باسپا ءسوز كونفەرەنسياسىندا دەنە شىنىقتىرۋ جانە سپورت باسقارماسىنىڭ باسشىسى دوسجان ۋالحانوۆتىڭ ايتۋىنشا، بىلتىر سپورتپەن اينالىسقان ادامدار سانى 427 مىڭعا دەيىن ارتقان.
وڭىردە سپورتتى جانىنا سەرىك ەتىپ، سالاۋاتتى ءومىر سالتىن ۇستانعان ادامدار ءۇشىن ءتۇرلى سپورت نىساندارى سالىنۋدا. بۇگىندە وبلىس بويىنشا بارلىعى 3 مىڭنان استام سپورت كەشەنى بار.
وتكەن جىلى 16 نىسان پايدالانۋعا بەرىلدى. اقتوعاي كەنتىندە، كوكپەكتى اۋىلىندا جانە شار قالاسىندا ءۇش دەنە شىنىقتىرۋ-ساۋىقتىرۋ كەشەنى سالىندى. سونداي-اق، ەكى ءجۇزۋ باسسەينى، بەس سپورت الاڭى، بەس شاعىن فۋتبول الاڭى، ءبىر حوككەي قورابى سالىنعان.
– قازىرگى تاڭدا ءۇش سپورت نىسانىنىڭ قۇرىلىسى جۇرگىزىلۋدە. اتاپ ايتساق، كاتونقاراعاي اۋىلى مەن شەمونايحا قالاسىندا ەكى دەنە شىنىقتىرۋ-ساۋىقتىرۋ كەشەنى جانە ماقانشى اۋىلىندا ءبىر سپورت ءمودۋلى سالىنۋدا. بيىل مارقاكول، اقسۋات، قاينار، بورودۋليحا، سامار، بوزانباي، ۇلكەن نارىن اۋىلدارىندا جانە سەرەبريانسك قالاسىندا ون شىنىقتىرۋ-ساۋىقتىرۋ قۇرىلىسىن باستاۋ جوسپارلانۋدا، – دەدى دوسجان ۋالحانوۆ.
