Biyl jetisailyq sharýalar ziiankestermen kúreste biologiialyq ádiske basa mán berdi
Túrkistan oblysy úshin shekara mańynda ornalasqandyqtan Jetisaidyń strategiialyq mańyzy óte joǵary. Damý múmkindigi de mol. Ásirese, aýyl sharýashylyǵyn júielep damytyp, kásippen shuǵyldanamyn deýshilerge qoldaý kórsetýdiń mańyzy zor. Óz kezeginde aýdan ákimi Jamantai Beisenbaev aýdannyń damýy jaiynda baiandap berdi.
– Jetisai aýdanyndaǵy halyqtyń negizgi kúnkórisi – jer. Aýyl sharýashylyǵy. Sonyń ishinde maqta sharýashylyǵy, baqsha, kókónis ónimderi. Búginde aýdanymyzda aiyna eki ret agrotehnikalyq sharýalar bastalǵanda halyqty, sharýalar men diqandardy shaqyryp, basyn qosyp, seminarlar ótkizip otyrmyz. Biyl qaýyn-qarbyzdarymyz mynaý kórshiles Ózbekstan Respýblikasyna qaraǵanda bir apta, on kún erte pisti. Bizdiń biylǵy eń birinshi alǵan ónimimiz – qyryqqabat. Qaýyn-qarbyzdyń da, qyryqqabattyń da ónimdiligi jaqsy boldy. Sýdan qiyndyq bolǵan joq, – degen aýdan ákimi aýyl sharýashylyǵyna qatysty óz oiyn ary qarai jalǵady.
– Bizdegi eń úlken problema – ziiankester. Ziiankestermen kúreste biyl biz biologiialyq ádiske basymdyq berdik. Bul – birinshiden, ekologiialyq taza ádis. Ekinshiden, himiialyq ádiske qaraǵanda arzan. Sosyn, aýyl ákimdikterine tórt-tórtten zertteýshi mamandar jiberdik. Sharýalarǵa járdem bersin dep. Ol tórteýdiń bireýi oblystyq ziiankesterge qarsy boljam ortalyǵynyń mamany. Úsh ai boiy olar sharýalarǵa qai kezde ne isteý kerektigin aityp otyrdy. Jylda bizge Aýyl sharýashylyǵy ministrligi respýblikalyq biýdjettiń esebinen 250-300 mln. teńgege himiialyq preparattar beretin. Ol sharýalaraǵa qoldaý retinde tegin taratylady. Biyl eshkim qatyspai, konkýrstyń ótpei qalýyna bailanysty ol qarjy, preparattar kelgen joq. Biraq, biologiialyq ádisti qoldaný arqyly ol qarjynyń joqtyǵyn halyqqa bildirgen joqpyz, – Jamantai Qanaiuly aýyl sharýashylyǵyna qatysty máselemen qalai kúreskenin áńgimelep berdi.
Dalanews.kz
