«ءبىزدىڭ قوعامنىڭ ەڭ وسال بولىگى – جاقىن ادامدارىنىڭ قامقورلىعىنسىز قالعان بالالار مەن قارتتار. سوندىقتان، قور نۇر-سۇلتان مەن الماتىداعى بالالار ۇيلەرى مەن قارتتار ۇيلەرىنە باستى نازار اۋدارادى. اتالعان مەكەمەلەردەگى ەكى مىڭعا جۋىق ادام ەڭ قاجەتتى جەكە قورعانىس قۇرالدارىمەن قامتاماسىز ەتىلەدى» دەلىنگەن قوردىڭ حابارلاماسىندا.
بۇل مەكەمەلەردىڭ قىزمەتكەرلەرى مەن ونداعى ادامدار ءۇشىن مەديسينالىق ماسكالار، سانيتارلىق تازارتقىشتار ساتىپ الىنادى. بالالار ءۇيى مەن قارتتار ۇيىندەگىلەردىڭ يممۋنيتەتىن كۇشەيتۋ ءۇشىن، ۆيرۋسولوگتار اعزانىڭ ينفەكسيالارعا توتەپ بەرۋ مۇمكىندىگىن ارتتىرادى دەپ كورسەتكەن پوليۆيتاميندەر مەن ءتۇرلى قوسىمشا بايىتىلعان تاعامداردى بەرۋ تۋرالى شەشىم قابىلداندى. بەرىلگەن بارلىق تاۋارلار سەرتيفيكاتتالعان.
سونىمەن قاتار، كوروناۆيرۋسپەن اۋىراتىندارعا شۇعىل قاجەت بولاتىن ەكى ستاسيونارلىق جاساندى تىنىس الۋ اپپاراتى ساتىپ الىندى. MINDRAY – مەديسينالىق جابدىق ءوندىرۋشى جەتەكشى كومپانياسىنىڭ ءبىرى. ونىڭ SV 300 جاساندى تىنىس الۋ اپپاراتى الەمدەگى ەڭ ءىرى كلينيكالار دا پايدالانادى. ءدال وسى اپپاراتتار قىتايداعى ناۋقاستاردىڭ كوپشىلىگىنىڭ ساۋىعۋىندا باستى ءرول اتقاردى.
«اسار-بەرەكە» قوعامدىق قورىمەن بىرلەسە وتىرىپ، «دەگدار» قورى جىلجىمالى مەديسينالىق كەشەندەردى الماتى دەنساۋلىق ساقتاۋ باسقارماسىنا تاپسىرادى. ونىمەن جۇمىس ىستەيتىن قىزمەتكەرلەردى قوردىڭ ۇزاق مەرزىمدى سەرىكتەسى – قازاقستان-رەسەي مەديسينالىق ۋنيۆەرسيتەتى قامتاماسىز ەتەدى. بۇل – ەلىمىزدىڭ كوپتەگەن ايماقتارىندا، سونىڭ ىشىندە ارىس قالاسىندا توتەنشە جاعدايلار كەزىندە ادامداردى قۇتقارعان كاسىبي ماماندار توبى، دەپ اتاپ ءوتتى قورداعىلار.
