اقىن جٷرسٸن ەرمان ايتىسكەر شەكٸرتٸ جانداربەك بۇلعاقوۆقا بەرگەن سۇحباتىندا ايتىستىڭ تاعدىرىنا كٸمدەردٸڭ ىقپالى بولعانىن ەڭگٸمەلەپ, ەل اۋزىنداعى اڭىزداردى قايسى شىن, قايسى ٶتٸرٸك ەكەنٸن اجىراتىپ بەردٸ, - دەپ حابارلايدى Dalanews.kz.
"ٶزٸڭ دە كۋەسٸڭ, ايتىستى قايتا-قايتا جاۋىپ تاستاپ جاتتى عوي. "ايتىستى تٷركيياعا اپارامىز" دەپ مينيستر قۇل-مۇحاممەدتٸڭ الدىنا باردىق. قۇل-مۇحاممەد الدىمىزعا جايىپ سالدى. "مٸنە, ايتىستىڭ توقتاتىڭدار" دەگەن نازارباەۆتىڭ نۇسقاۋى جاتىر. قالاي باراسىڭدار تٷركيياعا?" دەدٸ. ودان دا ٶتتٸك", - دەيدٸ جٷرسٸن ەرمان.
ونىڭ سٶزٸنشە, داريعا نازارباەۆا ايتىسقا زييانىن تيگٸزبەگەن.
"باياعىدا جەكپە-جەك ايتىس دەگەن بولدى عوي. سونى اشايىن دەپ داريعا نازارباەۆاعا باردىم. حابار اگەنتتٸگٸنٸڭ تٶراعاسى ەدٸ.
"سٶز جوق اشا بەر, بٸراق مىناعان (ساۋساعىن شوشايتىپ - ەسك.) تيٸسپەسەڭدەر بولدى" دەدٸ. مىناۋى تٷسٸنٸكتٸ عوي ەندٸ. ەكەسٸن ايتىپ وتىر. قايدان تيٸسپەيدٸ?! ريناتتار "ٷش جٷزدٸڭ تاعدىرىنان ٷش قىزدىڭ بولاشاعى قيىن بولىپ تۇر" دەدٸ.
بٸراق داريعا مىقتى ەكەن. ەشقانداي جازالاۋ, ەسكەرتۋ جاساۋ بولعان جوق. بٸراق توسقاۋىل قويۋشىلار كٶپ بولدى. شىدادىق. شىداماعاندا قايدا باراسىڭ?!" - دەدٸ اقىن.
جٷرسٸن ەرمان الماتى قالاسىنىڭ بيلٸگٸندە وتىرعاندار ايتىس ٶتۋٸنە توسقاۋىل بولعانىن اشىق ايتتى.
"الماتى قالاسىنىڭ ەكٸمٸنٸڭ ورىنباسارى بولدى. سەيدۋمانوۆ دەگەن. دۆورەتستٸ جاپتىرىپ تاستادى. ەكٸ كٷننەن كەيٸن ايتىس بولايىن دەپ جاتىر. دۆورەتستٸ بەرگٸزبەي, "توقتاتاسىڭ" دەدٸ. "قايدان شىعاردىڭ?" دەپ ەدٸم. "قۇل-مۇحاممەدكە بارىپ, سوعان ايت" دەدٸ. استاناعا ۇشىپ باردىم. قۇل-مۇحاممەد بٸر جينالىستا وتىر ەكەن, الىپ شىعىپ سٶيلەستٸم. "جوق, اشا بەرسٸن, رۇقسات" دەدٸ.
قايتىپ كەلسەم سەيدۋمانوۆ كٶنبەيدٸ. "ايتىستى جاۋىپ تاستاعان سوڭ حالىق شۋلاپ كەتەدٸ" دەدٸم. "شۋلاپ كەتسە اتامىن" دەدٸ. "وندا مىقتى ەكەنسٸڭ" دەدٸم. 7-8 جىل بولىپ كەتتٸ. وسىدان كەيٸن نە ايتۋعا بولادى?!" - دەپ ەڭگٸمەلەدٸ ايتىستىڭ تٸرٸ ابىزى.
جانداربەك بۇلعاقوۆ سۇحبات بارىسىندا جٷرسٸن ەرماننان ەل اۋزىندا جٷرگەن بٸر ەڭگٸمە قانشالىق شىن ەكەنٸن سۇراعان. ونىڭ سٶزٸنشە, بالعىنبەك يماشەۆ پەن مەلس قوسىمباەۆتىڭ جەكپە جەك ايتىسىندا 30 مينۋتتىق دەمالىستا جٷرسٸن ەرمانعا داريعا نازارباەۆا حابارلاسقان دەگەن دە سٶزدەر بار ەكەن.
"ايتىستا اڭىز كٶپ. سول اڭىزدىڭ بٸرەۋٸ. ەش ۋاقىتتا مۇنداي قوڭىراۋ شالىنعان جوق, داريعا تيٸسكەن جوق. قالاي ٶتتٸ, سولاي ٶتتٸ", - دەپ جاۋاپ بەردٸ جٷرسٸن ەرمان.
سونىمەن قاتار, دٸنمۇحامەد قوناەۆتىڭ 100 جىلدىعىنا وراي ٶتكەن ايتىستا "ساحنادا شاي قۇيىپ جٷرگەن قىزدار ۇلتتىق قاۋٸپسٸزدٸك قىزمەتٸنٸڭ قىزدارى بولدى" دەگەن سٶز قاۋەسەت ەكەنٸن جەتكٸزدٸ.
"بۇل دا بوس سٶز. ساحنادا شاي قۇياتىن قىزداردى ٶزٸمٸز تاڭداپ شاقىراتىنبىز. كٸشكەنە بويى, باسى تٷزۋ (قىزدارعا - ەسك.) ۇلتتىق كيٸم كيگٸزەتٸنبٸز. قوناەۆتىڭ مٷشەل تويىنا بايلانىستى ەكٸ رەت ٶتكٸزدٸك. ەكەۋٸ دە قيىن جاعدايدا ٶتتٸ. بالۋان شالۋاق سارايىندا ٶتكٸزدٸك.
سارايدىڭ سىرتىنا 72 شارشى مەترگە قوناەۆتىڭ سۋرەتٸن سالىپ قويدىق. "قوناەۆتاي ەر قايدا?" دەپ. سونى الماتى قالاسىنىڭ بيلٸگٸندە وتىرعاندار الدىردى", - دەدٸ جٷرسٸن ەرمان.
