وبلىس باسشىسى الدىمەن كۇردەلى جوندەۋ جۇمىستارى ءجۇرىپ جاتقان اباي اتىنداعى تەاترىنا باردى. بۇگىندە تەاتردىڭ جوندەۋ جۇمىستارىنىڭ باسىم بولىگى اياقتالعان. قۇرىلىسشىلار ونەر ورداسىنىڭ شاتىرىن، سىرتقى قاسبەتىن جانە تەاتر ىشىندەگى باسپالداقتارعا كۇردەلى جوندەۋ جۇمىستارىن جۇرگىزىپ ۇلگەرگەن. قازىرگى تاڭدا ەكىنشى قاباتتاعى فويەنىڭ جوندەۋ جۇمىستارى قىزۋ ءجۇرىپ جاتىر.
تەاتردا جۇمىس ىستەيتىن اكتەرلەر كۇردەلى جوندەۋ جۇمىستارى جۇرگىزىلگەن تەاتردىڭ كورىكتى ساحاناسىندا جاڭا قويىلىم بويىنشا دايىندىق جۇمىستارىن باستاپ كەتكەنىن ايتا كەتۋىمىز كەرەك.
ونەر ورداسىن ارالاپ، كۇردەلى جوندەۋ جۇمىستارىنىڭ قالاي جۇرگىزىلگەنىمەن مۇقيات تانىسقان دانيال احمەتوۆ:
– جارايسىڭدار، تەاتردىڭ كۇردەلى جوندەۋ جۇمىستارى وتە ساپالى جۇرگىزىلگەن. ابايدىڭ 175 جىلدىق مەرەيتويى قارساڭىندا قالا تۇرعىندارى ءۇشىن ۇلكەن سىي بولدى، – دەپ قۇرىلىسشىلارعا العىسىن ءبىلدىردى.
دانيال احمەتوۆ سەمەي قالاسىنا جاساعان جۇمىس ساپارى بارىسىندا اباي مەن بالالارىنىڭ ءمۇسىنىن جاساعان جاس ءمۇسىنشى نۇربول قاليمەن تانىسىپ، ونىڭ جاساعان ءمۇسىنى كەرمەت ونەر تۋىندىسى ەكەنىن ايتتى.
– اباي مۇراجايىندا اباي مەن بالالارىنىڭ ءمۇسىنىن جاساپ شىققان جاس مۇسىنشىمەن تانىسقانىما قۋانىشتىمىن. ابايدىڭ 175 جىلدىق مەرەيتويى قارساڭىندا تۇرعىزىلعان جاڭا ءمۇسىن ابايدىڭ وتباسىمەن تۇسكەن وتباسىنىڭ نەگىزىندە جاسالعانىن بىلەمىن. سول سۋرەتكە كوز سالعاندا ابايدىڭ ءبىرىنشى كەزەكتە وتباسىنىڭ ۇيىتقىسى، بالالارىنا قامقورشى اكەسى ەكەنى بىردەن كوزگە تۇسەدى. نۇربول اباي مەن بالالارى اراسىنداعى سول ءبىر جىلى قاتىناستى مۇسىندە انىق كورسەتۋگە تالپىنعان. وسىنداي تاماشا ءمۇسىندى قولدان قاشاپ شىققان نۇربولعا شىعارماشىلىق تابىس تىلەيمىن، – دەپ دانيال احمەتوۆ جاس مۇسىنشىگە ءوزىنىڭ العىسىن ءبىلدىردى.
جاس ءمۇسىنشىنىڭ قولىنان شىققان سەمەيدەگى اباي مۇراجايىنىڭ اۋماعىنا ورنالاسقان. الداعى ۋاقىتتا ونى رەسمي تۇردە اشۋ جوسپارلانۋدا. قازىرگى تاڭدا جاڭا ەسكەرتكىشتىڭ اينالاسىنا ورىندىقتار قويىلىپ، جالعىز اياق جولدارعا تاستار توسەلىنۋدە.
سەمەي ەلىمىزدەگى كونە قالالاردىڭ ءبىرى ەكەنى بەلگىلى. سوندىقتان قالاداعى تاريحي ماڭىزى زور عيمارتتاردى كوزدىڭ قاراشىعىنداي ساقتاپ، كەلەر ۇرپاققا اماناتتاۋدىڭ ماڭىزى زور. دانيال احمەتوۆ سەمەيگە ات باسىن بۇرعاندا جەرگىلىكتى بيلىك ورىندارىنا وسى ماسەلەگە نازار اۋدارۋى كەرەك ەكەنىن العا تارتتى.
ءقازىر سەمەيدەگى «ماڭگىلىك ەل» اۋماعىندا جۇرگىنشى جولدارى جوندەلىپ، گرانيت تاستار ءتوسىلىنىپ، كوگالدار مەن گۇلدەر ەگىلۋدە. جوندەۋ جۇمىستارى ءجۇرىپ جاتقان اۋماقتاعى تاريحي عيماراتتاردىڭ و باستاعى كەيپىن ساقتاپ جاڭعىرتۋ جۇمىسى دا قارقىندى ءجۇرىپ جاتقانىنا دانيال احمەتوۆ ريزاشىلعىن ءبىلدىردى.
– «ماگىلىك ەل» كوشەسىنىڭ بويىنداعى عيماراتتار ءبىر ءتۇستى بولعانى ماڭىزدى. كوشە بويىمەن سەرۋەندەگەن قالا تۇرعىندارى وزدەرىنىڭ 19 عاسىرعا تاپ بولعانداي سەزىنۋى كەرەك. بۇل جەردىڭ وزىنە ءتان اۋاراسى بولۋى ءتيىس. مۇمكىن بولسا، كوشە بويىنداعى جارىق شامدار دا كونە سەمەيدى ەسكە سالىپ تۇراتىن كلاسسيكالىق ۇلگىدە بولعانى ءجون، – دەپ وبلىس باسشىسى ءوز ويىن ورتاعا سالدى.
وبلىس اكىمى سەمەي قالاسىنداعى پەريناتالدى ورتالىققا جوندەۋ جۇمىستارىن جۇرگىزىپ جاتقان اقمولا وبلىسىنىڭ «بايسىن ا» كومپانياسىنىڭ سالعىرتتىعىن سىنعا الدى.
– وكىنىشكە وراي، پەريناتالدى ورتالىققا جوندەۋ جۇمىسىن جۇرگىزۋشى كومپانيا وزدەرىنە تاپسىرىلعان جۇمىسقا سالعىرت قاراۋدا. اتالمىش كومپانيا سەمەيدەگى پەريناتالدى ورتالىقتىڭ 2-3 بلوگىنا جوندەۋ جۇمىستارىن جۇرگىزۋگە قاتىستى بايقاۋدا جەڭىمپاز دەپ تانىلعان-دى. وكىنىشكە وراي، جوندەۋ ءجۇمىستارى باياۋ ءجۇرىپ جاتىر. جەرگىلىكتى بيلىك ورگاندارى ورتالىقتى جوندەۋ ءۇشىن 700 ملن تەڭگە بولگەن بولاتىن. وسى ۋاقىتقا دەيىن مەردىگەر كومپانيا بولىنگەن قارجىنىڭ 20 ملن تەڭگەسىن يگەرگەن. ەگەر الداعى ۋاقىتتا كومپانيا باسشىلارى جۇمىستى شيراتپاسا، زاڭ نەگىزىندە اراداعى كەلسىم-شارتتى ۇزۋگە ءماجبۇر بولامىز. بۇل ءۇشىن ولارعا 10 كۇن ۋاقىت بەرەمىز. جوسپار بويىنشا قۇرىلىس باسىندا 200 ادام ءجۇمىس ىستەۋى كەرەك ەدى. وكىنىشكە وراي، ءقازىر مۇنداي 50-دەن استام ەڭبەك ەتۋدە، – دەپ وبلىس اكىمى مەردىگەر كومپانياعا جۇمىستى شيراتۋدى تالاپ ەتتى.
