الەۋمەتتىك جەلىلەردە ايەلگە شابۋىل جاساعان ءسات كورىنەتىن ۆيدەو تاراپ كەتتى. جەلى قولدانۋشىلارى جابىرلەنۋشى قۋاندىق بيشىمبايەۆتىڭ ءىسى بويىنشا تەرگەۋشى ەكەنىن دە ايتتى، - دەپ حابارلايدى Dalanews.kz.
پوليسيا مالىمەتىنشە، بۇل اقپارات شىندىققا جاناسپايدى.
"جابىرلەنۋشىن ارەكەتىنىڭ بۇل تەرگەۋگە قاتىسى جوق. كۇدىكتى انىقتالىپ، ۋاقىتشا ۇستاۋ يزولياتورىنا قامالدى. بۇعان دەيىن قىلمىستىق ءىس زاڭدىلىعىن تەكسەرىپ، سوتقا جىبەرۋ ءۇشىن پروكۋراتۋراعا جولدانعان. پوليسيا دەپارتامەنتى جالعان اقپارات تاراتقانى ءۇشىن قولدانىستاعى زاڭناماعا سايكەس جاۋاپكەرشىلىككە تارتىلاتىنىن ەسكەرتەدى"، - دەدى استانا قالالىق ءىىد باسپا ءسوز قىزمەتى وكىلدەرى.
ۆيدەوداعى وقيعا 12 اقپاندا بولعان. كريمينالدىق پوليسيا قىزمەتكەرلەرى سول كەزدە ەلوردا اۋلالارىنىڭ بىرىندە قىزعا شابۋىل جاساعان شىعىس قازاقستان وبلىسىنىڭ 35 جاستاعى تۇرعىنىن ۇستادى.
ايتا كەتەيىك، بۇعان دەيىن مادەنيەت جانە اقپارات ءمينيسترى ايدا بالايەۆا اتىشۋلى قۋاندىق بيشىمبايەۆتىڭ ىسىنە قاتىستى پىكىر ءبىلدىردى.
"ءبىزدىڭ ەلدە سەنزۋراعا تىيىم سالىنادى، ال مەديا ويىنشىلار كوبىنە "تىيىم سالىنباعاننىڭ بارىنە رۇقسات ەتىلەدى" قاعيداتى بويىنشا جۇمىس ىستەيدى. ءبىز جاقىندا جۋرناليستىك ەتيكاعا ارنالعان دوڭگەلەك ۇستەل وتكىزدىك جانە سول جەردە ءجۋرناليستىڭ ەتيكاسى ءوز-وزىن قاداعالاۋ شەگىندە بولۋى كەرەك دەگەن قورىتىندىعا كەلدىك.
بۇگىندە كورىپ وتىرعانىمىزداي، ءوزىن-وزى قاداعالاۋ دەگەن نارسە كوبىنە جۇمىس ىستەمەيدى، اسىرەسە، ويىنشىلاردى "قىزىقتىرۋعا" بولاتىن كەزدە.
ءبىز مەحانيزمدەردى تۇسىنەمىز جانە بيشىمبايەۆ ىسىندە بۇگىن بولىپ جاتقان مەديا ناۋقاننىڭ قالپىن كورىپ وتىرمىز. وكىنىشكە قاراي، تەرىس مۇددەنى باسشىلىققا الا وتىرىپ، بارلىق قابىلدانعان جالپىادامزاتتىق نورمالار مەن قاعيدالارعا قايشى، وتىرىك ءارى قوعامدىق سانانى مانيپۋلياسيالاۋمەن اينالىساتىن ادامدار قوعامنان شەتتەتىلەدى. ويتكەنى قوعام اقىماق ەمەس.
مەن ءارقاشان كاسىبي جۋرناليستەر قاۋىمداستىعىن باعالاۋ كەرەك دەپ ايتاتىنمىن. ولار - ويلى، اقىلدى جانە كۇشتى ادامدار"، - دەدى مينيستر Tengrinews.kz-كە بەرگەن سۇحباتىندا.
ەسكە سالايىق، بىلتىر قۋاندىق بيشىمبايەۆ ايەلى سالتانات نۇكەنوۆانى ءولتىردى دەگەن كۇدىكپەن قاماۋعا الىنعان ەدى. وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.
