ءماجىلىستىڭ جالپى وتىرىسىندا دەپۋتات ەدىل جاڭبىرشين ارحيۆ قۇجاتتارىنىڭ قۇپيالىعى مەن ەكىنشى دۇنيەجۇزىلىك سوعىسقا قاتىسقان قازاقستاندىق جاۋىنگەرلەردىڭ مالىمەتتەرىن سيفرلاندىرۋ ءىسىنىڭ كەشەۋىلدەپ جاتقانىن سىنعا الدى، دەپ حابارلايدى Dalanews.kz.

ءجاڭبىرشيننىڭ ايتۋىنشا، ءبىر جىلدان استام ۋاقىت وتسە دە، ارداگەرلەرگە قاتىستى تولىققاندى سيفرلىق بازا جاسالعان جوق. ول مۇراعاتتارداعى دەرەكتەردىڭ، رەسەي مەن وزگە دە تمد ەلدەرىندەگى قۇجاتتاردىڭ جانە گەرمانيا سەكىلدى ەلدەردە كونسلاگەرلەردە بولعان قازاقستاندىقتار تۋرالى مالىمەتتەردىڭ ءالى جۇيەلەنبەگەنىن ايتتى.

"مىڭداعان ارداگەردىڭ ەرلىگى ءالى دە تولىق زەرتتەلمەگەن. ۇرپاقتارى دەرەكتەردى ءوز بەتىمەن ىزدەپ ءجۇر. بۇل اقپاراتتى اشىق دەرەكقورعا اينالدىرۋ – ءبىزدىڭ ورتاق مىندەتىمىز. ول ءۇشىن ارنايى ونلاين پلاتفورما قاجەت"، – دەدى ول.

سونىمەن قاتار، دەپۋتات كەڭەس داۋىرىندەگى قاندى ساياساتقا قارسى جاسالعان كوتەرىلىستەرگە قاتىستى ماتەريالدار قۇپيا كۇيىندە ساقتالىپ وتىرعانىنا توقتالدى.

"اداي كوتەرىلىسى، قىزىلورداداعى اسان كوتەرىلىسى جانە باسقا دا ايماقتىق قوزعالىستار تۋرالى دەرەكتەر عىلىمي اينالىمعا ەنگىزىلمەي وتىر. ءىىم مەن ۇقك بىر-بىرىنە سىلتەپ، ماسەلەنى شەشپەي كەلەدى. مۇنى زاڭ ارقىلى رەتتەۋ قاجەت"، – دەدى جاڭبىرشين.

مينيسترلىكتىڭ جاۋابى

مادەنيەت جانە اقپارات ۆيسە-مينيسترى ايبەك سىدىقوۆ «2025-ارحيۆ» جوباسى اياسىندا ءبىرقاتار جۇمىستار اتقارىلعانىن مالىمدەدى. ونىڭ سوزىنشە، رەسەي مەن باسقا دا ەلدەردىڭ مۇراعاتتارىنان قۇجاتتار الىنىپ، سونىڭ نەگىزىندە عىلىمي مونوگرافيا مەن فوتوالبومدار دايىندالعان.

"ال ەكىنشى ساۋال بويىنشا قۇجاتتار قۇپيا مارتەبەسىندە بولسا، قوسىمشا پىسىقتاپ، جازباشا جاۋاپ بەرەمىن"، – دەدى ۆيسە-مينيستر.

ءماجىلىس ءتوراعاسىنىڭ پىكىرى

ءماجىلىس ءتوراعاسى ەرلان قوشانوۆ ارحيۆتەردىڭ ءالى قۇپيا كۇيدە تۇرعانىنا تاڭدانىسىن ءبىلدىردى.

"قۇپيا دەيتىندەي، 80 جىل ءوتتى. 100 جىلعا تاياپ قالدى. بۇل ماسەلە بويىنشا قوسىمشا تۇسىنىكتەمە بەرۋ قاجەت"، – دەدى ول.

دەپۋتات جاڭبىرشين زاڭ جوباسىنا بىرنەشە ۇسىنىس ەنگىزدى. اتاپ ايتقاندا:

• تاريحي ارحيۆتەردىڭ قۇپياسىن اشۋ؛

• ەكىنشى دۇنيەجۇزىلىك سوعىس ارداگەرلەرىنە ارنالعان اشىق ونلاين بازا قۇرۋ؛

• ايماقتىق كوتەرىلىستەر بويىنشا ەكسپەديسيالار ۇيىمداستىرىپ، دەرەكتەردى عىلىمي اينالىمعا ەنگىزۋ.

"ەگەر ءبىز مۇنى جۇزەگە اسىرماساق، تاريح بۇرمالانىپ، حالقىمىزدىڭ مادەنيەتىنە كۇمان كەلتىرەدى. ال ارحيۆتەردى اشۋ ارقىلى ادىلەتتىلىكتى قالپىنا كەلتىرۋگە بولادى"، – دەدى دەپۋتات.