– وسى جىلدىڭ اقپانىندا ءماجىلىس دەپۋتاتتارى الماتى، الماتى وبلىسى، قىزىلوردا، سەمەي قالالارىندا قاڭتار وقيعاسى كەزىندە ۇستالىپ، تەرگەۋ يزولياتورىنا قامالعان ازاماتتار جانە ولاردىڭ تۋىستارىمەن، ادۆوكاتتارىمەن جۇزدەسكەن بولاتىن. ءوسىرىپ جەتكىزىپ، ەندى قىزىعىن كورەمىز دەپ وتىرعان بالالارىنان ايىرىلعان، وقيعانىڭ العاشقى كۇندەرىندە قاماۋعا الىنعان ۇلدارىنان حابار الا الماعان انالارمەن كەزدەسۋ وڭاي بولعان جوق. ولاردىڭ جانايقايىن، ءتىپتى قارعىسىن دا تىڭداپ، سابىرعا شاقىرىپ، باسۋ ايتۋعا تىرىستىق جەكە تەلەفونىمدى الەۋمەتتىك جەلىگە جاريالادىم.
بالالارىنىڭ تاعدىرىنا الاڭداعان انالار ءالى كۇنگە دەيىن حابارلاما جىبەرىپ، ادىلدىك ىزدەپ، بىزدەن ءۇمىت كۇتۋدە. ازاماتتاردى قابىلداۋ كەزىندە قۇقىق قورعاۋ ورگاندارى تاراپىنان كۇش قولدانۋ، اسىرەسە، ۇستاعان ساتتە ۇرىپ-سوعۋ سياقتى كەلەڭسىزدىكتەر بەلگىلى بولدى. ۇتىكپەن تەك كيىم عانا ەمەس، تەرگەۋ امالدارىن دا جۇرگىزۋگە بولاتىنىن كوردىك. سونداي-اق، كامەراعا تۇسكەنىن سىلتاۋراتىپ ايىپتالۋ جازاسىن اۋىستىرۋ نەمەسە بوساتۋ ءۇشىن ونىڭ تۋىستارىنان پارا بوپسالاۋ فاكتىلەرىنىڭ بولىپ جاتقانى دا ءسوز بولدى، – دەدى دەپۋتات ءماجىلىستىڭ جالپى وتىرىسىندا.
ونىڭ اتاپ وتۋىنشە، بۇگىنگى وكىلەتتى ورگانداردىڭ ماجىلىستەگى ەسەبىمەن قاڭتاردىڭ بۇكىل ماسەلەسى شەشىلمەيدى. ال دەپۋتاتتار كوتەرىلگەن سۇراقتار ءادىل شەشىمىن تاپقانشا قاداعالاۋدا ۇستايدى.
– شىنىن ايتساق، وسى قاندى وقيعانىڭ ۇيىمداستىرۋشىلارى مەن سودىرلاردىڭ كىم ەكەندىگىنە دە ناقتى جاۋاپ المادىق. پرەزيدەنت قاسىم-جومارت توقايەۆتىڭ اۋىرلاتاتىن ءمان-جاي بولماعان جاعدايدا جازانى جەڭىلدەتۋ قاجەت دەگەنىن نازارعا الا وتىرىپ جانە «قاڭتار وقيعاسىنىڭ» العىشارتتارى مەن سەبەپتەرىن ەسكەرىپ، بۇگىندە اۋىر ەمەس زاڭبۇزۋشىلىق جاساعان ازاماتتارعا تەك قىلمىستىق كودەكستىڭ كوزىمەن عانا ەمەس، ادامي گۋمانيستىك كوزقاراسپەن قاراۋعا شاقىرامىن، – دەدى بەرىك دۇيسەنبينوۆ.
