ايەلىن ۇرىپ ءولتىردى دەگەن كۇدىككە ىلىنگەن قۋاندىق بيشىمبايەۆتىڭ ۇيالى تەلەفونىن ۇلتتىق قاۋىپسىزدىك كوميتەتىنىڭ قىزمەتكەرلەرى دە اشا الماي قويعان، - دەپ حابارلايدى Dalanews.kz.
بۇل تۋرالى سوت وتىرىسىندا سۋديا ايجان قۇلبايەۆا ايتتى. ونىڭ سوزىنشە، بيشىمبايەۆتىڭ تەلەفونىن ۇلتتىق قاۋىپسىزدىك كوميتەتىنىڭ تەحنيكالىق ماماندارى اشا الماي قويعان.
قۋاندىق بيشىمبايەۆتىڭ تەلەفونى سوتقا دەيىنگى تەرگەۋ بارىسىندا زاتتاي دالەل رەتىندە تىركەلگەن.
"قىلمىستىق ءىس جۇرگىزۋ كودەكسىنىڭ 375-بابىنا سايكەس زاتتاي دالەلدەردى قاراۋ سوت تەرگەۋىنىڭ كەز كەلگەن ساتىندە جۇرگىزىلەدى. سوتقا دەيىنگى تەرگەۋ بارىسىندا وسى تەلەفونعا قاتىستى ۇقك-نىڭ 5-قىزمەتىنىڭ 12-دەپارتامەنتى زەرتتەۋ جۇرگىزدى. IPhone 13 Pro max ۇيالى تەلەفونىنا التى تاڭبالى كود قۇپيا ءسوز رەتىندە قويىلعان. ونى قولدا بار تەحنيكالىق قۇرالدارمەن اشۋ مۇمكىن بولمادى"، – دەدى سۋديا.
ال پروكۋرور ايجان ايماعانوۆا مۇنداي ارەكەت دۇرىس ەمەس ەكەنىن ايتتى.
"ولاردىڭ ارەكەتى دۇرىس ەمەس دەپ ويلايمىن. نۇكەنوۆا مەن بايجانوۆتىكى سەكىلدى بيشىمبايەۆتىڭ دا تەلەفونى زاتتاي دالەل دەپ تانىلدى. ولاردىڭ ۇيالى تەلەفونى باستان-اياق تەكسەرىلدى، سول سياقتى بيشىمبايەۆتىكىن دە تولىق قاراپ شىعۋ كەرەك"، – دەپ مالىمدەدى مەملەكەتتىك ايىپتاۋشى.
ونىڭ سوزىنشە، ادۆوكاتتار ءقۇپياسوزدى ايتپاي وتىرعاندىقتان، تەلەفوندى قارالماعان دەپ تانۋ كەرەك.
بۇعان دەيىنگى سوت وتىرىستارىندا مارقۇم سالتانات نۇكەنوۆانىڭ، ونىڭ كومەكشىسىنىڭ،تاعى ءبىر ايىپتالۋشى - باقىتجان بايجانوۆتىڭ، سالتاناتتىڭ اعاسى ايتبەك امانگەلدىنىڭ جانە قۇربىلارىنىڭ ۇيالى تەلەفوندارى ايعاق رەتىندە سوت وتىرىسىندا ەش كەدەرگىسىز زەرتتەلىپ شىققان بولاتىن.
ايتا كەتەيىك، ساراپشىلار بيشىمبايەۆ پەن بايجانوۆتىڭ ادۆوكاتتارى سوتتا بىرلەسىپ جۇمىس ىستەپ وتىر دەگەن ويدا. الەۋمەتتىك جەلىدەگى ۆيدەو اۆتورىنىڭ سوزىنشە، سوتتا بايجانوۆ پەن بيشىمبايەۆ تاراپى بىر-بىرىنە قارسى بولىپ وتىرعانىمەن، ولاردىڭ ايتاتىن نارسەلەرى الدىن الا كەلىسىلگەن.
«ولاردىڭ ۇستانىمى قانداي؟ مەنىڭشە، بيشىمبايەۆتىڭ ارەكەتىن بايجانوۆتىڭ ارەكەتىنەن ءبولىپ قاراۋ. سەبەبى بيشىمبايەۆتىڭ قىلمىستىق ءىس قۇرامىندا ەكى نە ودان كوپ ادام بولىپ كەتپەۋى كەرەك. قىلمىستىق باپ جەڭىل بولۋى ءۇشىن. بيشىمبايەۆتىڭ قورعاۋشىلارى ونى ادامدار توبىمەن جازاعا تارتپاۋىن قالاپ وتىر. بۇل ونىڭ جازاسىن وتەۋ مەرزىمىن ەكى ەسە قىرقارتۋى مۇمكىن. بايجانوۆ تاراپى وزىنشە قورعالىپ جاتىر.
بايجانوۆ قىلمىستى جاسىرىپ قالۋ، قىلمىس تۋرالى حابارلاماۋ دەگەن سەكىلدى باپتارمەن كەتۋى مۇمكىن. وسىلايشا بيشىمبايەۆتىڭ جازاسىن وتەۋ مەرزىمى ازايادى. ياعني باقىتجان ءوز باعىتىندا ادۆوكاتتارمەن قورعاۋ جۇمىستارىن جۇرگىزەدى، بيشىمبايەۆ بولەك. ولاردىڭ باپتارى ءارتۇرلى بولادى. سوندىقتان ادامدار توبىمەن قىلمىس جاساۋ دەگەن قاراستىرىلمايدى»، - دەيدى اۆتور.
ۆيدەو اۆتورىنىڭ سوزىنشە، بيشىمبايەۆ ءومىر بويىنا سوتتالادى دەگەن بولجام ورىندالماۋى مۇمكىن.
«سەبەبى القابيلەر ءبىراۋىزدان ول كىنالى دەپ تانىپ، ونى ءومىر بويىنا سوتتاۋعا داۋىس بەرۋى كەرەك. ءبىراق ولاي بولمايدى. سەبەبى داۋىس بەرۋ جاسىرىن جۇرگىزىلەدى جانە القابيلەردىڭ بىرەۋى قارسى بولۋى مۇمكىن»، - دەيدى اۆتور.
بۇعان دەيىن بيشىمبايەۆ تەلەفونىنىڭ قۇپيا ءسوزىن ءالى بەرمەگەنىن حابارلاعان ەدىك. بيشىمبايەۆتىڭ ادۆوكاتتارى ونىڭ تەلەفونىن زەرتتەۋ سوت زالىندا مىندەتتى ەمەس ەكەنىن ايتىپ، ءوتىنىش جاسادى. ارتىنشا قورعاۋشىلار بيشىمبايەۆتىڭ تەلەفونىن وزدەرى اشۋىن سۇرادى.
ەسكە سالايىق، بۇعان دەيىن قۋاندىق بيشىمبايەۆ ۇيالى تەلەفونىنىڭ ءقۇپياسوزىن ادۆوكاتىنان باسقا ەشكىمگە بەرمەيتىنىن ايتقان بولاتىن.
بيشىمبايەۆتىڭ ادۆوكاتتارى ءقۇپياسوز اشىق ايتىلسا ونىڭ ىشىندەگى جەكە اقپاراتتارى تاراپ كەتە مە دەپ قورقاتىنىن جەتكىزدى.
جابىرلەنۋشى تاراپ قۋاندىق بيشىمبايەۆ ءقۇپياسوزىن اشىق ايتۋدى تالاپ ەتتى.
