ورالدا قالاداعى ءبىرقاتار وزەكتى ماسەلەلەردى كوتەرۋ ءۇشىن بەيبىت ميتينگ وتكىزۋدى جوسپارلاپ، اكىمدىككە ەسكەرتۋ حات جولداعان بەلسەندىلەر بيلىكتەن باس تارتۋ جاۋابىن الدى، دەپ حابارلايدى Dalanews.kz.

"جيىن قورىتىندىسى بويىنشا ورال قالاسى اكىمدىگىنىڭ 25 تامىزداعى قاۋلىسىمەن ميتينگ وتكىزۋگە رۇقسات بەرىلمەدى. سىزدەرگە 30 تامىز كۇنى ساعات 12:00-دەن 15:00-گە دەيىن "قازاقستاننىڭ داڭقتى قىزدارى"تساياباعىندا ميتينگ وتكىزۋگە بولمايدى. سونىمەن قاتار بەلگىلەنگەن ءتارتىپتى بۇزۋ، رۇقساتسىز الاڭعا شىعۋ جانە بەيبىت جينالىس نەمەسە پيكەت ۇيىمداستىرۋ ق ر اقبتك-نىڭ 488-بابىندا قاراستىرىلعان شارالارعا اكەلەدى"، – دەپ جاۋاپ بەردى بەلسەندىلەرگە ورال قالاسى ىشكى ساياسات ءبولىمىنىڭ باسشىسى ازامات گينياتوۆ.

گينياتوۆ قازاقستان رەسپۋبليكاسىنىڭ "بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى" زاڭىنداعى 14-باپتىڭ 1-تارماعىنىڭ 5-تارماقشاسىنا سىلتەمە جاساعان. بۇل باپتا بەيبىت جينالىستارعا رۇقسات بەرمەۋگە "اقپاراتتىڭ تولىق بەرىلمەۋى" نەمەسە "جينالىس ۇيىمداستىرۋشىسىنىڭ نەمەسە ونىڭ وكىلىنىڭ قولىنىڭ بولماۋى" سەبەپ بولا الاتىنى جازىلعان. دەگەنمەن تۇرعىندارعا جولدانعان رەسمي جاۋاپتا ناقتى سەبەپ تولىق كورسەتىلمەگەن.

بەلسەندىلەر الەۋمەتتىك جەلىلەردە 30 تامىز كۇنى باعانىڭ ءوسۋىن توقتاتۋدى، جالاقى، زەينەتاقى مەن جاردەماقىنى كوتەرۋدى جانە ساياسي تۇتقىنداردى بوساتۋدى تالاپ ەتكەن بەيبىت ميتينگ وتكىزۋدى جوسپارلاعاندارىن مالىمدەدى.

ايتا كەتەيىك، 30 تامىزدا قازاقستاندا كونستيتۋسيا كۇنى اتالىپ وتەدى.