بۇل تۋرالى Sputnik قازاقستان اگەنتتىگى حابارلادى.
كەشە ق ر ءبىلىم جانە عىلىم ءمينيسترىنىڭ بۇيرىعىمەن جوعارى جانە ودان كەيىنگى وقۋ ورىندارىنداعى ماماندىقتار تىزىمىنەن «قازاق ءتىلى»، «قازاق ادەبيەتى»، «قازاق تاريحى»، «لينگۆيستيكا»، «شىعىستانۋ» سياقتى ماماندىقتار الىنىپ تاستالىندى دەگەن اقپارات تارادى. ءبىلىم جانە عىلىم مينيسترلىگى «قازاقستان رەسپۋبليكاسىنداعى جوعارعى جانە جوعارعىدان كەيىنگى ءبىلىم بەرۋ ماماندىقتارىنىڭ كلاسسيفيكاتورى» دەگەن قۇجاتىنىڭ جاڭا نۇسقاسىن بيىلعى 1-اقپاننان باستاپ قولدانىسقا ەنگىزدى.
اتالعان قۇجاتتىڭ «باكالاۆريات ماماندىقتارى» دەگەن بولىمىندە قازاق ءتىلى جانە قازاق ادەبيەتى ماماندىعى اتىمەن جوق. ونىڭ ورنىنا «مۇعالىمدەردى تىلدەر مەن ادەبيەت بويىنشا دايارلاۋ» (پودگوتوۆكا ۋچيتەلەي پو يازىكام ي ليتەراتۋرە) دەپ جازىلعان.
ساعادييەۆ جەتەكشىلىك ەتكەن مينيسترلىك قازاق ۇلتىن، ءتىلىن جويۋعا باعىتتالعان باستاماسىنا نارازىلىق بىلدىرگەن ەلىمىزدىڭ ءبىر توپ عالىمى مارات ءتاجين، گۇلشارا ءابدىقالىقوۆا مەن باقىتجان ساعىنتايەۆتىڭ اتىنا حات جولداعان بولاتىن.
«بۇدان زەردەسىز جاڭالىق مەن ەستىگەن جوقپىن. كەز كەلگەن مۇنداي شەشىمدەردىڭ كۇشى جويىلادى. الاڭداماڭىزدار. ارانداتۋعا ەرمەڭىزدەر. بۇل مۇمكىن ەمەس. ول بولمايدى»
، — دەدى بۇگىن ەرلان ساعادييەۆ پارلامەنتتە جۋرناليستەرگە.
مينيستر بۇل بۇيرىق تۋرالى ەستىمەگەنىن ايتتى.
«ءتۇرلى الىپ قاشپا اڭگىمە بولادى. مينيسترلىك بارلىعىن اشىق ىستەيدى. ەڭ الدىمەن ءار بۇيرىعىمىزدى پەداگوگيكالىق قوعاممەن، مۇعالىمدەرمەن، اتا انالارمەن تالقىلاپ، سوسىن ءبىر شەشىمگە كەلەمىز. سىزدەر ايتىپ وتىرعان ماسەلەنى مەن ەستىگەن ەمەسپىن» — دەدى ەرلان ساعادييەۆ.
