كورنەكتى عالىم، مەملەكەت قايراتكەرى دىنمۇحامەد قونايەۆتىڭ كەنجە قارىنداسى راۋزا مينلياحمەد قىزى قونايەۆا دۇنيەدەن ءوتتى، دەپ حابارلايدى Dalanews.kz.
قارالى حاباردى د.ا. قونايەۆ اتىنداعى حالىقارالىق قور جاريالاپ، مارقۇمنىڭ تۋعان-تۋىستارىنا كوڭىل ايتتى.
قور مالىمەتىنشە، راۋزا قونايەۆا 1934 جىلعى 10 ساۋىردە الماتى وبلىسىنىڭ شەلەك اۋىلىندا دۇنيەگە كەلگەن. ول مينلياحمەد پەن زاۋرە قونايەۆتاردىڭ 11-بالاسى، اۋلەتتەگى ەڭ كەنجەسى بولعان.
بالالىق شاعىن الماتىدا وتكىزىپ، قالاداعى №28، №10 جانە №36 مەكتەپتەرىندە ءبىلىم العان. 1952 جىلى ماسكەۋ مەملەكەتتىك ۋنيۆەرسيتەتىنىڭ بيولوگيا-توپىراقتانۋ فاكۋلتەتىنە وقۋعا ءتۇسىپ، ونى 1956 جىلى ءساتتى اياقتاعان.
1957 جىلدان 2016 جىلعا دەيىن قازاقستان عىلىم اكادەمياسى جۇيەسىندە قىزمەت ەتتى. وسى جىلدار ارالىعىندا بيوحيميا ينستيتۋتىندا، كەيىن مولەكۋلالىق بيولوگيا جانە بيوحيميا ينستيتۋتىندا ەڭبەك ەتتى. عىلىم سالاسىندا ۇزاق جىلدار بويى تاباندى جۇمىس ىستەپ، وتاندىق بيولوگيا عىلىمىنىڭ دامۋىنا ەلەۋلى ۇلەس قوستى.
راۋزا مينلياحمەد قىزى قونايەۆا – قازاقستان عىلىمىنداعى تۇتاس ءبىر ءداۋىردىڭ وكىلى، ۇلت زيالىلارى اۋلەتىنىڭ ابىرويىن اسقاقتاتقان تۇلعالاردىڭ ءبىرى رەتىندە ەستە قالادى.
