كەشە ەكس-مينيستر قۋاندىق بيشىمبايەۆقا قاتىستى قىلمىستىق ءىس بويىنشا القابيلەر القاسىنىڭ قاتىسۋىمەن العاشقى وتىرىس ءوتتى، - دەپ حابارلايدى Dalanews.kz.
پروسەسس اشىق رەجيمدە ءوتتى. ب ا ق وكىلدەرى ءۇشىن سوت وتىرىسىنىڭ ونلاين-ترانسلياسياسى بار جەكە زال ۇيىمداستىرىلدى. سونداي-اق، ءىس-شارا جوعارعى سوتتىڭ YouTube ارناسىندا كورسەتىلدى.
وتىرىستا مەملەكەتتىك ايىپتاۋ تاراپى ءىس بويىنشا ايىپتاۋ اكتىسىن وقىدى.
كەلەسى سوت وتىرىسى 29 ناۋرىزىدا ساعات 10:00-گە بەلگىلەندى. الداعى وتىرىستار دا تىكەلەي ەفيردە وتەدى.
ايتا كەتەيىك، القابيلەر القاسىن ىرىكتەۋ ءراسىمى دە كەشە ءوتتى. سوتقا كەلگەن 102 كانديداتتىڭ ىشىنەن 12 القابي (10 نەگىزگى جانە 2 قوسالقى) تاڭدالدى.
ىرىكتەۋ القابيلەر القاسىنىڭ قاۋىپسىزدىگىن قامتاماسىز ەتۋ ماقساتىنداعى زاڭ شەكتەۋلەرىنە بايلانىستى جابىق سوت وتىرىسىندا ءوتتى.
ايتا كەتەيىك، بىلتىر قۋاندىق بيشىمبايەۆ ايەلىن ۇرىپ ءولتىردى دەگەن كۇدىكپەن قاماۋعا الىندى. ءقازىر سوت وتىرىسى ءوتىپ جاتىر. بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ بۇل ءبىرىنشى قىلمىستىق ءىسى ەمەس.
ول 2018 جىلعى ناۋرىزدا 10 جىلعا باس بوستاندىعىنان ايىرىلعان بولاتىن. بۇرىنعى شەنەۋنىك پارا الۋ جانە اقشا جىمقىرۋ ىستەرىندە ايىپتى دەپ تانىلعان ەدى. بيشىمبايەۆتىڭ سوت ءىسى ءتورت ايدان اسا ۋاقىتقا سوزىلدى. ونىمەن بىرگە بۇل ىستە 22 ادام سوتقا تارتىلعان ەدى. ولار "بايتەرەك DEVELOPMENT" اق ەكس-قىزمەتكەرلەرى، كاسىپكەرلەر جانە قۇرىلىس كومپانيالارىنىڭ وكىلدەرى بولدى. ەكس-شەنەۋنىك 10 جىلعا سوتتالسا دا، تۋرا 19 اي وتكەندە بوستاندىققا شىقتى.
