قۋاندىق بيشىمبايەۆ اپەللياسيالىق سوت وتىرىسىندا مالىمدەمە جاسادى، - دەپ حابارلايدى Dalanews.kz.

"مەن بۇگىن ادۆوكاتتارىم ايتقان نارسەلەردى قولدايمىن. ماعان، مەنىڭ قورعاۋشىلارىما دالەلدەردى كەلتىرۋگە مۇمكىندىك بەرىلمەدى. بۇل جايلى سوت وتىرىستارىندا بىرنەشە رەت ايتتىم. ءتىپتى كوپتەگەن ماتەريالمەن تانىسۋعا مۇمكىندىك بەرىلمەدى. ەشكىم شىندىقتى ەستىگىسى كەلمەيدى. شەشىم دە الدىن الا شىعىپ قويعان. ادۆوكاتتارىمنىڭ ايتقانىن قولدايمىن"، - دەيدى بيشىمبايەۆ. 

بۇعان دەيىن قۋاندىق بيشىمبايەۆتىڭ ادۆوكاتى ەرلان عازىمجانوۆ ەكس-مينيسترگە قاتىستى شىققان ۇكىممەن كەلىسپەيتىنىن ايتقان بولاتىن. 

"مەن ادۆوكات رەتىندە بۇل ۇكىممەن كەلىسپەيمىن. ول زاڭسىز دەپ ەسەپتەيمىن. 106 - باپ-ابايسىزدا ادام ءولتىرۋ، وزگەرتىلگەن باپقا سايكەس جازانى تومەندەتۋ كەرەك دەپ ەسەپتەيمىن. ال ازاپتاۋ بابى بويىنشا ۇكىمنىڭ كۇشى جويىلىپ، ءىس باسقا قۇرامدا جاڭا قاراۋعا جىبەرىلۋى كەرەك دەپ سانايمىن"، - دەيدى ادۆوكات.

عازىمجانوۆتىڭ سوزىنشە، ءبىرىنشى ساتىداعى سوتتا 20 زاڭبۇزۋشىلىق بولعان كورىنەدى. 

ايتا كەتەيىك، بۇگىن قۋاندىق بيشىمبايەۆ پەن باقىتجان بايجانوۆقا قاتىستى قىلمىستىق ءىستىڭ اپەللياسيالىق سوت وتىرىسى باستالدى. 

جوعارعى سوتتىڭ قىلمىستىق ىستەر جونىندەگى سوت القاسىنىڭ ءتوراعاسى نازگۇل راحمەتۋللينانىڭ ايتۋىنشا،اپەللياسيا ءبىر اي ىشىندە قارالادى.

قۋاندىق بيشىمبايەۆ 24 جىلعا، ءىنىسى باقىتجان بايجانوۆ 4 جىلعا سوتتالعان بولاتىن.