سەنات ءتوراعاسى ماۋلەن اشىمبايەۆ «تاۋەلسىزدىك ۇرپاقتارى» فورۋمى اياسىندا وتكەن «دارىن» مەملەكەتتىك جاستار سىيلىعىنىڭ لاۋرەاتتارىن سالتاناتتى ماراپاتتاۋ راسىمىنە قاتىستى.

شارانى اقپارات جانە قوعامدىق دامۋ ءمينيسترى ايدا بالايەۆا جۇرگىزىپ وتىردى.

سەنات ءتوراعاسى ءوز سوزىندە قاتىسۋشىلاردى تاۋەلسىزدىكتىڭ 30 جىلدىعىمەن جانە تۇڭعىش پرەزيدەنت كۇنىمەن قۇتتىقتادى. ول سونداي-اق قازاقستاننىڭ ەلىمىزدىڭ تاۋەلسىزدىك العالى قول جەتكىزگەن جەتىستىكتەرگە توقتالا كەلىپ، قازاقستاننىڭ تۇڭعىش پرەزيدەنتى –  ەلباسى نۇرسۇلتان نازاربايەۆتىڭ جاستاردى قولداۋعا ارنالعان باستامالارى تۋرالى جان-جاقتى ايتىپ بەردى.

«تاۋەلسىزدىكتىڭ العاشقى جىلدارىنان باستاپ جاستارىمىز الەمنىڭ ەڭ وزىق جوعارى وقۋ ورىندارىندا ءبىلىم الۋ ءۇشىن «بولاشاق» باعدارلاماسى ىسكە اسىرىلدى. باعدارلاما ارقىلى قازاقستاندىق جاستار الەمنىڭ ەڭ ۇزدىك ۋنيۆەرسيتەتتەرىندە ءبىلىم الدى. وسى جىلدارى 1800 شاماسىندا جاڭا مەكتەپ سالىندى. ۇلت دەنساۋلىعىن جاقسارتۋ جولىندا جاڭا اۋرۋحانالار مەن عىلىمي مەديسينا ورتالىقتارى بوي كوتەردى. تاۋەلسىزدىك العالى 1800-دەن استام دەنساۋلىق ساقتاۋ نىسانى سالىنىپ، پايدالانۋعا بەرىلدى. ەلىمىزدىڭ، اسىرەسە، وڭىرلەر مەن اۋىل-ايماقتىڭ ينفراقۇرىلىمىن جەتىلدىرۋگە باعىتتالعان كوپتەگەن جوبالار جۇزەگە اسىرىلدى. مۇنىڭ ءبارى، ەڭ الدىمەن، جاستارىمىزدىڭ ءبىلىمدى، دەنى ساۋ، باسەكەگە قابىلەتتى بولىپ قالىپتاسۋى ءۇشىن جاسالدى»، – دەدى ماۋلەن اشىمبايەۆ.

سەنات ءتوراعاسى سونىمەن قاتار كۇنى كەشە Nur Otan پارتياسى ساياسي كەڭەسىنىڭ وتىرىسىندا ەلباسى «ەلدىكتىڭ جەتى تۇعىرى» اتتى قاعيداتتار جيىنتىعىن جاريالاپ، قازاقستاندىقتاردىڭ جاڭا داۋىردەگى باستى باعدارىن ايقىنداپ بەرگەنىن ايتتى. تۇڭعىش پرەزيدەنت ءسوزىن تىلگە تيەك ەتكەن ماۋلەن اشىمبايەۆ تاۋەلسىزدىكتى، بىرلىك پەن كەلىسىمدى، اتا-بابادان ميراس بولعان جەردى، وتباسىلىق قۇندىلىقتار مەن ءسالت-داستۇردى، ۇلتتىق مادەنيەتتى ساقتاپ، ءبىلىم مەن ەڭبەككە جانە پراگماتيزمگە باسىمدىق بەرۋ ارقىلى جاسامپاز ۇلت بولىپ قالىپتاساتىنىمىزدى اتاپ ءوتتى.

سەنات ءتوراعاسى مەملەكەت باسشىسى قاسىم-جومارت توقايەۆتىڭ تاپسىرماسىمەن سوڭعى جىلدارى ەلىمىزدە جاستار ساياساتى اياسىندا اۋقىمدى جۇمىس اتقارىلعانىن دا جەتكىزدى. ولاردىڭ قاتارىندا ۆولونتەر جىلىن وتكىزۋ، پرەزيدەنتتىك جاستار كادرلىق رەزەرۆىن قۇرۋ، ساياسي پارتيالاردىڭ سايلاۋ تىزىمىندە ايەلدەر مەن جاستار ءۇشىن مىندەتتى 30 پايىزدىق كۆوتانى زاڭمەن ەنگىزۋ جونىندەگى باستاما جانە تاعى باسقالارى بار.

«پرەزيدەنتىمىزدىڭ باستاماسىمەن جاستاردى قولداۋعا ارنالعان جۇيەلى جوبالار ىسكە اسىرىلۋدا. مەملەكەت تاراپىنان جاستار ءۇشىن ءتيىمدى جانە ادىلەتتى الەۋمەتتىك ليفت قالىپتاستىرۋعا باسا ءمان بەرىلۋدە. وسىنىڭ نەگىزىندە پرەزيدەنتتىك جاستار كادرلىق رەزەرۆى جاساقتالىپ، بىلىكتى جاستار ىرىكتەلدى»، – دەدى سەنات ءتوراعاسى.

ماۋلەن اشىمبايەۆ فورۋمعا قاتىسۋشىلارعا الەمنىڭ بولاشاق كەلبەتىن وزگەرتەتىن، ادامداردىڭ ومىرىنە تىكەلەي ىقپال ەتەتىن پوست-پاندەميالىق ۇردىستەر قالىپتاسىپ كەلە جاتقانىن ايتتى.

بۇدان بىلاي قورشاعان ورتانى قورعاۋدىڭ ماڭىزى ارتا بەرەتىنىنە نازار اۋدارعان ول تۇتىنشىلىق يدەولوگياسىنان باس تارتۋ قاجەتتىگىن جەتكىزدى.

«تابيعاتپەن ۇنەمى ۇيلەسىمدە بولۋ – ءبىزدىڭ بابالارىمىزدىڭ ومىرلىك فيلوسوفياسى. ءبىز وسىنداي كوزقاراستى قالپىنا كەلتىرۋىمىز كەرەك. جەر – بۇكىل ادامزاتقا، بىزگە دەيىن جانە بىزدەن كەيىنگى ۇرپاققا ورتاق. ال، ونىڭ مۇمكىندىگى شەكتەۋلى. ۋاقىت وتكەن سايىن تازا اۋا، سۋ، قۇنارلى ازىق-تۇلىك ونىمدەردىڭ تاپشىلىعى ايقىن سەزىلىپ كەلەدى. ەگەر ءبىز قازىرگىدەي، ەسەپسىز تۇتىنۋ داعدىسىن جالعاستىرا بەرسەك، جەردىڭ رەسۋرستارى ۇزاققا جەتپەيدى. سوندىقتان قورشاعان ورتانى قورعاۋ ءارقايسىمىزدىڭ ومىرلىك ۇستانىمىمىزعا اينالۋعا ءتيىس»، – دەدى ماۋلەن اشىمبايەۆ.

سەنات ءتوراعاسى جاستارعا دەنساۋلىققا باس ءمان بەرگەن ءجون ەكەنىن اتاپ ءوتتى. الداعى ۋاقىتتا ءبىلىم مەن عىلىمنىڭ، تەحنولوگيالاردىڭ ءرولى كۇرت ارتاتىن بولادى، سونىمەن قاتار دەنساۋلىقتى ساقتاۋ، سالاماتتى ءومىر سالتىن ۇستانۋ – ادامنىڭ ءوز بولاشاعىنا سالعان ەڭ باستى ينۆەستيسياسى، دەدى ماۋلەن اشىمبايەۆ.

«پاندەميا جاعدايى عىلىمنىڭ قانشالىقتى ماڭىزدى ەكەنىن دالەلدەدى. بۇرىن-سوڭدى بولماعان جىلدامدىقپەن ۆاكسينالار ويلاپ تابىلدى. بۇل ءوز كەزەگىندە ىندەتتى سالىستىرمالى تۇردە جەدەل ەڭسەرۋگە مۇمكىندىك بەردى. جالپى العاندا، كۇندەلىكتى ومىرىمىزدە عىلىمنىڭ ءرولى ارتىپ كەلەدى. كەيىنگى بەس جىلدا ەلىمىزدە ماگيستراتۋرا مەن دوكتورانتۋرادا ءبىلىمىن جالعاستىرعىسى كەلەتىن جاستار سانى ءوسىپ وتىر. الايدا، ولاردىڭ 9 پايىزى عانا عىلىمي قىزمەتپەن اينالىسادى»، - دەدى ماۋلەن اشىمبايەۆ.

سەنات ءتوراعاسىنىڭ پىكىرىنشە، سونداي-اق بۇگىندە سانانىڭ اشىقتىعى، الەۋمەتتىك يكەمدىلىك، ەموسيونالدى تۇراقتىلىق، توزىمدىلىك، ورتامەن ءتىل تابىسۋ ايرىقشا ماڭىزعا يە.

«تەحنولوگيالار مەن روبوتتاندىرۋدىڭ قارقىندى دامۋى قوعامنىڭ قاراپايىم ەڭبەككە دەگەن سۇرانىسىن ازايتا بەرەدى. سول سەبەپتى، وي ەڭبەگىن، شىعارماشىلىق كوزقاراستى تالاپ ەتەتىن باعىتتارعا باسا ءمان بەرۋىمىز كەرەك. سوندىقتان پرەزيدەنتىمىز ەلىمىزدە ادام كاپيتالىن، كرەاتيۆتى يندۋستريانى دامىتۋ قاجەتتىگىن ۇنەمى ايتىپ كەلەدى»، - دەدى ماۋلەن اشىمبايەۆ.

سەنات ءتوراعاسىنىڭ پىكىرىنشە، بۇل جاعدايدا ەلىمىزدىڭ بولاشاعىن باياندى ەتۋ جانە تاۋەلسىزدىگىمىزدى نىعايتۋ ماڭىزدى شارت بولىپ وتىر، جاستار وسى تالاپتاردىڭ ۇدەسىنەن شىعا ءبىلۋى كەرەك. وسى ورايدا وزدەرىڭىزدەي جاس بۋىنعا ۇلكەن سەنىم ءارى جاۋاپكەرشىلىك جۇكتەلەدى. ال مەملەكەت ءوز تاراپىنان جاستاردى قولداۋ جۇمىستارىن جالعاستىرا بەرەدى، دەدى سەنات باسشىسى.

شارا بارىسىندا ماۋلەن اشىمبايەۆ پەن ايدا بالايەۆا "دارىن" مەملەكەتتىك جاستار سىيلىعىنىڭ لاۋرەاتتارىنا توسبەلگىلەرى مەن ديپلومدارىن تابىس ەتتى.

«دارىن-2021» مەملەكەتتىك جاستار سىيلىعىنىڭ لاۋرەاتتارى:

1. «عىلىم» نوميناسياسى - ەسىركەگەنوۆ نۇرعيسا امانگەلدى ۇلى؛


2. «قوعامدىق قىزمەت» نوميناسياسى - سانسىزباي ۇلى بالمەيىر، باحرەتدينوۆ ۆاليحان كابيمۋللايەۆيچ؛


3. «جۋرناليستيكا» نوميناسياسى - كەڭشىلىك عالىمجان باۋىرجان ۇلى، تۇلجان اقبوبەك نۇرباۋلىقىز؛


4. «حالىق شىعارماشىلىعى» نوميناسياسى - ەلەۋسىز ارداق تيمۋر ۇلى، ولجاباي تەمىرلان ماقسات ۇلى، ناۋرىز ەرنات نۇربەرگەن ۇلى؛


5. «كلاسسيكالىق مۋزىكا» نوميناسياسى - ءابىلدا التىنبەك ەركىنباي ۇلى؛


6. «تەاتر جانە كينو» نوميناسياسى - تانابايەۆا اقمارال نۇراي قىزى، قانات قىزى ريزا؛


7. «سپورت» نوميناسياسى - سون يگور سەرگەيەۆيچ، سمەتوۆ ەلدوس باقتىباي ۇلى؛


8. «ەسترادا» نوميناسياسى - بايدۇكەنوۆا رۋحيا ەدىل قىزى، المادييەۆ الىبەك بەكبولات ۇلى؛


9. «ادەبيەت» نوميناسياسى - سارسەنحان باتىرحان ءبورىحان ۇلى، احمەر ءبىرجان ەرمەك ۇلى؛


10. «ديزاين جانە بەينەلەۋ ونەرى» نوميناسياسى - بەكبولاتوۆ اتابەك الىبەك ۇلى.