Áielin uryp óltirdi degen kúdikke ilingen Qýandyq Bishimbaevtyń uialy telefonyn Ulttyq qaýipsizdik komitetiniń qyzmetkerleri de asha almai qoiǵan, - dep habarlaidy Dalanews.kz.
Bul týraly sot otyrysynda sýdia Aijan Qulbaeva aitty. Onyń sózinshe, Bishimbaevtyń telefonyn Ulttyq qaýipsizdik komitetiniń tehnikalyq mamandary asha almai qoiǵan.
Qýandyq Bishimbaevtyń telefony sotqa deiingi tergeý barysynda zattai dálel retinde tirkelgen.
"Qylmystyq is júrgizý kodeksiniń 375-babyna sáikes zattai dálelderdi qaraý sot tergeýiniń kez kelgen sátinde júrgiziledi. Sotqa deiingi tergeý barysynda osy telefonǵa qatysty UQK-nyń 5-qyzmetiniń 12-departamenti zertteý júrgizdi. IPhone 13 Pro max uialy telefonyna alty tańbaly kod qupiia sóz retinde qoiylǵan. Ony qolda bar tehnikalyq quraldarmen ashý múmkin bolmady", – dedi sýdia.
Al prokýror Aijan Aimaǵanova mundai áreket durys emes ekenin aitty.
"Olardyń áreketi durys emes dep oilaimyn. Núkenova men Baijanovtiki sekildi Bishimbaevtyń da telefony zattai dálel dep tanyldy. Olardyń uialy telefony bastan-aiaq tekserildi, sol siiaqty Bishimbaevtikin de tolyq qarap shyǵý kerek", – dep málimdedi memlekettik aiyptaýshy.
Onyń sózinshe, advokattar qupiiasózdi aitpai otyrǵandyqtan, telefondy qaralmaǵan dep taný kerek.
Buǵan deiingi sot otyrystarynda marqum Saltanat Núkenovanyń, onyń kómekshisiniń,taǵy bir aiyptalýshy - Baqytjan Baijanovtyń, Saltanattyń aǵasy Aitbek Amangeldiniń jáne qurbylarynyń uialy telefondary aiǵaq retinde sot otyrysynda esh kedergisiz zerttelip shyqqan bolatyn.
Aita keteiik, sarapshylar Bishimbaev pen Baijanovtyń advokattary sotta birlesip jumys istep otyr degen oida. Áleýmettik jelidegi video avtorynyń sózinshe, sotta Baijanov pen Bishimbaev tarapy bir-birine qarsy bolyp otyrǵanymen, olardyń aitatyn nárseleri aldyn ala kelisilgen.
«Olardyń ustanymy qandai? Menińshe, Bishimbaevtyń áreketin Baijanovtyń áreketinen bólip qaraý. Sebebi Bishimbaevtyń qylmystyq is quramynda eki ne odan kóp adam bolyp ketpeýi kerek. Qylmystyq bap jeńil bolýy úshin. Bishimbaevtyń qorǵaýshylary ony adamdar tobymen jazaǵa tartpaýyn qalap otyr. Bul onyń jazasyn óteý merzimin eki ese qyrqartýy múmkin. Baijanov tarapy ózinshe qorǵalyp jatyr.
Baijanov qylmysty jasyryp qalý, qylmys týraly habarlamaý degen sekildi baptarmen ketýi múmkin. Osylaisha Bishimbaevtyń jazasyn óteý merzimi azaiady. Iaǵni Baqytjan óz baǵytynda advokattarmen qorǵaý jumystaryn júrgizedi, Bishimbaev bólek. Olardyń baptary ártúrli bolady. Sondyqtan adamdar tobymen qylmys jasaý degen qarastyrylmaidy», - deidi avtor.
Video avtorynyń sózinshe, Bishimbaev ómir boiyna sottalady degen boljam oryndalmaýy múmkin.
«Sebebi alqabiler biraýyzdan ol kináli dep tanyp, ony ómir boiyna sottaýǵa daýys berýi kerek. Biraq olai bolmaidy. Sebebi daýys berý jasyryn júrgiziledi jáne alqabilerdiń bireýi qarsy bolýy múmkin», - deidi avtor.
Buǵan deiin Bishimbaev telefonynyń qupiia sózin áli bermegenin habarlaǵan edik. Bishimbaevtyń advokattary onyń telefonyn zertteý sot zalynda mindetti emes ekenin aityp, ótinish jasady. Artynsha qorǵaýshylar Bishimbaevtyń telefonyn ózderi ashýyn surady.
Eske salaiyq, buǵan deiin Qýandyq Bishimbaev uialy telefonynyń qupiiasózin advokatynan basqa eshkimge bermeitinin aitqan bolatyn.
Bishimbaevtyń advokattary qupiiasóz ashyq aitylsa onyń ishindegi jeke aqparattary tarap kete me dep qorqatynyn jetkizdi.
Jábirlenýshi tarap Qýandyq Bishimbaev qupiiasózin ashyq aitýdy talap etti.
