«عالامتوردا جاريالانعان كەيبىر جاريالانىمداردىڭ نەگىزىندە رەسەيلىك دەپۋتاتتار قازاقستانداعى ورىس ءتىلىنىڭ جاعدايىنا قاتىستى نارازىلىقتارىن بىلدىرگەن بولاتىن. بۇل جاعدايعا قاتىستى قانداي پىكىر ايتا الاسىز؟» دەپ سۇرادى باعدارلاما جۇرگىزۋشىسى داۋرەن ابايەۆتان.
– ەشقانداي كۇمانسىز: مۇنداي جاعدايلار ورەسكەل ءارى وعان جول بەرۋگە بولمايدى. سوندىقتان قۇقىق قورعاۋ ورگاندارى ءادىل قۇقىقتىق باعاسىن بەرە جاتار. كەمسىتۋشىلىككە كىمنىڭ نەگىز بولعاندىعىنا، قانداي سەبەپكە بايلانىستى بولعانىنا قاراماستان، ورىس، قازاق نەمەسە باسقا ۇلت وكىلى بولسىن، ءبىزدىڭ ەلىمىزدە مۇندايعا جول جوق. ونىڭ ۇستىنە، ءبىزدىڭ ازاماتتارىمىزدىڭ باسىم كوپشىلىگى وسىنداي جوسىقسىز ۇلتشىلدىقتىڭ كورىنىس تابۋىن تالقىعا سالادى. وكىنىشكە قاراي، مۇنداي قۇبىلىستار بۇكىل الەمدە بولىپ جاتادى. بۇل – مۇنداي نارسەلەردى مەملەكەت قولدايدى دەگەندى بىلدىرمەيدى نەمەسە ءۇردىس سونداي دەگەن ءسوز ەمەس. ەكى-ۇش ادامنىڭ قالاي بولسا سولاي ايتا سالعان سوزىنە قاراپ 19 ميلليون حالقى بار ەلدىڭ جاعدايى تۋرالى كەسىپ-پىشۋگە بولا ما؟! بولمايدى دەپ ويلايمىن، – دەپ ءوز ويىن ورتاعا سالدى داۋرەن ابايەۆ.
ونىڭ ايتۋىنشا، قازاقستانداعى ورىس ءتىلىنىڭ جاعدايى تۋرالى ەموسيامەن كوپ نارسە ايتۋعا بولادى. ءبىراق دەرەكتەرمەن سويلەگەن دۇرىس.
ءبىزدىڭ ەلىمىزدە حالىقتىڭ 90%-ى ورىس ءتىلىن بىلەدى دەپ ايتۋعا بولادى. بۇل – رەسەيدىڭ ءوزى مەن بەلارۋس مەملەكەتىن قوسپاعاندا، الەمدەگى ەڭ جوعارعى كورسەتكىشتەردىڭ ءبىرى دەپ سانايمىن. ورىستاردىڭ وزدەرىنىڭ حالىق قۇرىلىمىنداعى ۇلەسى ءقازىر 20% شاماسىندا دەپ الساق، بىزدە مەكتەپ وقۋشىلارىنىڭ 30%-دان استامى ورىس تىلىندە ءبىلىم الادى. بۇل ءتىلدىڭ قانشالىقتى سۇرانىسقا يە ەكەندىگىن كورسەتىپ تۇرعان جوق پا؟
قازاقستاندا 23 مىڭنان استام ورىس ءتىلى مەن ادەبيەتى ءپانىنىڭ ءمۇعالىمى جۇمىس ىستەيدى. بۇل – ورتالىق ازياداعى كەز كەلگەن باسقا ەلدەرگە قاراعاندا اناعۇرلىم كوپ. سول ءۇشىن قازاقستاندا ورىس ءتىلىنىڭ قىسىم كورىپ جاتقاندىعى تۋرالى ايتۋ - ادىلەتسىزدىك، – دەدى پرەزيدەنت اكىمشىلىگى باسشىسىنىڭ ءبىرىنشى ورىنباسارى.
