بۇگىندە ەل اۋماعىندا وبلىستار اراسىنداعى جۇمىس كۇشى ايىرماشىلىعىن ازايتۋ ماقساتىندا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى شەڭبەرىندە ەرىكتى قونىس اۋدارۋ جوباسى تابىستى جۇزەگە اسۋدا.
باسپا ءسوز ءماسليحاتىندا شقو حالىقتى جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسى باسشىسىنىڭ ورىنباسارى دوسحان قايىرعازينوۆ جوباعا قاتىسۋشىلارعا جاڭا قونىس جايلى بولۋى ءۇشىن بارلىق قاجەتتى جاعداي جاسالىنىپ جاتقانىن العا تارتتى.
– بيىل شىعىس قازاقستان وبلىسىنىڭ ەلىمىزدىڭ وزگە ايماقتارىنان «ەڭبەك» باعدارلاماسىنىڭ ماڭىزدى باعىتتارىنىڭ ءبىرى ەرىكتى قونىس اۋدارۋ جوباسى شەڭبەرىندە 637 ادام قونىس اۋداردى. بىزدەر باعدارلامادا كورسەتىلگەندە ولارعا ءتيىستى جاعداي جاساپ، قاجەتتى مەملەكەتتىك تولەمدەرىن تولەدىك. جوباعا سايكەس، وبلىسىمىزعا كوشىپ كەلۋ شىعىندارىن وتەپ بەرۋ ءۇشىن مەملەكەت ءار وتباسىنىڭ مۇشەسىنە ءبىر رەت 70 ايلىق ەسەپتى كورسەتكىش ەسەبىندە اقى تولەندى. بۇدان كەيىن ولاردىڭ ءۇي جالداۋ جانە كوممۋنالدىق قىزمەتتەرگە قاجەتتى شىعىندارىن ءوتۋ ءۇشىن اي سايىن ءاربىر وتباسى مۇشەسىنە 15-30 ايلىق ەسەپتىك كورسەتكىش مولشەرىندە اقى تولەنۋدە، – دەدى دوسحان قايىرعازينوۆ جۋرناليستەرمەن جۇزدەسۋدە.
باسپا ءسوز ءماسليحاتىندا دوسحان قايىرعازينوۆ شقو-عا بيىل وزگە ەلدەردەن 140 قانداسىمىز كوشىپ كەلىپ، قونىستانعانىن دا العا تارتتى. ول وزگە ەلدەن تاريحي وتانىنا كەلگەن قانداستارعا بارلىق مەملەكەتتىك قولداۋلار كورسەتىلگەنىن اتاپ ءوتتى.
