Aqyn Júrsin Erman aitysker shákirti Jandarbek Bulǵaqovqa bergen suhbatynda aitystyń taǵdyryna kimderdiń yqpaly bolǵanyn áńgimelep, el aýzyndaǵy ańyzdardy qaisy shyn, qaisy ótirik ekenin ajyratyp berdi, - dep habarlaidy Dalanews.kz.
"Óziń de kýásiń, aitysty qaita-qaita jaýyp tastap jatty ǵoi. "Aitysty Túrkiiaǵa aparamyz" dep ministr Qul-Muhammedtiń aldyna bardyq. Qul-Muhammed aldymyzǵa jaiyp saldy. "Mine, aitystyń toqtatyńdar" degen Nazarbaevtyń nusqaýy jatyr. Qalai barasyńdar Túrkiiaǵa?" dedi. Odan da óttik", - deidi Júrsin Erman.
Onyń sózinshe, Dariǵa Nazarbaeva aitysqa ziianyn tigizbegen.
"Baiaǵyda jekpe-jek aitys degen boldy ǵoi. Sony ashaiyn dep Dariǵa Nazarbaevaǵa bardym. Habar agenttiginiń tóraǵasy edi.
"Sóz joq asha ber, biraq mynaǵan (saýsaǵyn shoshaityp - esk.) tiispeseńder boldy" dedi. Mynaýy túsinikti ǵoi endi. Ákesin aityp otyr. Qaidan tiispeidi?! Rinattar "úsh júzdiń taǵdyrynan úsh qyzdyń bolashaǵy qiyn bolyp tur" dedi.
Biraq Dariǵa myqty eken. Eshqandai jazalaý, eskertý jasaý bolǵan joq. Biraq tosqaýyl qoiýshylar kóp boldy. Shydadyq. Shydamaǵanda qaida barasyń?!" - dedi aqyn.
Júrsin Erman Almaty qalasynyń biliginde otyrǵandar aitys ótýine tosqaýyl bolǵanyn ashyq aitty.
"Almaty qalasynyń ákiminiń orynbasary boldy. Seidýmanov degen. Dvoretsti japtyryp tastady. Eki kúnnen keiin aitys bolaiyn dep jatyr. Dvoretsti bergizbei, "toqtatasyń" dedi. "Qaidan shyǵardyń?" dep edim. "Qul-Muhammedke baryp, soǵan ait" dedi. Astanaǵa ushyp bardym. Qul-Muhammed bir jinalysta otyr eken, alyp shyǵyp sóilestim. "Joq, asha bersin, ruqsat" dedi.
Qaityp kelsem Seidýmanov kónbeidi. "Aitysty jaýyp tastaǵan soń halyq shýlap ketedi" dedim. "Shýlap ketse atamyn" dedi. "Onda myqty ekensiń" dedim. 7-8 jyl bolyp ketti. Osydan keiin ne aitýǵa bolady?!" - dep áńgimeledi aitystyń tiri abyzy.
Jandarbek Bulǵaqov suhbat barysynda Júrsin Ermannan el aýzynda júrgen bir áńgime qanshalyq shyn ekenin suraǵan. Onyń sózinshe, Balǵynbek Imashev pen Mels Qosymbaevtyń jekpe jek aitysynda 30 minýttyq demalysta Júrsin Ermanǵa Dariǵa Nazarbaeva habarlasqan degen de sózder bar eken.
"Aitysta ańyz kóp. Sol ańyzdyń bireýi. Esh ýaqytta mundai qońyraý shalynǵan joq, Dariǵa tiisken joq. Qalai ótti, solai ótti", - dep jaýap berdi Júrsin Erman.
Sonymen qatar, Dinmuhamed Qonaevtyń 100 jyldyǵyna orai ótken aitysta "sahnada shai quiyp júrgen qyzdar Ulttyq qaýipsizdik qyzmetiniń qyzdary boldy" degen sóz qaýeset ekenin jetkizdi.
"Bul da bos sóz. Sahnada shai quiatyn qyzdardy ózimiz tańdap shaqyratynbyz. Kishkene boiy, basy túzý (qyzdarǵa - esk.) ulttyq kiim kigizetinbiz. Qonaevtyń múshel toiyna bailanysty eki ret ótkizdik. Ekeýi de qiyn jaǵdaida ótti. Balýan Shalýaq saraiynda ótkizdik.
Saraidyń syrtyna 72 sharshy metrge Qonaevtyń sýretin salyp qoidyq. "Qonaevtai er qaida?" dep. Sony Almaty qalasynyń biliginde otyrǵandar aldyrdy", - dedi Júrsin Erman.
