بۇگىن ەكس-مينيستر قۋاندىق بيشىمبايەۆ پەن ونىڭ تۋىسى باقىتجان بايجانوۆقا قاتىستى قىلمىستىق ءىس بويىنشا كەزەكتى سوت وتىرىسى ءوتتى. سوت تەرگەۋى بارىسىندا ەكى كۋادان باسقا قالادا بولۋىنا بايلانىستى ونلاين رەجيمدە جاۋاپ الىندى. سوت وتىرىسىنىڭ اياعىندا سۋديا قۇلبايەۆا سوت جارىسسوزدەرى قاشان وتەتىنىن ايتتى، - دەپ حابارلايدى Dalanews.kz.
بۇگىن بيشىمبايەۆ ءىسى بويىنشا سوت تەرگەۋى اياقتالدى. كەلەسى كەزەڭ - سوت ءجارىسسوزى. سۋديا ايجان قۇلبايەۆا ءجارىسسوز 29 ساۋىردە باستالاتىنىن، وعان دايىندالۋعا تاراپتارعا ۋاقىت بەرىلەتىنىن مالىمدەدى.
تاراپتاردىڭ جارىسسوزدەرى 30 ساۋىردە، سونداي-اق، 2، 3 جانە 4 مامىردا جالعاسادى.
سوتتالۋشىلار كىناسىن كەيبىر تۇستا عانا مويىنداپ وتىر. بيشىمبايەۆ نۇكەنوۆانى ۇرىپ-سوققانىن مويىندادى، ناتيجەسىندە ول قايتىس بولدى، ءبىراق ونىڭ سوزىنشە، نۇكەنوۆانى ءولتىرۋ نيەتى بولماعان. ال بايجانوۆ "جەدەل جاردەم" شاقىرماعانى ءۇشىن ءوزىن كىنالى سەزىنەتىنىن مالىمدەدى.
ايتا كەتەيىك، استانا قالاسىنىڭ مامانداندىرىلعان اۋدانارالىق سوتىندا قۋاندىق بيشىمبايەۆقا قاتىستى قىلمىستىق ءىس بويىنشا بىرنەشە سوت وتىرىسى ءوتتى. ونى ءدۇيىم جۇرت جوعارعى سوتتىڭ YouTube كانالىنان ونلاين تاماشالادى.
ازاماتتىق نەكەدەگى ايەلى سالتانات نۇكەنوۆانى ءولتىردى دەگەن ايىپپەن سوتتالىپ جاتقان ەكس-مينيستر قۋاندىق بيشىمبايەۆتى ادۆوكات لەيلا رامازانوۆا، نازكەن قۇسايىنوۆا، ەرلان عازىمجانوۆتار قورعاپ جاتىر.
ال مارقۇم سالتانات نۇكەنوۆانىڭ اعاسى ايتبەك امانگەلدى مەن ونىڭ وتباسىنىڭ ادۆوكاتتارى – جاننا ورازباحوۆا مەن ءاليا وماروۆا.
27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالعان ەدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. سودان كەيىن اشىق سوت وتىرىستارى باستالدى.
سونىمەن قاتار، قۋاندىق بيشىمبايەۆ سوتتا سالتانات نۇكەنوۆانى اسا قاتىگەزدىكپەن ولتىرگەنىن مويىندامادى. بۇل وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.
بيشىمبايەۆقا ەكى باپ بويىنشا ايىپ تاعىلدى:
- اسا قاتىگەزدىكپەن كىسى ءولتىرۋ (15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋ)؛
- قيناۋ (4 جىلدان 7 جىلعا دەيىن باس بوستاندىعىن شەكتەۋ نەمەسە وسى مەرزىمگە باس بوستاندىعىنان ايىرۋ).
سونداي-اق، ونىڭ تۋىسى باقىتجان بايجانوۆ تا كۇدىكتى رەتىندە قاماۋعا الىندى. وعان قىلمىستىق كودەكستىڭ ەكى بابى بويىنشا ايىپ تاعىلعان. ناقتىراق ايتساق، 432-بابى (اسا اۋىر قىلمىستى جاسىرىپ قالۋ)؛ 434-بابى (اسا اۋىر قىلمىستى حابارلاماۋ).
