سەسسيانىڭ جۇمىسىن وبلىستىق ءماسليحات سەسسياسىنىڭ ءتوراعاسى دۋلات ءابىش جۇرگىزىپ وتىردى. سەسسيا جۇمىسىنا وبلىس اكىمى، قالا جانە اۋدان اكىمدەرى، اۋداندىق، وبلىستىق اۋماقتىق دەپارتامەنتتەر مەن باسقارمالاردىڭ، ۇيىمداردىڭ باسشىلارى مەن ب ا ق وكىلدەرى قاتىستى.
وبلىستىق ءماسليحات سەسسياسىنىڭ كۇن تارتىبىندە نەگىزگى 21 ماسەلە قارالدى. اتاپ ايتقاندا وبلىستىق جەر ينسپەكسياسى باسقارماسى باسشىسىنىڭ جەردىڭ پايدالانىلۋى مەن قورعالۋىن باقىلاۋ جونىندەگى ەسەبى، وبلىستىق ءماسليحات قىزمەتىن ۇيىمداستىرۋ، دەپۋتاتتاردىڭ ساۋالدارى مەن سايلاۋشىلاردىڭ وتىنىشتەرى بويىنشا اتقارىلعان جۇمىستار جانە وبلىستىق ءماسليحات اپپاراتىنىڭ قىزمەتى جونىندەگى ەسەبى تالقىعا ءتۇستى. سونداي-اق، وبلىس اكىمدىگىنىڭ جەرگىلىكتى مەملەكەتتىك-جەكەشەلىك ارىپتەستىك جوبالارىنىڭ ىسكە اسىرىلۋ بارىسى تۋرالى وبلىستىق ەكونوميكا جانە بيۋدجەتتى جوسپارلاۋ باسقارماسىنىڭ باسشىسى ارمان سابيتوۆ بايانداما جاسادى. باسقارما باسشىسى دەپۋتاتتاردان 21 جەرگىلىكتى مەملەكەتتىك-جەكەشەلىك ارىپتەستىك جوبالارىنىڭ تىزبەسىن بەكىتۋدى سۇرادى. ونىڭ ىشىندە 3 قۇرىلىس، 2 اۆتوموبيل جولدارى، 1 ەلەكترمەن قامتاماسىز ەتۋ نىساندارى بار. بۇگىندە اتالعان جوبالاردىڭ قۇجاتتامالارى تولىق ازىرلەنىپ، ءتيىستى ساراپتامادان وتكەن.
سەسسيا بارىسىندا ازاماتتاردىڭ جەكەلەگەن ساناتتارىنا امبۋلاتوريالىق ەمدەۋ كەزىندە تەگىن دارىلىك زاتتاردى قوسىمشا بەرۋ، رەسپۋبليكالىق ونوماستيكا كوميسسياسىنىڭ قاراۋىنا وڭتۇستىك قازاقستان وبلىسىنداعى تۇلكىباس اۋدانىنىڭ اتاۋىن قايتا اتاۋ جونىندەگى ۇسىنىسى ەنگىزىلدى.
«سوڭعى جىلدارى بۇل ماسەلە بىرنەشە رەت كوتەرىلدى. كەڭەس زامانىندا اۋداننىڭ تاريحي اتى بۇرمالانعانى تاريحشى عالىمدارعا دا بەلگىلى. سوندىقتان تۇلكىباسى اتاۋىن تۇركىباسى دەپ وزگەرتۋ تۋرالى ۇسىنىستى ءبىراۋىزدان قولدايمىن. اتالعان ماسەلە وبلىستىق اكىمدىك پەن وبلىستىق ءماسليحات ءتيىستى شەشىم شىعارىپ، وبلىستىق ونوماستيكالىق كوميسسيادا قارالدى. سوڭعى شەشىمدى رەسپۋبليكالىق ونوماستيكالىق كوميسسيا قابىلدايتىن بولادى»، - دەدى جانسەيىت تۇيمەبايەۆ.
وقو اكىمىنىڭ باسپا ءسوز قىزمەتى
