شقو اكىمى دانيال احمەتوۆ شقو ءسۇت ءوندىرىسىن دامىتۋدىڭ ستراتەگيالىق باعىتتارىن ايقىندادى جانە الماتى قالاسىنداعى يمپورتتىق ءسۇت ونىمدەرىنە تالداۋ جاساۋدى تاپسىردى. ونداعى ماقسات – قاجەتتى جابدىقتار ساتىپ الىپ، وتاندىق نارىققا شەتەلدەن جەتكىزىلەتىن تاۋار تۇرلەرىن شىعىستا شىعارۋ.

شىعىس قازاقستان وبلىسىندا ءسۇت ءوندىرىسىن ۇلعايتۋدىڭ نەگىزگى الەۋەتى حالىقتان ءسۇت ساتىپ الۋ بولىپ تابىلادى. مۇنى ءسۇت فەرمالارى مەن كووپەراتيۆتەر قۇرۋ ارقىلى جاساۋعا بولادى.

–  ەگەر ءتيىمدى جانە اشىق ساتىپ الۋ جۇيەسى بولماسا، ەشقاشان ءسۇت-تاۋارلى پۋنكتتەر، كووپەراتيۆتەر دامىمايدى. تولەم جوق بولسا، نەگە ساتىپ الامىز، – دەدى شقو اكىمى دانيال احمەتوۆ. – اۋىل شارۋاشىلىعى باسقارماسى الگوريتم جاساپ، وسىعان بايلانىستى اۋىل اكىمى، ۆەتەرينارلاردىڭ نە ىستەۋ كەرەكتىگىن ناقتىلاۋ كەرەك. باسقارما وسى ماسەلەدە قاداعالاۋ فۋنكسياسىن اتقارۋى ءتيىس.

حالىقتى ءسۇت وڭدەۋ كاسىپورىندارىمەن جانە ءسۇت فەرمالارىمەن جۇمىس ىستەۋگە ىنتالاندىرۋ قاجەتتىگى اۋىل شارۋاشىلىعى باسقارماسىنىڭ كۇن تارتىبىندە تۇرعان وزەكتى ماسەلە. سونداي-اق، ايماق باسشىسى سۋبسيديا ءبولۋ ۇردىسىنە ەرەكشە نازار اۋدارۋ قاجەتتىگىن دە جەتكىزدى. ويتكەنى، 4000 ليتر ءسۇت پەن 20 ليتر ءسۇت بەرەتىن ەكى ءتۇرلى سيىر ءۇشىن فەرمەرلەردىڭ تەڭ دەڭگەيدە سۋبسيديا الۋى ادىلەتسىز. الداعى تاڭدا شقو ساۋىلاتىن ءسۇتتىڭ شەكتى دەڭگەيىن بەكىتىلمەك، ال ونى ورىنداي العان فەرمەر مەملەكەتتىك قولداۋعا يە بولادى.

– ىلگەرى باسپايتىن ءىستى نەگە سۋبسيديالايمىز؟ شەكتى دەڭگەيدى بەكىتۋ كەرەك. مىسالى، 4000 ليترگە جەتتى مە، سوندا عانا وبلىستىڭ سۋبسيديالارى ءبولىنۋى ءتيىس. ال اۋىل شارۋاشىلىعىن باسقارماسى وسى باعدارلامانى ەكونوميكا باسقارماسىندا دالەلدەپ، قورعاۋى كەرەك، –دەپ تاپسىردى وبلىس اكىمى.

كەزدەسۋ قورىتىندىسى بويىنشا ايماق باسشىسى 2018 جىلى قىتايدىڭ ەكسپورتتىق الەۋەتىنە نازار اۋدارۋ كەرەكتىگىن اتاپ ءوتتى. سونداي-اق، ءىرى ءسۇت فەرمالارىن ودان ءارى دامىتۋدى قولعا الىپ، قۇرىلىسىمەن جانە قايتا قۇرۋمەن اينالىسۋدى جۇكتەدى. باستى ماقسات – ولاردى زاماناۋي جابدىقتار جاراقتاندىرۋ.