دەپۋتات نارتاي سارسەنعالييەۆ تاكسي جۇرگىزۋشىلەرىن ءوزىن-وزى رەتتەيتىن ۇيىمعا (ءوورۇ) مىندەتتى تۇردە بىرىكتىرۋ جانە جارنا تولەۋ تالابىن قاراستىراتىن زاڭ جوباسى ءماجىلىستىڭ قاراۋىنان وتپەي، مۇراعاتقا جىبەرىلگەنىن مالىمدەدى، دەپ حابارلايدى Dalanews.kz.
بۇعان دەيىن ۇكىمەت باسشىسىنىڭ ورىنباسارى رومان سكليار جاڭا زاڭ اياسىندا ءوزىن-وزى رەتتەيتىن ۇيىمدار (ءوورۇ) قۇرىلاتىنىن ايتقان ەدى. ونىڭ سوزىنشە، بۇل ۇيىمدار جولاۋشىلار مەن جۇكتەردى تاسىمالداۋ تاريفتەرىن بەلگىلەۋ قۇقىعىنا يە بولۋى ءتيىس بولاتىن.
الايدا ءماجىلىس دەپۋتاتتارى بۇل باستامانى قولدامادى.
"زاڭ جوباسى ەكىنشى وقىلىمعا وتپەيدى. ەگەر مينيسترلىك پيلوتتىق جوبا جاساپ، ونىڭ تيىمدىلىگىن دالەلدەي السا، ءبىز ونى قايتا قاراستىرۋىمىز مۇمكىن. ايتپەسە، بۇل قۇجات مۇراعاتتا قالادى. قاراپايىم تاكسيستەردى قيىن جاعدايعا قالدىرۋعا بولمايدى"، – دەدى سارسەنعالييەۆ.
نەگە دەپۋتاتتار بۇل زاڭعا قارسى شىقتى؟
- تاريفتەردى رەتتەۋ قۇقىعى جەكەمەنشىك ۇيىمدارعا بەرىلەدى
زاڭ جوباسى تاكسي تاريفتەرىن ءوزىن-وزى رەتتەيتىن ۇيىمداردىڭ بەلگىلەۋىن قاراستىرعان. دەپۋتاتتاردىڭ پىكىرىنشە، بۇل مونوپوليا قالىپتاستىرۋعا الىپ كەلۋى مۇمكىن. جەكەمەنشىك ۇيىمدار باعانى نەگىزسىز ءوسىرۋى مۇمكىن، بۇل ءوز كەزەگىندە جۇرگىزۋشىلەر مەن جولاۋشىلار ءۇشىن ءتيىمسىز بولادى.
- جول قاۋىپسىزدىگىنە تونەتىن ءقاۋىپ
جولاۋشىلاردى تاسىمالداۋ سالاسىنداعى قاۋىپسىزدىك شارالارى مەملەكەتتىڭ قۇزىرىنان شىعىپ، جەكەمەنشىك ۇيىمداردىڭ باقىلاۋىنا وتەدى. قاۋىپسىزدىك تالاپتارىن ساقتاۋعا باعىتتالعان مەملەكەتتىك باقىلاۋ السىرەۋى مۇمكىن، ال بۇل ادام ومىرىنە تىكەلەي ءقاۋىپ توندىرەدى.
- تاكسي جۇرگىزۋشىلەرى ءۇشىن جاڭا قارجىلىق اۋىرتپالىق
زاڭ جوباسىنا سايكەس، بارلىق تاكسي جۇرگىزۋشىلەرى ءوزىن-وزى رەتتەيتىن ۇيىمدارعا كىرۋگە جانە جارنا تولەۋگە مىندەتتەلەتىن ەدى. بۇل جەكە كاسىپكەرلەر ءۇشىن قوسىمشا شىعىن اكەلىپ، ولاردىڭ تابىسىن ازايتار ەدى.
