تۇركىستان وبلىسى ءۇشىن شەكارا ماڭىندا ورنالاسقاندىقتان جەتىسايدىڭ ستراتەگيالىق ماڭىزى وتە جوعارى. دامۋ مۇمكىندىگى دە مول. اسىرەسە، اۋىل شارۋاشىلىعىن جۇيەلەپ دامىتىپ، كاسىپپەن شۇعىلدانامىن دەۋشىلەرگە قولداۋ كورسەتۋدىڭ ماڭىزى زور. ءوز كەزەگىندە اۋدان اكىمى جامانتاي بەيسەنبايەۆ اۋداننىڭ دامۋى جايىندا بايانداپ بەردى.

– جەتىساي اۋدانىنداعى حالىقتىڭ نەگىزگى كۇنكورىسى – جەر. اۋىل شارۋاشىلىعى. سونىڭ ىشىندە ماقتا شارۋاشىلىعى، باقشا، كوكونىس ونىمدەرى. بۇگىندە اۋدانىمىزدا ايىنا ەكى رەت اگروتەحنيكالىق شارۋالار باستالعاندا حالىقتى، شارۋالار مەن ديقانداردى شاقىرىپ، باسىن قوسىپ، سەمينارلار وتكىزىپ وتىرمىز. بيىل قاۋىن-قاربىزدارىمىز مىناۋ كورشىلەس وزبەكستان رەسپۋبليكاسىنا قاراعاندا ءبىر اپتا، ون كۇن ەرتە ءپىستى. ءبىزدىڭ بيىلعى ەڭ ءبىرىنشى العان ءونىمىمىز – قىرىققابات. قاۋىن-قاربىزدىڭ دا، قىرىققاباتتىڭ دا ونىمدىلىگى جاقسى بولدى. سۋدان قيىندىق بولعان جوق، – دەگەن اۋدان اكىمى اۋىل شارۋاشىلىعىنا قاتىستى ءوز ويىن ارى قاراي جالعادى.

– بىزدەگى ەڭ ۇلكەن پروبلەما – زيانكەستەر. زيانكەستەرمەن كۇرەستە بيىل ءبىز بيولوگيالىق ادىسكە باسىمدىق بەردىك. بۇل – بىرىنشىدەن، ەكولوگيالىق تازا ءادىس. ەكىنشىدەن، حيميالىق ادىسكە قاراعاندا ارزان. سوسىن، اۋىل اكىمدىكتەرىنە تورت-تورتتەن زەرتتەۋشى ماماندار جىبەردىك. شارۋالارعا جاردەم بەرسىن دەپ. ول تورتەۋدىڭ بىرەۋى وبلىستىق زيانكەستەرگە قارسى بولجام ورتالىعىنىڭ مامانى. ءۇش اي بويى ولار شارۋالارعا قاي كەزدە نە ىستەۋ كەرەكتىگىن ايتىپ وتىردى. جىلدا بىزگە اۋىل شارۋاشىلىعى مينيسترلىگى رەسپۋبليكالىق بيۋدجەتتىڭ ەسەبىنەن 250-300 ملن. تەڭگەگە حيميالىق پرەپاراتتار بەرەتىن. ول شارۋالاراعا قولداۋ رەتىندە تەگىن تاراتىلادى. بيىل ەشكىم قاتىسپاي، كونكۋرستىڭ وتپەي قالۋىنا بايلانىستى ول قارجى، پرەپاراتتار كەلگەن جوق. ءبىراق، بيولوگيالىق ءادىستى قولدانۋ ارقىلى ول قارجىنىڭ جوقتىعىن حالىققا بىلدىرگەن جوقپىز، – جامانتاي قاناي ۇلى اۋىل شارۋاشىلىعىنا قاتىستى ماسەلەمەن قالاي كۇرەسكەنىن اڭگىمەلەپ بەردى.

 

Dalanews.kz