وسكەمەندە شىعىس قازاقستان، پاۆلودار وبلىستارى مەن الماتى قالاسى تاۋار وندىرۋشىلەرىنىڭ قاتىسۋىمەن «مەكتەپتەر مەن مەكتەپكە دەيىنگى مەكەمەلەرگە ارنالعان جيھاز ونىمدەرى» كورمەسى ءوتتى.



وڭىردە جيھازدىڭ سان ءتۇرىن شىعاراتىن 34 كاسىپورىن جۇمىس ىستەيدى. ءونىم ساپاسى شەتەلدىكىنەن اسىپ تۇسپەسە، كەم ەمەس. دەگەنمەن، مەكتەپتەر مەن بالاباقشالار جانە وبلىستاعى وزگە الەۋمەتتىك نىساندار جەرگىلىكتى جيھازدى تۇتىنا بەرمەيدى. بۇل، البەتتە، ايماقتىق مازمۇننىڭ تومەندەۋىنە سەبەپ. ەندىگى مىندەت: ولقىلىقتىڭ ورنىن تولتىرىپ، شقو تاۋار وندىرۋشىلەرىن قولداۋ.

– اركەز مەكتەپتەردى ارالاعاندا ولاردىڭ بىزدە شىعاتىن جيھازدى ەمەس، وزگەنىكىن قولداناتىنى تاڭعالدىرادى. بيىل 7 مەكتەپ سالىنىپ جاتىر. وعان قۇيىلعان قاراجات تا كولەمدى. سوندىقتان ايماقتاعى مەكتەپتەر وزىمىزدە شىعاتىن جيھازدى الۋى كەرەك. ساپالى، كوپ قىزمەتتى مەكتەپكە ارنالعان جيھاز جاساي باستاعان سوڭ، دەنساۋلىق ساقتاۋ سالاسىنىڭ نىساندارىن قامتي باستايمىز، – دەدى وبلىس اكىمى دانيال احمەتوۆ.

ءبىر عانا وسكەمەندە 404 ءپروفيلدى كابينەت وبلىس اكىمىنىڭ تاپسىرماسى بويىنشا حالىقارالىق ستاندارتقا ساي جەرگىلىكتى كاسىپكەرلەر شىعاراتىن جيھازبەن جابدىقتالادى. دەسە دە، باستى ماسەلە – تاۋار ساپاسى. وسى ماقساتتا الدىمەن وڭىردە ءبىرىڭعاي ستاندارت جاسالۋى ءتيىس. سونداي-اق، بۇدان بىلاي شقو تاۋار وندىرۋشىلەرى ارنايى نەسيە شارتى بويىنشا ، ياعني، 8 جىلعا 8،5 پايىزدىق ۇستەمەمەن قارجىلاي كومەككە يە بولادى. ول ءۇشىن «دامۋ» قورىمەن ءوزارا كەلىسىمگە ءمور باسىلدى.