ەكونوميست، توقايەۆتىڭ شتاتتان تىس كەڭەسشىسى ولجاس قۇدايبەرگەنوۆ شارتاراپتى شارپىعان كوروناۆيرۋس الەم ەكونوميكاسىنا شۇيلىككەنىمەن قويماي، بيلىكتەگى اعا بۋىننىڭ قاتارىن سەلدىرەتىپ كەتەدى دەگەن پىكىردە دەپ حابارلايدى Dalanews.kz.

ونىڭ تۇسپالداۋىنشا ناۋرىزدىڭ سوڭىنا تامان ءقاۋىپتى ىندەت دۇنيەنىڭ ءتورت بورىشىنا تۇگەل تارالادى. وسى ىندەتتىڭ ءىزىن جاسىرىپ، سىرقاتقا شالدىققانداردىڭ سانىن سىرت كوزدەن كولەگەيلەگەن ەلدەر وزگەلەردىڭ تاباسىنا ۇشىرايدى.

ساراپشىنىڭ پىكىرىنشە جۇڭگو ۆيرۋستى اۋىزدىقتاۋعا شاق تۇر. الايدا مۇنىڭ سوڭى ەل ەكونوميكاسىن شاتقاياقتاتىپ تىنادى.

كوروناۆيرۋس جۇڭگو ەكونوميكاسىن 1 ترلن دوللارعا ويسىراتىپ كەتتى. ونىڭ ورنىن تولتىرۋ وڭايعا سوقپايدى، ونىڭ ۇستىنە ىندەتتىڭ قىسپاعىندا قالعان وزگە ەلدەر كەسەلمەن كۇرەسە الماسا، ۆيرۋس قىتايعا قايتا اينالىپ سوعۋى عاجاپ ەمەس.

"كوروناۆيرۋس بالالارعا جاۋىقپايدى، ال ەگدە جاستاعى بۋىندى باۋداي تۇسىرەدى. سىرقاتقا شالدىققانداردىڭ اراسىندا بەسىكتەگى سابيلەر مەن قىز-بوزبالالاردىڭ ۇلەسى 2 پايىزدان اسپايدى ەكەن.

تاجالدىڭ تىرناعىنا ىلىنگەندەردىن 99 پايىزى 60-تان اسقان اعا بۋىن. 75 پايىزى ۆيرۋس جۇقتىرعانعا دەيىن دىمكاس، اۋرۋشاڭ بولعاندار.

كوروناۆيرۋس وڭايشىلىقپەن الدىرا قويماسىن، كەز-كەلگەن ورتادا ءتوزىمدى ەكەنىن دالەلدەپ باقتى. بۇل تۇرىمەن جەر بەتىندەگى 7 ملرد ادامعا تۇگەل جۇعىپ شىقسا تاڭعالماڭىز.

تۇنەۋكۇنى مەركەلدىڭ ءوزى وسىنى مەڭزەپ، نەمىستەردىڭ 70 پايىزى كوروناۆيرۋستىڭ قارماعىنا ىلىنەتىنىن ايتتى. كانسلەر مىسالعا كەلتىرگەن 70 پايىز 60-تىڭ اسۋىنان اسقان اعا بۋىن. نەمىس جەرىندەگى جاستار مەن بالالاردىڭ ۇلەسى 30 پايىزدىڭ ار جاق، بەر جاعىندا.

توق ەتەتىن ايتقاندا بۇل ەپيدەميانى ادامزاتتىڭ 2-3 پايىزى ەڭسەرە الماي مىنا جالعانمەن قوش  ايتىسادى.

سونىڭ ناتيجەسىندە بيلىكتىڭ توبە باسىندا وتىرعان اتا بۋىن، اعا بۋىننىڭ قاتارى سەلدىرەپ، ولاردىڭ ورنىنا جاڭا تولقىن كەلەدى. بۇل بيلىك قانا ەمەس، باسقا دا سالالاردى شارپيدى.

بيزنەس، قوعامدىق ۇيىمدار ءتىپتى قىلمىستىق توپتاردىڭ قاتارىندا بۋىن الماسۋ پروسەسى جۇرەدى. ءسوزسىز مۇنىڭ ساياسي سالدارىن سەزىنەمىز" – دەيدى توقايەۆتىڭ ءۋازىرى.

ونىڭ پىكىرىنشە ىندەت ترانسۇلتتىق كومپانيالاردى قۇزعا قۇلاتۋى مۇمكىن. قامباسى ورتايىپ، قالتاسى جۇقارعان ولار وزدەرى ساۋىن سيىرعا اينالدىرعان ەلدەردەن كەتىپ تىنادى. بۇل ولار باستاپ بەرگەن جاھاندانۋ پروسەسىن باياۋلاتىپ، دامۋ جولىنا تۇسكەن الەمدى 3-4 جىلعا ارتقا لاقتىرادى.

"كوروناۆيرۋس مەملەكەتتىك باسقارۋ ىسىندە كەمشىلىگى كوپ ەلدەردى ەسەڭگىرەتىپ كەتەدى. البەتتە بۇل ساپتا  ءبىزدىڭ ەل دە بار. ىندەتتەن كەيىنگى الەم ادام تانىماستاي وزگەرەدى. تولەرانتتىلىق جايىنا قالادى. باسىنان ءسوز اسىرمايتىن، ازىرگىگە قاراعاندا الدەقايدا ءقاۋىپتى، قاتەرلى الماعايىپ زامان ورنايدى" – دەيدى قۇدايبەرگەنوۆ.

ازىرلەگەن دۋمان بىقاي