"سۇيىكتى ايسۇلتانىنان ايىرىلىپ قالعان ءبىزدىڭ اۋلەت قارا جامىلىپ، قايعى جۇتىپ وتىر. اۋىزعا ءسوز تۇسپەيتىن اۋىر شاقتا قوعام جاقىنىنان ايىرىلعان ءبىزدىڭ جاعدايىمىزعا تۇسىنىستىكپەن قارايدى دەگەن ۇمىتتەمىن"، – دەيدى داريعا نازاربايەۆا.
ايسۇلتان نازاربايەۆ بۇگىن 16 تامىزدا 30-عا تولارىنا 10 كۇن قالعاندا ومىردەن ءوتتى.
اجالىنىڭ نەدەن بولعانى ءالى انىق ەمەس. جۇرەگى توقتاپ قالعان دەگەن بولجام بار. ماسەلەنىڭ ءمان-جايى انىقتالۋدا.
ايسۇلتان نازاربايەۆ - قازاقستاننىڭ ەكس-پرەزيدەنتى نۇرسۇلتان نازاربايەۆتىڭ نەمەرەسى.
1990 جىلى 26 تامىزدا مارقۇم راحات الييەۆ پەن داريعا نازاربايەۆانىڭ شاڭىراعىندا دۇنيەگە كەلگەن.
بالا كەزدەن فۋتبولعا قىزىققان. 2006 جىلى قازاقستاننىڭ جاسوسپىرىمدەر قۇراماسىنىڭ ساپىندا ەۋروپا چەمپيناتىنىڭ ىرىكتەۋ تۋرنيرىنە قاتىستى. "چەلسي" جانە "پورتسمۋت" جاستار كوماندالارى مەن قازاقستاندىق "استانا" كومانداسىندا ويناعان.
2010 جىلى ساندحەرست قالاسىندا بريتانيانىڭ كورولدىك اسكەري اكادەمياسىن تامامدادى. كەيىن "بيزنەس اكىمشىلەندىرۋ" ماماندىعى بويىنشا الماتىداعى كيمەپ ۋنيۆەرسيتەتىنىڭ ماگيستراتۋراسىندا وقىدى.
ەڭبەك جولى
2012-2013 جىلدارى قورعانىس مينيسترلىگىنىڭ باس بارلاۋ باسقارماسىندا قىزمەت اتقاردى.
2017 جىلدىڭ اقپان-قازان ايلارىندا قازاقستان فۋتبول فەدەراسياسىنىڭ ۆيسە-پرەزيدەنتى بولدى. فيفا، ۋەفا جانە ۇلتتىق قاۋىمداستىقتارمەن حالىقارالىق بايلانىس ورناتۋعا جاۋاپ بەردى.
بريتانيانىڭ "ايبىنى ءۇشىن" ناگراداسىمەن ماراپاتتالعان.
سپورتتاعى كارەراسى
اكەسى اۆستريادا قىزمەتتە بولعان كەزدە "ادميرا ۆاككەر" كلۋبىندا فۋتبولمەن اينالىسا باستادى. 2006 جىلى قازاقستان ءبىرىنشى ليگاسىندا استانالىق "راحات" ءۇشىن ونەر كورسەتتى. 2007 جىلى الماتىنىڭ "جەلەزنودوروجنيك" كلۋبىنىڭ قۇرامىندا بولدى. 2006 جىلى فۋتبولدان ەۋروپا جاسوسپىرىمدەر چەمپيوناتىنىڭ ىرىكتەۋ تۋرنيرىنە قاتىستى. كەيىن بىرنەشە اي "چەلسي" اكادەمياسىندا بولدى. انگليا چەمپيوناتىنىڭ قولا جۇلدەگەرى اتاندى.
2011 جىلى "استانادا" وينادى. 2012 جىلدىڭ 21 قازانىندا قازاقستان چەمپيوناتىنداعى جالعىز ماچىن وتكىزدى. قاسكەلەڭدىك "سۇڭقار" كلۋبىنىڭ "اقتوبەمەن" كەزدەسۋىندە ەكىنشى تايمنىڭ ورتاسىندا الاڭعا شىقتى.
انگلياداعى كلينيكا
انگليادا ەسىرتكىگە تاۋەلدىلەرگە ارنالعان كلينيكادا ەم قابىلدادى. بۇدان سوڭ ايسۇلتان نازاربايەۆ الەۋمەتتىك جەلىدەگى پاراقشاسىندا بىرنەشە جازبا جاريالادى. ولار قازاقستاندا قوعامدىق رەزونانس تۋدىردى.
سوڭعى جازباسىن 2020 جىلدىڭ 17 شىلدەسىندە جاريالاعان.
جەكە ءومىرى
2013 جىلى "قازرومگاز" اق باسشىسى قايرات بورانبايەۆتىڭ قىزىنا ۇيلەنگەن بولاتىن. 2016 جىلدىڭ جازىندا ەكى جاستىڭ وتباسىندا امەلي ەسىمدى قىز دۇنيەگە كەلدى.
2019 جىلدىڭ ءساۋىر ايىندا ايسۇلتان نازاربايەۆ فەيسبۋكتەگى جەكە پاراقشاسىندا ءاتى-جونىن ايسۇلتان راحات (Aisultan Rakhat) دەپ، ال وتباسىلىق جاعدايىن "اجىراسقان" دەپ وزگەرتكەن.
ونداعى مالىمەتكە سۇيەنسەك، تۇڭعىش پرەزيدەنتتىڭ جيەنى 2019 جىلدىڭ 5 اقپانىندا اجىراسقان.
