پرەزيدەنتتىڭ ازاماتتاردى قولجەتىمدى تۇرعىن ۇيمەن قامتاماسىز ەتۋ جانە قۇرىلىس سالاسىن دامىتۋ جونىندەگى تاپسىرمالارىن ورىنداۋ اياسىندا 2025 جىلى 20 ملن شارشى مەتردەن استام تۇرعىن ءۇي پايدالانۋعا بەرىلدى. بۇل تۋرالى ۇكىمەت وتىرىسىندا ونەركاسىپ جانە قۇرىلىس ءمينيسترى ەرسايىن ناعاسپايەۆ مالىمدەدى، دەپ حابارلايدى Dalanews.kz.
بولجامعا سايكەس، 2026 جىلى تۇرعىن ءۇيدى پايدالانۋعا بەرۋ كولەمى 18،5 ملن شارشى مەتردى قۇراماق. بۇل رەتتە، ەگەر تۇرعىن ءۇي قۇرىلىسىن ىنتالاندىرۋ شارالارى كۇشەيتىلسە، كورسەتكىش ءوسۋى مۇمكىن. ەرسايىن ناعاسپايەۆتىڭ اقپاراتى بويىنشا نەگىزگى جۇمىستار استانا، الماتى جانە شىمكەنت قالالارىندا جۇرگىزىلەدى.
وسى ماقساتتارعا قول جەتكىزۋ ءۇشىن ەلىمىزدە قۇرىلىس الاڭدارىن قارجىلاندىرۋدان باستاپ يپوتەكالىق باعدارلامالاردى كەڭەيتۋگە دەيىنگى كەشەندى قولداۋ شارالارى جۇزەگە اسىرىلاتىن بولادى.
ونەركاسىپ مينيسترلىگىنىڭ مالىمەتىنشە، وتكەن جىلى كەزەكتە تۇرعاندار ءۇشىن 218 ملرد تەڭگەگە جالعا بەرىلەتىن 14،5 مىڭ پاتەر ساتىپ الىنعان، ال "نەسيەلىك تۇرعىن ءۇي" جەلىسى بويىنشا 140 ملرد تەڭگەگە تاعى دا 14 مىڭ پاتەر سالىندى جانە ساتىپ الىندى.
مەملەكەتتىك باسپانالار جەڭىلدىكپەن بەرىلەتىن 2% جانە 5%-دىق نەسيەلەردىڭ ارقاسىندا قارجىلاي قولجەتىمدى بولىپ وتىر. ولاردى 5 مىڭنان استام وتباسى پايدالاندى. ال وعان قوسىمشا "ناۋرىز" جانە "ناۋرىز-جۇمىسكەر" باعدارلامالارى ارقىلى تاعى جالپى سوماسى 233 ملرد تەڭگە بولاتىن 8،6 مىڭ زاەم بەرىلدى.
"بىلتىر ازاماتتارعا 8 مىڭعا جۋىق جالعا بەرىلەتىن تۇرعىن ءۇي جانە 11 مىڭنان استام جەڭىلدىكتى يپوتەكالىق قارىز بەرىلدى. بۇدان باسقا، زاڭعا ەنگىزىلگەن تۇزەتۋلەر بۇرىن "ساتىپ الۋ قۇقىعىنسىز" بەرىلگەن جالعا بەرىلەتىن تۇرعىن ءۇيدى جەكەشەلەندىرۋ قۇقىعىن بەردى، وتكەن جىلى بۇل مۇمكىندىكتى 15 مىڭنان استام ازامات پايدالاندى. سونداي-اق، 11 مىڭنان استام ادام جالداۋ اقىسىنىڭ ءبىر بولىگىنە سۋبسيديالاردى پايدالاندى، بۇل ماقساتتارعا 7،6 ملرد تەڭگە ءبولىندى، - دەپ اتاپ ءوتتى ەرسايىن ناعاسپايەۆ.
ونىڭ ايتۋىنشا، بيىل بۇل جۇمىستار جالعاسادى. تاعى 11،5 مىڭ پاتەر سالۋ ءۇشىن 155 ملرد تەڭگەگە جەرگىلىكتى اتقارۋشى ورگانداردىڭ باعالى قاعازدارىن ساتىپ الۋ، سونداي-اق 18 مىڭنان استام جاڭا جەڭىلدىكتى قارىزدار بەرۋ جوسپارلانعان.
