رەسپۋبليكالىق ادۆوكاتتار القاسى ەكس-مينيستر قۋاندىق بيشىمبايەۆتىڭ ادۆوكاتى ەرلان عازىمجانوۆقا “كاسىبي شەبەرلىگى ءۇشىن” مەدالىن تابىستادى، دەپ حابارلايدى Dalanews.kz.
Buzyq تەلەگرام-ارناسىنىڭ مالىمەتىنە سۇيەنسەك، مەدالدى القا ءتوراعاسىنىڭ ورىنباسارى ءارى نۇكەنوۆتەر وتباسىنىڭ ادۆوكاتى يگور ۆرانچيەۆ تابىستاعان.
“بۇل ماراپات – ەڭبەگىم مەن جەتىستىكتەرىمنىڭ بەلگىسى. سونىمەن قاتار ادامداردىڭ قۇقىعى مەن بوستاندىعىن قورعاۋ جولىنداعى قىزمەتىمدى ارى قاراي جالعاستىرۋىما شابىت سىيلاماق”، — دەپ اتاپ ءوتتى ەرلان عازىمجانوۆ.
ايتا كەتەيىك، ازاماتتىق نەكەدەگى ايەلى سالتانات نۇكەنوۆانى ءولتىردى دەگەن ايىپپەن 24 جىلعا باس بوستاندىعىنان ايىرىلعان ەكس-مينيستر قۋاندىق بيشىمبايەۆتى ادۆوكات لەيلا رامازانوۆا، نازكەن قۇسايىنوۆا، ەرلان عازىمجانوۆتار قورعاعان ەدى.
وسى تۇستا رەسپۋبليكالىق ادۆوكاتتار القاسىنىڭ ءتوراعاسى ايدىن بيكەبايەۆ ارىپتەستەرىنە ۇندەۋ جولداعان بولاتىن.
جيىندا "بيشىمبايەۆ ىسىنە" باس سۇققان ادۆوكاتتاردى جاريا تالقىلاۋدى توقتاتۋ تۋرالى ماسەلە قوزعالدى. ول اتالعان وقيعا ادۆوكاتتاردىڭ كاسىبي ادەبىنە نۇقسان كەلتىرىپ جاتقانىن اتاپ وتكەن ەدى.
"ادۆوكاتتاردى بيشىمبايەۆ ىسىنە قاتىساتىن ارىپتەستەرىن جاريا تالقىلاۋدى توقتاتۋعا شاقىرامىن. بۇل ارەكەتتەر كاسىبي ادەپ كودەكسىن بۇزۋعا اكەلۋى مۇمكىن. ءار نارسەنىڭ شەگى بولۋى كەرەك. ءاربىر ادۆوكات ادۆوكاتۋرانىڭ بەدەلىن ويلاۋى ءتيىس"، - دەپ مالىمدەگەن بولاتىن.
ەسكە سالايىق، بىلتىر قۋاندىق بيشىمبايەۆ ايەلى سالتانات نۇكەنوۆانى ءولتىردى دەگەن كۇدىكپەن قاماۋعا الىندى. وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.
بيشىمبايەۆقا ەكى باپ بويىنشا ايىپ تاعىلدى:
- اسا قاتىگەزدىكپەن كىسى ءولتىرۋ (15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋ)؛
- قورلاۋ (4 جىلدان 7 جىلعا دەيىن باس بوستاندىعىن شەكتەۋ نەمەسە وسى مەرزىمگە باس بوستاندىعىنان ايىرۋ).
13 مامىردا بيشىمبايەۆ ءىسى بويىنشا ۇكىم شىققان بولاتىن. القابيلەر شەشىمى بويىنشا، بيشىمبايەۆ 24 جىلعا، بايجانوۆ 4 جىلعا باس بوستاندىعىنان ايىرىلدى.
