قازاقستان كينوتەاترلارىندا DISNEY كومپانياسىنىڭ ءۇش بىردەي تۋىندىسى: Disney جانە Pixar ستۋديالارىنىڭ «ويجۇمباق 2» انيماسيالىق ءفيلمى، Disney كومپانياسىنىڭ «موانا 2» شىتىرمان وقيعاسى مەن «مۋفاسا: ارىستان پاتشا» كوركەم ءفيلمى قازاق تىلىندە كورسەتىلەدى. بۇل ءسۇيىنشى جاڭالىقتى حالىقارالىق «قازاق ءتىلى» قوعامى til.kz رەسمي سايتىندا جاريالادى.
فيلمدەردى ءتۇرلى ەلدەرگە بەيىمدەپ، دۋبلياجداۋ – Disney كومپانياسىندا بۇرىننان قالىپتاسقان ءۇردىس. Disney جىل سايىن ءار ءفيلمنىڭ ءتۇرلى تىلدەردەگى 30-عا جۋىق نۇسقاسىن دايىندايدى. قازاق ءتىلىنىڭ وسىنداي ءىرى تىلدەر قاتارىنا قوسىلۋى، سۇيىكتى فيلمدەردەگى وزىمىزگە جاقسى تانىس كەيىپكەرلەردىڭ بىزبەن بىرگە ءبىر تىلدە سويلەۋى – وتە ماڭىزدى قادام. وسى تۇرعىدا حالىقارالىق «قازاق ءتىلى» قوعامىنىڭ نەگىزگى جۇمىس باعىتى Disney كومپانياسىنىڭ ۇستانىمەن ۇندەس كەلەدى. «قازاق ءتىلى» قوعامى مەملەكەتتىك تىلدەگى كونتەنت قورىن، اتاپ ايتقاندا، بالا ءتىلىن قازاقشا شىعارۋعا قاجەت قۇرالداردان باستاپ، ءار ادامنىڭ قازاق ءتىلى اياسىندا تۇلعا ءارى مامان بولىپ قالىپتاسۋىنا كەرەك مازمۇن قورىن ارتتىرۋعا باسىمدىق بەرەدى. الەمدىك انيماسيا جاۋھارلارى، قازاق تىلىندەگى كينوپروكات باعىتىنداعى كونتەنتتىڭ قازاق تىلىنە اۋدارۋ باستاماسىن قولدايدى. بۇل جولى “قازاق ءتىلى” قوعامى Disney كومانداسىمەن بىرلەسە اتالعان فيلمدەردى قازاقستاندىق كورەرمەندەرگە كەڭىنەن ناسيحاتتاۋ جانە تاراتۋعا اتسالىسادى.
«فيلمدەردى ءارتۇرلى ەلدەرگە بەيىمدەپ، دۋبلياجداۋ – Disney كومپانياسىنداعى كونتەنت ازىرلەۋ جۇمىسىنىڭ اجىراماس بولىگى ءارى بۇرىننان قالىپتاسقان ءۇردىسى. سول سەبەپتى Disney Character Voices International ۇجىمى ءار ءفيلمنىڭ ءتۇرلى تىلدەرگە اۋدارىلعان 30-عا جۋىق نۇسقاسىن ازىرلەيدى. وسى نۇسقالاردىڭ ءارقايسىسىنداعى كەيىپكەرلەردىڭ بىرەگەي بەينەسىن ساقتاي وتىرىپ، ونى كورەرمەندەرگە «جاقىن» ءارى تۇسىنىكتى ەتىپ اۋداراتىن، دۋبلياجدايتىن دارىندى شىعارماشىلىق كەڭەسشىلەر مەن تەحنيكالىق ماماندار توبى جۇمىلدىرىلادى، – دەيدى ورتالىق جانە شىعىس ەۋروپا، تمد ەلدەرى، گرۋزيا جانە موڭعولياداعى Disney كومپانياسىنىڭ باس ديرەكتورى كاحابەر اباشيدزە.
«قازاقستاندىق كورەرمەن مەملەكەتتىك تىلدە كورسەتىلەتىن Disney پرەمەرالارىن قاشاندا ەرەكشە ىقىلاسپەن قارسى الادى. بۇل ءداستۇر 2024 جىلى دا جالعاسىن تاپپاق. ۇلكەن ەكرانداردان قازاق تىلىندە كورسەتىلگەن «موانا»، «كولىكتەر 3»، «كوكونىڭ قۇپياسى» جانە «ارىستان پاتشا» (2019) فيلمدەرىنىڭ قاتارى جاڭا تۋىندىلارمەن تولىقپاق. قازاق تىلىندە ەركىن سويلەيتىندەر دە، ءتىلدى ەندى ۇيرەنىپ جۇرگەندەر دە ساپالى دۋبلياجدالعان فيلمدەردى تاماشالاۋدان ءلاززات الارى cءوزسىز»، – دەپ پىكىر ءبىلدىردى قازاقستان اۋماعىنداعى Disney فيلمدەرىنىڭ رەسمي ديستريبيۋتورى، «مەلومان» كومپانياسىنىڭ باس ديرەكتورى ۆاديم گولەنكو.
14 ماۋسىمنان باستاپ كينوتەاترلاردا Disney مەن Pixar كومانداسى تۇسىرگەن تانىمال انيماسيالىق تۋىندىنىڭ كوپتەن كۇتكەن جالعاسى – «ويجۇمباق 2» كورسەتىلەدى. مۇندا كورەرمەن بوي جەتىپ قالعان رايليمەن قايتا قاۋىشادى. كەيىپكەردىڭ ساناسىندا كۇتپەگەن جەردەن پايدا بولعان جاڭا ەموسيالارعا ورىن بوساتۋ ءۇشىن باس بولىمىندە كۇردەلى جوندەۋ جۇمىستارى باستالادى...
ءفيلمنىڭ پوستەرى مەن العاشقى كادرلارىن مىنا سىلتەمە ارقىلى جۇكتەپ الۋعا بولادى: https://we.tl/t-1cZWuC0Zoe
ال كوپتەن كۇتكەن ەكىنشى رەليز – Disney كومپانياسىنىڭ «موانا 2» انيماسيالىق شىتىرمان وقيعاسىن قاراشا ايىنان باستاپ تاماشالاي الامىز. فيلم رەجيسسەرى – كىشى دەيۆ دەرريك، مۋزىكا اۆتورى – «گرەممي» سىيلىعىنىڭ جۇلدەگەرلەرى ەبيگەيل بارلوۋ مەن ەميلي بەار، «گرەممي» نومينانتى وپەتاييا فوايا مەن ءۇش دۇركىن «گرەممي» جۇلدەسىنىڭ يەگەرى مارك مانچينا.
ءفيلمنىڭ العاشقى كادرى مىنا سىلتەمەدە: https://we.tl/t-RhJRr7Y8jD
تيزەرىن مىنا سىلتەمە ارقىلى كورۋىڭىزگە بولادى: https://youtu.be/KB1VDoeLZ2k؟si=cGT6xQyRaSVuWNU0
قازاق تىلىندە كورسەتىلەتىن ءۇشىنشى تۋىندى – Disney كومپانياسىنىڭ «مۋفاسا: ارىستان پاتشا» كوركەم ءفيلمى. 2019 جىلعى «ارىستان پاتشا» فيلمىندە قولدانىلعان زاماناۋي تەحنولوگيالاردىڭ كومەگىمەن تۇسىرىلگەن بۇل كارتينا مۋفاسانىڭ بالالىق جانە جاستىق شاعىن، باۋىرى شراممەن اراداعى وشپەندىلىكتىڭ تۇپكى تاريحىن باياندايدى. فيلم رەجيسسەرى – بارري دجەنكينس («اي ساۋلەسى»)، سەنارييىن دجەفف ناتانسون («تەرمينال») جازعان.
ۇسىنىلعان فيلمدەردىڭ قازاق تىلىندەگى دۋبلياجى قازاقستاندىق Movie Dalen ستۋدياسىندا جاسالدى.
فيلم جايلى ماقالا نە وزگە دە ماتەريال جاريالايتىن بولساڭىز، بىزگە الدىن-الا ەسكەرتىپ، حابارلاسۋىڭىزدى سۇرايمىز.
