Prezıdenttiń azamattardy qoljetimdi turǵyn úımen qamtamasyz etý jáne qurylys salasyn damytý jónindegi tapsyrmalaryn oryndaý aıasynda 2025 jyly 20 mln sharshy metrden astam turǵyn úı paıdalanýǵa berildi. Bul týraly Úkimet otyrysynda ónerkásip jáne qurylys mınıstri Ersaıyn Naǵaspaev málimdedi, dep habarlaıdy Dalanews.kz.

Boljamǵa sáıkes, 2026 jyly turǵyn úıdi paıdalanýǵa berý kólemi 18,5 mln sharshy metrdi quramaq. Bul rette, eger turǵyn úı qurylysyn yntalandyrý sharalary kúsheıtilse, kórsetkish ósýi múmkin. Ersaıyn Naǵaspaevtyń aqparaty boıynsha negizgi jumystar Astana, Almaty jáne Shymkent qalalarynda júrgiziledi.

Osy maqsattarǵa qol jetkizý úshin elimizde qurylys alańdaryn qarjylandyrýdan bastap ıpotekalyq baǵdarlamalardy keńeıtýge deıingi keshendi qoldaý sharalary júzege asyrylatyn bolady.

Ónerkásip mınıstrliginiń málimetinshe, ótken jyly kezekte turǵandar úshin 218 mlrd teńgege jalǵa beriletin 14,5 myń páter satyp alynǵan, al "nesıelik turǵyn úı" jelisi boıynsha 140 mlrd teńgege taǵy da 14 myń páter salyndy jáne satyp alyndy.

Memlekettik baspanalar jeńildikpen beriletin 2% jáne 5%-dyq nesıelerdiń arqasynda qarjylaı qoljetimdi bolyp otyr. Olardy 5 myńnan astam otbasy paıdalandy. Al oǵan qosymsha "Naýryz" jáne "Naýryz-Jumysker" baǵdarlamalary arqyly taǵy jalpy somasy 233 mlrd teńge bolatyn 8,6 myń zaem berildi.

"Byltyr azamattarǵa 8 myńǵa jýyq jalǵa beriletin turǵyn úı jáne 11 myńnan astam jeńildikti ıpotekalyq qaryz berildi. Budan basqa, zańǵa engizilgen túzetýler buryn "satyp alý quqyǵynsyz" berilgen jalǵa beriletin turǵyn úıdi jekeshelendirý quqyǵyn berdi, ótken jyly bul múmkindikti 15 myńnan astam azamat paıdalandy. Sondaı-aq, 11 myńnan astam adam jaldaý aqysynyń bir bóligine sýbsıdıalardy paıdalandy, bul maqsattarǵa 7,6 mlrd teńge bólindi, - dep atap ótti Ersaıyn Naǵaspaev.

Onyń aıtýynsha, bıyl bul jumystar jalǵasady. Taǵy 11,5 myń páter salý úshin 155 mlrd teńgege jergilikti atqarýshy organdardyń baǵaly qaǵazdaryn satyp alý, sondaı-aq 18 myńnan astam jańa jeńildikti qaryzdar berý josparlanǵan.