Búgin eks-ministr Qýandyq Bishimbaev pen onyń týysy Baqytjan Baijanovqa qatysty qylmystyq is boiynsha kezekti sot otyrysy ótti. Sot tergeýi barysynda eki kýádan basqa qalada bolýyna bailanysty onlain rejimde jaýap alyndy. Sot otyrysynyń aiaǵynda sýdia Qulbaeva sot jaryssózderi qashan ótetinin aitty, - dep habarlaidy Dalanews.kz.
Búgin Bishimbaev isi boiynsha sot tergeýi aiaqtaldy. Kelesi kezeń - sot jaryssózi. Sýdia Aijan Qulbaeva jaryssóz 29 sáýirde bastalatynyn, oǵan daiyndalýǵa taraptarǵa ýaqyt beriletinin málimdedi.
Taraptardyń jaryssózderi 30 sáýirde, sondai-aq, 2, 3 jáne 4 mamyrda jalǵasady.
Sottalýshylar kinásin keibir tusta ǵana moiyndap otyr. Bishimbaev Núkenovany uryp-soqqanyn moiyndady, nátijesinde ol qaitys boldy, biraq onyń sózinshe, Núkenovany óltirý nieti bolmaǵan. Al Baijanov "jedel járdem" shaqyrmaǵany úshin ózin kináli sezinetinin málimdedi.
Aita keteiik, Astana qalasynyń mamandandyrylǵan aýdanaralyq sotynda Qýandyq Bishimbaevqa qatysty qylmystyq is boiynsha birneshe sot otyrysy ótti. Ony dúiim jurt Joǵarǵy sottyń YouTube kanalynan onlain tamashalady.
Azamattyq nekedegi áieli Saltanat Núkenovany óltirdi degen aiyppen sottalyp jatqan eks-ministr Qýandyq Bishimbaevty advokat Leila Ramazanova, Nazken Qusaiynova, Erlan Ǵazymjanovtar qorǵap jatyr.
Al marqum Saltanat Núkenovanyń aǵasy Aitbek Amangeldi men onyń otbasynyń advokattary – Janna Orazbahova men Áliia Omarova.
27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Bishimbaevqa eki bap boiynsha aiyp taǵyldy:
- asa qatygezdikpen kisi óltirý (15 jyldan 20 jylǵa deiin nemese ómir boiyna bas bostandyǵynan aiyrý);
- qinaý (4 jyldan 7 jylǵa deiin bas bostandyǵyn shekteý nemese osy merzimge bas bostandyǵynan aiyrý).
Sondai-aq, onyń týysy Baqytjan Baijanov ta kúdikti retinde qamaýǵa alyndy. Oǵan qylmystyq kodekstiń eki baby boiynsha aiyp taǵylǵan. Naqtyraq aitsaq, 432-baby (asa aýyr qylmysty jasyryp qalý); 434-baby (asa aýyr qylmysty habarlamaý).
