قۋاندىق بيشىمبايەۆ جازاسىن جەڭىلدەتكىسى كەلەدى. سەبەبى ەكس-مينيستردىڭ ءىسى جوعارعى سوتقا تۇسكەن، - دەپ حابارلايدى Dalanews.kz.

قۋاندىق بيشىمبايەۆ پەن باقىتجان بايجانوۆتىڭ ءىسى جوعارعى سوتقا ءتۇستى. بۇل تۋرالى اقپارات سوت كابينەتىندە جاريالانعان.

ءىس 5 تامىزدا سۋدياعا بەرىلدى.

ەسكە سالايىق، 23 شىلدەدە بيشىمبايەۆ قاتاڭ رەجيمدەگى كولونياعا جەتكىزىلگەنى بەلگىلى بولدى.

بۇعان دەيىن ىشكى ىستەر مينيسترلىگى ەكس-مينيستر قۋاندىق بيشىمبايەۆ كولونيادا قانداي جۇمىس ىستەي الاتىنىن ايتتى.

بۇل تۋرالى ءىىم قىلمىستىق-اتقارۋ جۇيەسى كوميتەتىنىڭ ءتوراعاسى، ادىلەت پولكوۆنيگى تەڭىزجان جانىبەكوۆ ايتتى. 

"بىرىنشىدەن، بيشىمبايەۆ ءالى تەرگەۋ يزولياتورىندا. ەكىنشىدەن، ونىڭ جۇمىس ىستەۋىنە قاتىستى: وندىرىستىك ايماقتاردا ءتۇرلى جۇمىس بار. ول "ەڭبەك" رەسپۋبليكالىق مەملەكەتتىك كاسىپورىندا مىسالى اعاش، مەتالل وڭدەۋ سالاسىنا جۇمىسقا ورنالاسا الادى. قاي جەردە بوس ورىن بولسا سول جەرگە بارا الادى.  

بۇل ماسەلەنى جۇمىسپەن قامتۋ ءبولىمى شەشەدى، كەلگەننەن كەيىن 15 كۇن كارانتيندە بولادى. ءبىز ونى زەرتتەيمىز، ودان ءارى تاربيە جۇمىسى جۇرگىزىلەدى. پسيحولوگتار باسقا تۇتقىندارمەن جۇمىس ىستەگەندەي بيشىمبايەۆ پەن دە جۇمىس ىستەيدى"، - دەيدى جانىبەكوۆ. 

26 ماۋسىمدا قۋاندىق بيشىمبايەۆ پەن باقىتجان بايجانوۆقا قاتىستى قىلمىستىق ءىستىڭ اپەللياسيالىق سوت وتىرىسى بولعان ەدى. الايدا ولاردىڭ اپەللياسيالىق ءوتىنىشى قاناعاتتاندىرىلمادى.

قۋاندىق بيشىمبايەۆ 24 جىلعا، ءىنىسى باقىتجان بايجانوۆ 4 جىلعا سوتتالعان بولاتىن.