ەكس-مينيستر قۋاندىق بيشٸمباەۆقا قاتىستى سوت وتىرىسىندا مارقۇم سالتانات نٷكەنوۆانىڭ كٶمەكشٸسٸ انار تاسوۆا كۋەلٸك ەتتٸ, - دەپ حابارلايدى Dalanews.kz.
سالتانات نٷكەنوۆا استرولوگييالىق بولجامدار بويىنشا اقىلى كەڭەستەر ٶتكٸزگەن. ال انار تاسوۆا وعان بۇل جۇمىستا كٶمەكتەسكەن.
سوت وتىرىسىندا كۋەلٸك ەتكەن تاسوۆا نٷكەنوۆا مەن بيشٸمباەۆتىڭ اراقاتىناسى تۋرالى دا ايتتى. ونىڭ سٶزٸنشە, نٷكەنوۆا وعان بٸرنەشە رەت بيشٸمباەۆ جۇمىس ٸستەۋگە تىيىم سالعانىن ايتقان. سونىمەن قاتار, ول بىلتىر شىمكەنتتە سالتاناتپەن كەزدەسكەن كەزدە دەنەسٸنەن جاراقات كٶرگەن.
"ولاردىڭ ٷيٸنە بارعاندا, سالتانات شىقتى. بٸرٸنشٸ بايقاعانىم: ونىڭ مٷلدە كٶڭٸل كٷيٸ بولمادى. ول العا (كٶلٸكتٸڭ الدىڭعى ورنىنا - ەسك.) وتىردى, سول جاعىندا قىلعىندىرعان بەلگٸلەر, ارقان ٸزدەرٸ بارىن كٶردٸم. ونىڭ سول جاعى كٶگەرٸپ تۇردى. بٸردەن جامان وي كەلدٸ. بٸز كوفە ٸشەتٸن ورىندا وتىردىق.
ەڭگٸمە بارىسىندا ول قۋاندىق تيران ەكەنٸن ايتتى. قۇربىلارىمەن, ەپكەلەرٸمەن سٶيلەسۋگە رۇقسات بەرمەيتٸنٸن, ٷنەمٸ ونىڭ باقىلاۋىندا ەكەنٸن جەتكٸزدٸ. بٸز شامامەن 2-3 ساعات وتىردىق, وسى ۋاقىت ٸشٸندە ونىڭ كٶڭٸل كٷيٸ بولمادى. كٶبٸنە ولاردىڭ قارىم-قاتىناسى تۋرالى ايتتى. ٷنەمٸ ايعاي-شۋ ەكەنٸن, ونى باقىلاپ وتىراتىنىن دا ايتتى", - دەدٸ تاسوۆا.
كۋەگەر سالتانات قۋاندىققا تۇرمىسقا شىققانعا دەيٸن جاقسى تابىس تاپقانىن, ياعني تابىسى ايىنا شامامەن 3-4 ميلليون تەڭگە بولعانىن ايتتى. سونىمەن قاتار, ول مارقۇم ٶز جۇمىسىن جاقسى كٶرگەنٸن ەرٸ ونىڭ جۇمىسىنا كٶڭٸلٸ تولاتىن كليەنتتەرٸ دە بولعانىن جەتكٸزدٸ.
كەيٸنٸرەك كۋەگەر نٷكەنوۆامەن اراداعى حاتتاردى وقىپ بەردٸ. جەكە حاتتاردا جۇمىس بارىسى تۋرالى ەڭگٸمەلەر ايتىلعان.
ايتا كەتەيٸك, 27 ناۋرىزدا ەكس-مينيستر قۋاندىق بيشٸمباەۆتىڭ ٸسٸ بويىنشا القابيلەر تاڭدالعان ەدٸ. القابيلەر القاسىنا 12 ادام ٸرٸكتەلدٸ: 10 – نەگٸزگٸ قۇرام, 2 – قوسالقى. سودان كەيٸن اشىق سوت وتىرىستارى باستالدى.
سونىمەن قاتار, قۋاندىق بيشٸمباەۆ سوتتا سالتانات نٷكەنوۆانى اسا قاتىگەزدٸكپەن ٶلتٸرگەنٸن مويىندامادى. بۇل وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.
سوت وتىرىستارىندا وقيعا بولعان كەزدٸڭ, دەلٸرەك, بيشٸمباەۆ سالتاناتتى شاشىنان سٷيرەپ, تەپكٸلەگەن سۇمدىق كادرلار كٶرسەتٸلدٸ.
