وتكەن اپتادا شۋ اۋدانىنىڭ اكىمى قايرات دوسايەۆ اۋدان ورتالىعىنان شالعاي ورنالاسقان دالاقاينار اۋىلىنا جۇمىس ساپارىمەن باردى. بۇل ساپار وبلىس اكىمى بەكىتكەن  جۇمىس الگوريتمىنە سايكەس جۇزەگە اسقاندىعىن اتاپ ءوتۋ قاجەت. اۋدان باسشىسىنىڭ اتالمىش اۋىلعا ساپارى اۋىلدىڭ الەۋمەتتىك نىساندارىن ارالاۋمەن باستالدى.  

قايرات اسكەربەك ۇلى ەڭ اۋەلى 50 ورىندىق «كاۋسار» بالالار باقشاسىنىڭ تىنىس-تىرشىلىگىنە تانىسىپ، بالالاردىڭ مەزگىلدىك تاماقپەن قامتىلۋى، ولارعا جاسالاتىن جايلىلىق، كورسەتىلەتىن قىزمەت ساپاسىن كوزبەن كورىپ، كەيبىر كەمشىلىكتەرگە سىن-ەسكەرتپەلەر ايتتى. كەلەسى باعىت اۋىلدىق دارىگەرلىك امبۋلاتوريا بولدى. مۇندا ءۇش ۋچاسكەلىك دارىگەر جانە ءبىر اعا دارىگەر كۇنىنە 15 ادامعا مەديسينالىق قىزمەت كورسەتەدى. اۋدان باسشىسى مەديسينا ماماندارىنا ادام دەنساۋلىعى ەڭ باستى بايلىق ەكەندىگىن ەسكە سالىپ، ءوز ىستەرىنە بىلىكتى بولۋلارىن تالاپ ەتتى.

دالاقايناردا بولات تاۋتانوۆ ەسىمدى ازامات  جەكە كاسىپپەن اينالىسىپ، ءوز ءىسىن دوڭگەلەتىپ وتىر. 2012 جىلى «بيزنەستىڭ جول كارتاسى - 2020» مەملەكەتتىك باعدارلاماسى ارقىلى 1 ملن تەڭگە نەسيە الىپ، اناسى ەكەۋى ناۋبايحانا اشقان. كۇنىنە 50 نان ءپىسىرىپ، بىرەۋىن 100 تەڭگەدەن وتكىزۋدە. جەكە كاسىبىن ۇلعايتۋ ماقساتىندا وتكەن جىلى جاڭا نىساننىڭ قۇرىلىسىن باستاپ كەتكەن. قۇرىلىس اياقتالعاننان كەيىن كورشىلەس اۋىلدىق وكرۋگتەرگە دە نان وتكىزىپ، اۋىلدىقتاردى جۇمىسپەن قامتىماقشى. كاسىپكەر ءىسىنىڭ العا جىلجي بەرۋىنە اركەز قولداۋ بىلدىرەتىنىن جەتكىزگەن اۋدان اكىمى جۇمىستارىنا ساتتىلىك تىلەدى.

بۇدان كەيىن ت.اشىمبايەۆ اتىنداعى ورتا مەكتەپتە اۋىل تۇرعىندارىمەن بەيرەسمي فورماتتا كەزدەسۋ ءوتتى. كەزدەسۋگە اۋدان اكىمدىگىنە قاراستى ءبىرقاتار ءبولىم باسشىلارى دا كەلىپ، ءوز سالالارى بويىنشا اۋىلدا ورىندالماي تۇرعان مەجەلەردى اتاپ ءوتىپ، قازىرگى تاڭدا ەلىمىزدە ورىن الىپ جاتقان جاڭاشىلدىقتاردى ءتۇسىندىردى. ماسەلەن، اۋداندىق «جاستار رەسۋرستىق ورتالىعىنىڭ» ديرەكتورى اينۇر راحىمبايەۆا وتكەن جىلى جۇزەگە اسقان «جاس پروجەكت» جوباسىنا اۋىل جاستارىنىڭ بەلسەندىلىگى تومەن بولىپ، تەك ءبىر جاس قانا قاتىسىپ، قازىرگى تاڭدا ءوز كاسىبىمەن اينالىسىپ جاتقاندىعىن ايتتى. ال «سەرپىن-2050» مەملەكەتتىك باعدارلاماسىنا اتالمىش اۋىلدان ءۇش جاس تەرىسكەي وڭىرگە وقۋعا اتتانعان. قايرات اسكەربەك ۇلى بۇل كورسەتكىشتى دە تومەن ساناپ، جوعارعى وقۋ ورنىندا تەگىن ءبىلىم الۋ مۇمكىندىگىن ءار اۋىل بالاسى پايدالانىپ قالۋ كەرەكتىگىن اتاپ ءوتتى.

جالپى اۋداندا جاستاردىڭ سپورتپەن شۇعىلدانۋى ءۇشىن 16 اۋىلدىق وكرۋگتە سپورت الاڭدارى سالىنعالى جاتىر. جوسپاردا دالاقاينار اۋىلى دا بار. ءبىراق الاڭ سالۋعا جەر دايىنداۋ، كاسىپكەرلەردى تارتۋ سىندى جۇمىستار اۋىلدىق اكىمشىلىك تاراپىنان ءالى كۇنگە جۇرگىزىلمەگەن. بۇل ماسەلەنى دە سىنعا العان اۋدان باسشىسى اۋىل اكىمى جايسانبەك بەكبوسىنوۆقا ماسەلەنى تەزىرەك شەشۋىن تالاپ ەتتى.