كۇن تارتىبىندە 2023-2024 وقۋ جىلىنا تەحنيكالىق جانە كاسىپتىك، ورتا بىلىمنەن كەيىنگى ءبىلىمى بار كادرلاردى دايارلاۋعا ارنالعان مەملەكەتتىك ءبىلىم بەرۋ تاپسىرىسىن قايتا قاراۋ، مەملەكەتتىك ءبىلىم بەرۋ تاپسىرىسى ورنالاستىرىلاتىن ۇيىمدارىنىڭ تىزبەسىن انىقتاۋ ماسەلەسى قارالدى. سونىمەن بىرگە مەملەكەتتىك گرانتتاردى ءبىلىم بەرۋ ۇيىمدارىنا ۇيلەستىرۋ جونىندەگى تۇيتكىلدەر دە تارقاتىلدى.
– كوميسسيانىڭ حاتتامالىق شەشىمىمەن 70 ماماندىق بويىنشا جالپى 15300 ورىنعا مەملەكەتتىك تاپسىرىس بەرىلگەن بولاتىن. بۇگىنگى تاڭدا تەحنيكالىق جانە كاسىپتىك، ورتا بىلىمنەن كەيىنگى ءبىلىم بەرۋ ۇيىمدارى تاراپىنان اتالعان مەملەكەتتىك تاپسىرىس ورىندالىپ وتىر.
بۇل رەتتە بيىل ۇيىمداستىرۋ جۇمىستارىنىڭ جاڭاشا تاسىلدە جۇرگىزىلگەنىن ايتا كەتكەن ءجون. وبلىس اۋماعىنداعى «جاستار رەسۋرستىق ورتالىقتارىنىڭ» ماماندارى اۋىلداردى، قالالاردى تۇگەل ارالاپ، مەملەكەتتىك باعدارلامالار، تەگىن وقۋ گرانتتارى تۋرالى اقپارات بەردى.
ناتيجەسىندە مەملەكەتتىك گرانتتار تولىق يگەرىلدى. ولاردىڭ اراسىندا NEET ساناتىنداعى جاستار دا بار. ەندى وقۋ ساپاسىن جاقسارتۋ، قوعامعا قاجەتتى ماماندىقتاردى انىقتاپ، كەلەسى وقۋ جىلىندا گرانتتاردى كەلەسى سول سالالارعا باعىتتاۋ جولدارىن قاراستىرۋ قاجەت – دەدى بەيسەن تاجىبايەۆ.
جيىندا كوميسسيا مۇشەلەرىنىڭ ۇسىنىستارى مەن پىكىرلەرى تىڭدالىپ، تاپسىرمالار حاتتاماعا ەنگىزىلدى.
تۇركىستان وبلىسى كوللەدجدەرىنە 2022 جىلى 17 مىڭ گرانت ءبولىنىپ، ونىڭ 11 110-ى يگەرىلىپ، قالعان 5 900 ورىنى يگەرىلمەي، كەرى قايتارىلعان بولاتىن. ال بيىل رەسپۋبليكالىق بيۋدجەتتەن قارالعان 15300 گرانت 43 كوللەدج ارقىلى تولىق يگەرىلدى.
وتكەن جىلمەن سالىستىرعاندا كوللەدج ستۋدەنتتەرى 4 مىڭعا كوبەيدى. ماماندىق تۇرىنە قاراي ءبىر ستۋدەنتكە بيۋدجەتتەن بولىنەتىن جىلدىق وقۋ قۇنى 850 مىڭ تەڭگە مەن 1 ملن. تەڭگە ارالىعىندا. بيىل گرانتتاردى ورنالاستىرۋدا اشىقتىق قاعيداتى قاتاڭ ساقتالدى.
جيىندا قازىعۇرت، تۇلكىباس، ورداباسى، ساۋران، وتىرار، تولەبي اۋداندارى مەن كەنتاۋ قالاسىندا مەملەكەتتىك تاپسىرىستى ورنالاستىرۋدا جەرگىلىكتى اكىمدىكتەر مەن كوللەدجدەر اراسىنداعى بايلانىستىڭ دۇرىس جولعا قويىلماعاندىعى دا ايتىلدى.
وبلىس اكىمىنىڭ ورىنباسارى وسى رەتتە، وقۋعا تۇسۋگە نيەتتى جاستارمەن اقپاراتتىق-تۇسىندىرمە جۇمىستارىن جۇرگىزۋدە اۋدان، قالا اكىمدىكتەرى مەن وبلىستىق ءبىلىم باسقارماسى اراسىندا جۇمىستى جاڭا فورماتقا كوشىرۋ قاجەت ەكەنىن جەتكىزدى. وسى باعىتتا جاڭا جوسپارلار قۇرىلۋدا.
ايتا كەتەيىك، قىركۇيەك ايىنان باستاپ، كوللەدج ستۋدەنتتەرىنىڭ شاكىرتاقىسى 22 مىڭنان 32 مىڭعا، ال، 2024 جىلدان باستاپ 42 مىڭعا ارتادى.
