جاقىندا عانا پارلامەنت دەپۋتاتتارى البەرت راۋ مەن قاينار اباسوۆ قالالارداعى قۇمار ويىندارىنىڭ ايماقتارىنا جانە قۇمار ويىندارىنىڭ ۇيىمدارىنا سالىنعان تىيىمنىڭ كۇشىن جويۋدى كوزدەيتىن باستاما كوتەردى. الايدا بۇل جەردە ءبىر كىلتيپان بار. قازاقستان ماجىلىسمەندەرىنىڭ ۇسىنىسىنىڭ نەگىزگى تارماقتارىنىڭ ءبىرى رەسپۋبليكا قالالارىندا ورنالاسقان يپپودرومداردا ات سپورتى توتاليزاتورلارىن جانداندىرۋ بولىپ تابىلادى.
شەنەۋنىكتەردىڭ اۋقىمدى جوسپارلارى بويىنشا، ات سپورتىنا تىگىلەتىن ءباستى باسقا ۇتىس تۇرلەرىنەن ءبولىپ الۋ قاجەت. ياعني، بۇل ءىس جۇزىندە سپورت تۇرلەرى بويىنشا ويىنقۇمارلىق بيزنەسىن بولشەكتەۋ باستالدى دەگەن ءسوز. ەرتەڭ ءدال وسىلايشا بوكس، فۋتبول، ارالاس جەكپە-جەك سپورتى دا ءبولىنىپ شىعىپ، كومپيۋتەرلىك ويىنداردىڭ تۋرنيرلەرى بولەك بۇكىلعالامدىق ەسسىزدىكتىڭ الەمىنە اينالسا، تاڭ قالمايتىن شىعارمىز.
باستاما كوتەرۋشىلەردىڭ مۇنداي ۇسىنىستاردى قيسىنداۋداعى ويلارىنىڭ «جۇيرىكتىگىن» اتاپ وتپەۋگە بولماس. حالىقتىڭ قازىرگى، شىنايى پاتريوتتىق كوڭىل-كۇيدەگى احۋالىن ءوز پايدالارىنا بۇرا وتىرىپ، ات سپورتىنا ءباس تىگۋدى ۇسىنۋشىلار مۇنىڭ ءبارىن "ۇلتتىق داستۇرلەردى جاڭعىرتۋ، بايگەلەردىڭ بولاشاق چەمپيون سايگۇلىكتەرىن ءوسىرىپ-باپتاۋ" دەگەن جەلەۋمەن جالپىلداتۋدا. بالكىم، ءبىزدىڭ اتا-بابالارىمىزدىڭ قانىندا قۇمارلىق بولسا بولعان شىعار، ءبىراق ءاربىر حان ستاۆكاسىندا توتاليزاتور تۇرماعانى انىق. بۇل جونىندەگى ءبىزدىڭ ەلىمىزدىڭ تاريحىنىڭ پاراقتارى جۇلىنىپ قالعان شىعار، سوندىقتان ءدوپ باسىپ ايتا المايمىن. الايدا وسىنىڭ ءبارىنىڭ ارتىندا كەيبىر شەنەۋنىكتەردىڭ تۇككە تاتىماس ءپوپۋليزمى جانە مۇلدەم وزگە ماقساتتاردى بۇركەمەلەۋ تۇرعانىنا كۇمان جوق. ولاردىڭ كىم ەكەنىن انىقتاۋ عانا قالادى. قازىرگى تاڭدا بۇل سۇراقتىڭ جاۋابى جوق.
ەشقانداي ءباس تىگۋگە باس قاتىرمايتىن، ات سپورتىنا دا قىزىعۋشىلىعى جوق ازاماتتار بۇل ماسەلەگە نەلىكتەن الاڭداۋى ءتيىس؟ ارينە، ويىن بيزنەسى مەملەكەت ەكونوميكاسىنا ايتارلىقتاي ۇلەس قوسادى، ونىڭ ۇستىنە شەتەلدەن اقشا تارتىلادى. دەگەنمەن زاڭناماسىن مىڭ قۇبىلتىپ، شيمايلاي بەرەتىن ەلگە ءوزىنىڭ ماڭداي تەرىن توگىپ تاپقان اقشاسىن اكەلۋگە ءازىر كىم بار ەكەن؟ ونىڭ ۇستىنە ويىن بيزنەسىمەن قالتاسىن قامپايتىن وتىرعان بىردە-بىر ەلدە ەشبىر سپورت تۇرىنە مۇنداي ارتىقشىلىقتار بەرىلمەيدى. ويتكەنى بۇل نارىق ويىنشىلارىنىڭ جۇيكەسىنە تيەدى. ال ءبىزدىڭ پارلامەنتتەگىلەر ادال باسەكەلەستىك دەگەن ۇعىم بار ەكەنىن ەستىمەگەن سياقتى.
ءبىر قىزىعى، ءبىزدىڭ شەنەۋنىكتەر، دەپۋتات بولسىن نەمەسە ۇكىمەت بولسىن، ويىن بيزنەسى تۋرالى ايتقان كەزدە اۋىزدارىنان كوبىك اتىپ، ويىن بيزنەسىنىڭ جاعىمسىز جاقتارىن جىكتەي كەلە جانە حالىق اراسىندا لۋدومانداردىڭ كوبەيۋىمەن قورقىتا كەلە، ەكى جىلدان بەرى رەتتەۋشىنىڭ ويىنعا تاۋەلدىلىكتەن زارداپ شەگەتىندەردىڭ سانىن ازايتۋ، وسىنداي تاجىريبەمەن اينالىساتىن مەديسينالىق ۇيىمدارعا قولداۋ كورسەتۋ ماسەلەسىن شەشىپ جاتقانىن نازاردان تىس قالدىرادى. سويتە تۇرا وزدەرى جاڭا توتاليزاتور اشۋ تۋرالى باستاما كوتەرۋدە. بۇل پاتريوتتىق سەزىمنىڭ ءبىز بىلمەيتىن قانداي قىرى بولدى ەكەن؟
سوندا ولار نەنى ۇسىندى؟ جالپى وسى سالانىڭ بەدەلىن تۇسىرەتىن، ءبىراق سالىق جەڭىلدىكتەرىن الاتىن ويىن توتاليزاتورىنىڭ جاڭا ءتۇرىن. بۇعان قوسا نارىقتىڭ شەتەلدىك ينۆەستورلاردىڭ جالپى مەملەكەتىمىزگە دەگەن سەنىمسىزدىگىن ارتتىراتىنداي تۇردە بولشەكتەلەتىنى داۋسىز. راس، سوڭعى تارماقتى تولىقتىرىپ كەتۋگە بولادى، دالىرەك ايتساق، وسىلاي ءبولىپ الۋدان پايدا كورەتىندەر ءۇشىن ايرىقشا جاعدايلار جوق ەمەس، بۇل جاعدايدا ات توتاليزاتورىنىڭ بەنەفيسيارى شەتەل جاقتان قىلتياتىن مۇددەلەردى جاقتاپ وتىرعانداي كورىنەدى. ريم يمپەرياسىنان قالعان "ءبولىپ ال دا، بيلەي بەر" دەگەن ءسوز ەسكە ەرىكسىز تۇسەدى.
بىلاي قاراعاندا، ءبارى اتا-بابادان قالعان داستۇرلەر مەن وسيەتتەرگە سايكەس، ۇلتتىق سيپاتتا. نەمەسە رايىمىزدان قايتىپ، بۇكىل الەمدە كوپتەگەن جىلدار بويى ءوزىنىڭ تۇراقتىلىعى مەن تيىمدىلىگىن دالەلدەپ كەلە جاتقان جۇيەنى بۇزۋعا وقتالماي-اق قويامىز با؟
ناگيموۆا ەليا
