"جاس الاش" گازەتىنىڭ ءتىلشىسى بيشىمبايەۆتىڭ اتا-اناسى قانداي بيزنەستەرگە قاتىسى بارىن تەكسەرىپ كورگەن، - دەپ حابارلايدى Dalanews.kz. 

ءۋاليحان بيشىمبايەۆ – بەلگىلى ۇستاز. بىرنەشە جىل ءارتۇرلى جوعارى وقۋ ورنىندا رەكتور بولعان. 2006 جانە 2007 جىلدارى "جوعارى وقۋ ورىندارىنىڭ ۇزدىك رەكتورى" اتانعان. عىلىم جانە تەحنيكا سالاسىنداعى قازاقستان رەسپۋبليكاسى مەملەكەتتىك سىيلىعىنىڭ لاۋرەاتى. 1994-1996 جىلدارى – قىزىلوردا وبلىستىق ءماسليحاتىنىڭ، 2003-2012 جىلدارى – وڭتۇستىك قازاقستان وبلىستىق ءماسليحاتىنىڭ، 2012-2016 جىلدارى پارلامەنت ءماجىلىسىنىڭ دەپۋتاتى بولعان.

"ءۋاليحان بيشىمبايەۆ اتىندا ەشقانداي بيزنەس تىركەلمەگەن. بۇل اۋلەتتىڭ كاسىبىن ەكس-مينيستردىڭ اناسى ءالميرا نۇرلىبەكوۆا باسقارادى. ونىڭ اتىندا رەسمي 6 كومپانيا بار"، - دەپ جازىلعان باسىلىم مالىمەتىندە.

اشىق دەرەككوز

قۋاندىق بيشىمبايەۆتىڭ اناسى ءالميرا نۇرلىبەكوۆانىڭ كومپانيالارى

• "تەحنيكالىق ليسەي" جەكە مەكەمەسى

شىمكەنت قالاسىنىڭ ادىلەت دەپارتامەنتى 2002 جىلعى 15 تامىزدا تىركەۋدەن وتكىزگەن. قۇرىلتايشىسى – نۋرلىبەكوۆا الميرا بالتابايەۆنا. مەكەمە ءبىلىم بەرۋ سالاسىنداعى قىزمەت تۇرىمەن اينالىسادى. مەكەن-جايى – شىمكەنت قالاسى، ءال-فارابي اۋدانى، قازىبەك بي كوشەسى، 33. 2023 جىلعى اقشا اينالىمى 1 990 363 487 تەڭگە. بىلتىر 40 619 663 تەڭگە سالىق تولەگەن. مەملەكەتتەن 2021 جىلى 174 618 862 تەڭگەگە بەس، 2022 جىلى 104 944 344 تەڭگەگە ءبىر كەلىسىمشارت الىپ ورىنداعان.

• Alawwal Partners Ltd جەكە كومپانياسى

استانا حالىقارالىق قارجى ورتالىعىندا تىركەلگەن. كومپانيا ەكونوميكانىڭ ءارتۇرلى سالالارىندا جانە ينۆەستيسيالىق قىزمەتتە قارجىلىق قىزمەت كورسەتەدى. مەكەنجايى – استانا قالاسى، ەسىل اۋدانى، ماڭگىلىك ەل داڭعىلى، 55/21. ديرەكتورى – يبرايەۆ كانات بولاتبەكوۆيچ. قۇرىلتايشىلارى – ق ر سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ ءبىرىنشى ۆيسە-مينيسترى تۋلەۋشين كانىش امانبايەۆيچ، "Documentolog" ج ش س باس ديرەكتورىنىڭ قارجى ماسەلەلەرى جونىندەگى ورىنباسارى مادييەۆ سەرجان نۋراحانوۆيچ جانە ەكس-مينيستردىڭ اناسى نۋرلىبەكوۆا الميرا بالتابايەۆنا. كومپانيانىڭ 2023 جىلعى اقشا اينالىمى 57 628 116 تەڭگە. بىلتىر 1 176 084 تەڭگە سالىق تولەگەن. مەملەكەتتەن العان كەلىسىمشارتتارى كەزدەسپەيدى.

اشىق دەرەككوز

• Success ABN جاۋاپكەرشىلىگى شەكتەۋلى سەرىكتەستىگى 

استانا قالاسى بويىنشا تىركەۋ باسقارماسى 2021 جىلعى 25 مامىردا تىركەۋدەن وتكىزگەن. ديرەكتورى – بايجانوۆ باحىتجان اميرحانوۆيچ. قۇرىلتايشىلارى اراسىندا قۋاندىق بيشىمبايەۆتىڭ اناسى نۋرلىبەكوۆا الميرا بالتابايەۆنا، ونىمەن بىرگە قاماۋعا الىنعان اعاسى بايجانوۆ باحىتجان اميرحانوۆيچ جانە جاسۋزاكوۆ نۋرلان كۋلجانوۆيچ بار. مەكەنجايى – استانا قالاسى، ايناكول كوشەسى، 60. كاسىپورىننىڭ بىلتىرعى اقشا اينالىمى 100 121 631 تەڭگە. تولەگەن سالىعى – 1 902 311 تەڭگە. مەملەكەتتەن العان كەلىسىمشارتتارى تۋرالى مالىمەت جوق.

• "ناۋبەت-ىى" جاۋاپكەرشىلىگى شەكتەۋلى سەرىكتەستىگى

تۇركىستان وبلىسى بويىنشا فيليالىنىڭ ورداباسى اۋداندىق تىركەۋ جانە جەر كاداسترى بولىمىندە العاش رەت 2003 جىلى 27 مامىردا، كەيىننەن 2011 جىلى 30 قىركۇيەكتە تىركەۋدەن وتكەن. ديرەكتورى – نۋرلىبەكوۆا الميرا بالتابايەۆنا. قۇرىلتايشىسى دا ءوزى. مەكەنجايى – تۇركىستان وبلىسى، شۇبارسۋ اۋىلى، اگروساد الابى-1. كاسىپورىن ءداندى داقىلداردى وسىرۋمەن، ونىڭ ىشىندە تۇقىم شارۋاشىلىعىمەن اينالىسادى. 2022 جىلى كاسىپورىن مەملەكەت قازىناسىنا 14 645 تەڭگە سالىق تولەگەن. ودان كەيىنگى كومپانيانىڭ اقشا اينالىمى جانە مەملەكەتتەن العان كەلىسىمشارتتارى تۋرالى مالىمەت كەزدەسپەيدى.

• "وڭتۇستىك قازاقستان ساپا ۇيىم" جاۋاپكەرشىلىگى شەكتەۋلى سەرىكتەستىگى

شىمكەنت قالاسى بويىنشا تىركەۋ باسقارماسىنان 2005 جىلى 21 قازاندا تىركەۋدەن وتكەن. ديرەكتورى ءارى قۇرىلتايشىسى – نۋرلىبەكوۆا الميرا بالتابايەۆنا. كاسىپتىك، عىلىمي جانە تەحنيكالىق قىزمەتپەن اينالىسادى. مەكەنجايى – شىمكەنت قالاسى، ءال-فارابي اۋدانى، قازىبەك بي كوشەسى، 33. فارماسيەۆتيكالىق وندىرىسپەن اينالىسقان. قازىرگى كۇندە كومپانيا قىزمەتىن توقتاتقان بولۋ كەرەك، 7 جىلدان بەرى سالىق تولەمەگەن. تەك 2017 جىلى عانا 42 750 تەڭگە مەملەكەت قازىناسىنا اۋدارىپتى. العان كەلىسىمشارتتارى دا جوق.

• "نەمەسكيي دوم" جاۋاپكەرشىلىگى شەكتەۋلى سەرىكتەستىگى 

شىمكەنت قالاسى بويىنشا تىركەۋ باسقارماسىنان 2006 جىلعى 16 قاراشادا تىركەۋدەن وتكەن. ديرەكتورى – نۋرلىبەكوۆا الميرا بالتابايەۆنا. قۇرىلتايشىسى جوق. مەكەنجايى – شىمكەنت قالاسى، ءال-فارابي اۋدانى، قازىبەك بي كوشەسى، 33. كومپانيا قىزمەتىن توقتاتقان. ونىڭ اقشا اينالىمى، تولەگەن سالىعى تۋرالى مالىمەتتەر كەزدەسپەيدى. ءالميرا نۇرلىبەكوۆانىڭ جوعارىداعى كومپانيالاردان بولەك تاعى 2 جشس-عا قاتىسى بولعان.

ولار: "EZy Park" جاۋاپكەرشىلىگى شەكتەۋلى سەرىكتەستىگى استانا قالاسى بويىنشا تىركەۋ باسقارماسىنان 2019 جىلى 23 جەلتوقساندا العاش رەت، كەيىننەن 2024 جىلى 14 ناۋرىزدا قايتا تىركەۋدەن وتكەن. ديرەكتورى – يبرايەۆ كانات بولاتبەكوۆيچ. قۇرىلتايشىلارى –مادييەۆ سەرجان نۋراحانوۆيچ؛ احمەتجانوۆ ازامات بيرلەسوۆيچ، ابدۋللين تاسبولات امانجولوۆيچ، ماليك كايرات كاميلۋلى، وسپانوۆ اليي ماراتوۆيچ. قۇرىلتايشىلارىنىڭ اراسىندا ەكس-مينيستردىڭ اناسى بولعان. ءبىراق باق-تاعى كەيبىر مالىمەتتەرگە قاراعاندا سالتانات نۇكەنوۆانىڭ ولىمىنەن كەيىن نۇرلىبەكوۆا ءالميرا قۇرىلتاي مۇشەلىگىنەن شىعىپ كەتكەن. مەكەنجايى – استانا قالاسى، دوستىق كوشەسى، 16 پ. كاسىپورىننىڭ 2023 جىلعى اقشا اينالىمى 1 903 723 010 تەڭگە. تولەگەن سالىعى – 38 851 890 تەڭگە. مەملەكەتتەن العان كەلىسىمشارتتارى كەزدەسپەيدى. ءدال وسى جشس-عا تيەسىلى "گاستروسەنتردە" سالتانات نۇكەنوۆا قازا تاپقان BAU مەيرامحاناسى ورنالاسقان.

بۇدان بولەك، ەكس-مينيستردىڭ اناسى SAPA Logistics جاۋاپكەرشىلىگى شەكتەۋلى سەرىكتەستىگىنىڭ دە قۇرىلتاي مۇشەسى بولعان. كەيىنگى تىركەۋدە بۇل كومپانيا قۇرىلتاي مۇشەلىگىنەن شىعىپ كەتكەن.

"ءبىراق ءبارىبىر كاسىپورىن بيشىمبايەۆتارعا تيەسىلى. سەبەبى استانا قالاسى بويىنشا تىركەۋ باسقارماسىنان 2024 جىلى 2 اقپاندا سوڭعى رەت تىركەۋدەن وتكەن كومپانيانىڭ ديرەكتورى دوسماگامبەتوۆ ارمان ساگينگالييەۆيچ. قۇرىلتايشىلارى – ەكس-مينيستردىڭ ناعاشىسى سۇلتان نۇرلىبەكتىڭ جۇبايى اديلوۆا كارلىگاش كاناتبەكوۆنا جانە ونىڭ تۋىسى اديلوۆ ەرساين كاناتبەكوۆيچ. وسى جەردە ايتا كەتەيىك، قۋاندىق بيشىمبايەۆ 2017 جىلى ءىرى كولەمدە پارا الدى دەپ سوتتالعاندا ونىمەن بىرگە 22 ادام كىنالى دەپ تابىلعان ەدى. سونىڭ ىشىندە كاسىپكەر سۇلتان نۇرلىبەك تە 7 جىلعا باس بوستاندىعىنان ايىرىلعان بولاتىن"، - دەپ جازىلعان باسىلىم مالىمەتىندە.

SAPA Logistics قۇرامىندا 100-گە جۋىق ادام جۇمىس ىستەيدى، كومپانيا قويمالاردى جالعا بەرەدى. كاسىپورىن بىرنەشە جىلدان بەرى قارقىندى دامىپ كەلەدى. مىسالى، 2023 جىلعى اقشا اينالىمى - 7 815 253 736 تەڭگە. تولەگەن سالىعى – 148 489 821 تەڭگە. 3 جىل بويى قاتارىنان 150 ملن تەڭگەگە جۋىق سالىق تولەپ كەلەدى. جالپى تولەگەن سالىعى – 745 399 504 تەڭگە.

"بۇدان بولەك، 2019 جىلى شىمكەنتتەگى New Astana ساۋدا ورتالىعىنىڭ عيماراتى ءالميرا نۇرلىبەكوۆانىڭ اتىنا تىركەلگەن ەكەن. بۇل جەردە لومبارد، كيىم-كەشەك جانە تۇرمىستىق تەحنيكا دۇكەندەرى، سونداي-اق، شاحمات مەكتەبى بار. قازىرگى ساۋدا ورنىنا ەكس-مينيستردىڭ اناسىنىڭ رەسمي تۇردە قاتىسى جوق"، - دەپ جازىلعان مالىمەتتە.