا ءتيىس جانە ول نارىقتىڭ شامادان تىس رەاكسياسىنا ىقپال ەتۋى مۇمكىن. ال بۇل جەرگىلىكتى نارىقتا باعامنىڭ قالىپتاسۋىن بۇرمالاپ، ارتىق قۇبىلمالىلىققا اكەلەدى. قازىرگى ۋاقىتتا ءبىزدىڭ ەلدەرىمىزدىڭ نارىقتارى ءارتۇرلى جاعدايدا جۇمىس ىستەيتىنى انىق. سوندىقتان وسى جاعدايلاردا رەسەي ءرۋبلىنىڭ اقش دوللارىنا قاتىستى كۇرت اۋىتقۋى تەڭگە/دوللار ايىرباستاۋ باعامىندا كورىنبەۋى كەرەك، ويتكەنى ول ىرگەلى ەكونوميكالىق شىندىققا سايكەس كەلمەيدى"، دەگەن ەدى.
