ق ر جوعارى سوتى بيشىمبايەۆ پەن بايجانوۆتىڭ اپەللياسيالىق سوتىنا قاتىستى مالىمدەمە جاسادى، - دەپ حابارلايدى Dalanews.kz.
سوت مالىمەتىنشە، ق.بيشىمبايەۆ پەن ب.بايجانوۆقا قاتىستى قىلمىستىق ءىس اپەللياسيالىق ساتىعا تۇسكەن.
"سۋديانىڭ 11 ماۋسىمداعى قاۋلىسىمەن ءىستى قاراۋ 2024 جىلعى 26 ماۋسىمعا ساعات 10.00-گە بەلگىلەندى. جوعارعى سوت قوعامنىڭ سوت پروسەسىنە قىزىعۋشىلىعىنىڭ ارتقانىن ەسكەرە وتىرىپ، اپەللياسيالىق ساتىداعى سوت وتىرىستارىنىڭ ونلاين ترانسلياسياسىن جالعاستىرۋ تۋرالى شەشىم قابىلدادى. سوت وتىرىستارى تىكەلەي ەفيردە وتەدى"، - دەپ جازىلعان مالىمەتتە.
بۇعان دەيىن ماجىلىستە جوعارعى سوتتىڭ قىلمىستىق ىستەر جونىندەگى سوت القاسىنىڭ ءتوراعاسى نازگۇل راحمەتۋللينا بۇل شاعىم قانشا ۋاقىتقا دەيىن قارالۋى مۇمكىن ەكەنىن ايتتى.
ءماجىلىس كۋلۋارىندا جوعارعى سوت وكىلى سوتقا القابيلەر قاتىسسا دا سوتتالۋشىلار شاعىمدانا الاتىنىن مالىمدەدى.
"القابيلەردىڭ قاتىسۋىمەن شىعارىلعان ۇكىمگە تاراپتار شاعىمدانا الادى. ول ءۇشىن اپەللياسيالىق ساتى بار. كەلىسپەسە، شاعىمدانۋعا قۇقىلى"، - دەدى سوت القاسىنىڭ ءتوراعاسى.
راحمەتۋللينانىڭ سوزىنشە، اپەللياسيا ءبىر اي ىشىندە قارالادى. ءبىراق بۇعان كەيبىر جايتتار اسەر ەتۋى مۇمكىن.
"اپەللياسيالىق ورگاندار قاراۋعا ۇلگەرمەي جاتقان جاعدايلاردا ۇزارۋى مۇمكىن. مىسالى، ادۆوكاتتار بەلگىلى ءبىر كۇندەرى قاتىسا الادى جانە ت.ب. زاڭ بويىنشا سوتتالعانداردىڭ اپەللياسيالىق ساتىداعى سوتقا قاتىسۋى سوت تەرگەۋى قايتادان جۇرگىزىلگەن كەزدە مىندەتتى سانالادى. ياعني، كەيبىر قوسىمشا دالەلدەمەلەردى زەرتتەگەندە عانا، باسقا جاعدايلاردا سوتتالۋشىنىڭ قاتىسۋى قاجەت ەكەنىن نەمەسە قاجەت ەمەس ەكەنىن اپەللياسيالىق ورگان ءوزى شەشەدى"، - دەدى ول.
ايتا كەتەيىك، بيشىمبايەۆ 24 جىلعا، بايجانوۆ 4 جىلعا سوتتالعان ەدى.
