گەندەرلىك ەكونوميكانى زەرتتەۋ ورتالىعىنىڭ ديرەكتورى مايگۇل نۇعىمانوۆانىڭ اتاپ وتكەنىندەي، پرەزيدەنت تاپسىرماسىن ىسكە اسىرۋ ىنتا-ىقالاستان بولەك، ۇلكەن قاجىر-قايراتتى قاجەت ەتەدى.
سەبەبى، ايەلدەردىڭ بيلىك مىنبەرىندەگى ۇلەسىن ارتتىرۋ ءسوز جۇزىندە وڭاي كورىنگەنمەن، ءىس جۇزىندە بۇعان تەجەۋ بولاتىن بيۋروكراتيالىق كەدەرگىلەر كوپ.
«ۇكىمەتتەگى 19 ءمينيستردىڭ اراسىندا تەك ەكەۋى عانا ايەل. ەلىمىزدە تۇتاستاي العاندا قىز-كەلىنشەكتەردىڭ تابىسى ەر-ازاماتتارعا قاراعاندا كوپ تومەن. ايەلدەردىڭ تابىسىنا كارانتين دە كەرى اسەر ەتتى. جۇمىس پەن ءۇيدىڭ شارۋاسىن قاتار الىپ جۇرگەن ايەلدەردىڭ كاسىبى تولىق توقتاپ قالدى. كاسىپ توقتاعاننان كەيىن كىرىس تە ازاياتىنى ايدان انىق»، – دەيدى ساراپشى.
ونىڭ اتاپ وتكەنىندەي ايەلدەردىڭ قارىم-قابىلەتى ەر-ازاماتتاردان كەم تۇسپەيدى. ايەلدەر ساياساتتا، بيزنەستە، ەكونوميكانىڭ بارلىق سالالارىندا ادال جۇمىس ىستەپ، تابىس تابا الاتىن الەۋەتكە يە. الايدا تولىق مۇمكىندىگىن كورسەتۋگە كەلگەندە كەدەرگى كوپ.
«جوعارى جالاقى تولەنەتىن لاۋازىمدى ورىنداردا ايەلدەردىڭ سانىن ساۋساقپەن ساناپ الاسىز. اقى تولەنبەيتىن ءۇي شارۋاسىنداعى «ايەلدەر ارمياسى» ءوز مۇمكىندىگىن پاش ەتە الماي وتىر.
قازاقستاندىق ايەلدەر بالا كۇتىمى مەن ءۇي شارۋاسىنا ەرلەرگە قاراعاندا 2،6 ەسە كوپ ۋاقىت جۇمسايدى. ەگەر كۇيەۋى بۇل مىندەتكە مولىراق كوڭىل بولسە، ايەلدەردىڭ تابىس تاۋىپ، جۇمىس ىستەۋىنە جول اشىلار ەدى»، – دەيدى مايگۇل نۇعىمانوۆا.
توقايەۆ تاپسىرماسىنا ساي ەلىمىزدەگى مەملەكەتتىك ءارى كورپوراتيۆتىك سالاداعى ايەلدەر قاۋىمىنىڭ ۇلەسى 2023 جىلعا 25 پايىزدى قۇراۋى ءتيىس. ال 2030-شى جىلعا دەيىن بۇل كورسەتكىش 30 پايىزعا جەتۋى كەرەك.
ساراپشىنىڭ پىكىرىنشە بيلىكتەگى ايەلدەردىڭ ۇلەسى ارتقان جاعدايدا ەر-ازاماتتار ەلەي بەرمەيتىن ماسەلەلەرگە كوڭىل بولىنەدى.
«ايتالىق، اقى تولەنبەيتىن ءۇي جۇمىسى، تۇرمىستاعى زورلىق-زومبىلىق، كوشەدەگى قىسىم كورسەتۋ نەمەسە قالالاردا قول ارباعا، مۇگەدەكتەرگە ارنالعان پاندۋستاردىڭ بولماۋى سياقتى پروبلەمالار ءماجىلىس مىنبەرىندە نەمەسە ۇكىمەت وتىرىسىندا ءسوز ەتەلىپ، كەمشىلىكتەر دەر كەزىندە تۇزەلەر ەدى»، – دەيدى نۇعىمانوۆا.
ساراپشىنىڭ پىكىرىنشە ساياسي شەشىمگە ىقپال ەتەتىن ايەلدەردىڭ ۇلەسى جىلما-جىل ارتىپ وتىر. ايتالىق، ماجىلىستەگى ايەلدەردىڭ ۇلەسى 27 پايىزدى قۇرايدى، بۇل جاھاندىق كورسەتكىشتەن جوعارى (24 پايىز).
«جالاقى ماسەلەسىندە جەر مەن كوكتەي ايىرماشىلىق گەندەرلىك ادىلەتسىزدىكتەن ارىلماي وتىرعانىمىزدى كورسەتەدى. قازاقستاندىق ايەلدەردىڭ تابىسى ەرلەرگە قاراعاندا 33 پايىزعا تومەن.
ايەلدەرگە ينجەنەرلىك سالا، عىلىمي باعىتتا تەر توگۋگە جول اشۋ قاجەت. جەكە بيزنەسىن اشۋعا ىنتالاندىرعان ءجون. ءۇي شارۋاسىنداعى ايەل ءوز پوتەنسيالىن ءومىر باقي كورسەتە الماي كەتۋى مۇمكىن. ال بۇل ءوز كەزەگىندە مەملەكەتتىڭ ەكونوميكالىق الەۋەتىنە كەرى اسەر ەتەدى.
بۇل تۇرعىدا باتىستىق قۇندىلىقتاردى قابىلداپ ۇيرەنگەنىمىز ءجون. ەر-ازاماتتار ءۇي شارۋاسىن شەتكە ىسىرا سالماي، كەلىنشەگىنە قول ۇشىن سوزسا، ايەلدەر شىعارماشىلىق شابىتى اشىلادى»، – دەيدى نۇعىمانوۆا.
